عبدالرحمن بامەرنی
پتریا ئەڤ كەسێن شعرێ دنڤیسن یان بەحسێ خوە دكەن دەما شعرێ دنڤیسن، دبێژن شعر ئیلهامە و نڤیسینا وێ چ گرێدان ب دەمی ڤە نینە و مەرج نینە كەنگی ئەو ئیلهام دهێت و بو ڤێ چەندێ ژی هندەك دبێژن، ئەم قەلەم و كاغەزێن خوە ددانینە بەر دوشەكا خوە یا نڤستنێ و هەر گاڤا ئەو ئیلهامە هات، ئەم وێنەیێ خوە یێ شعری دنڤیسین و هندەك ژی دبێژن، ئەز د ترومبێلێ دا بوم و من كاغەز یا ژ بەریكا خوە ئینایە دەر و من شعر یا نڤیسی! هەر چەندە بابەتێ من ئەو نینە ئەز ڤان كەسان رەت بكەم یان ژی پەسەندا وان بكەم، لێ بهزرا من هەمی كەسان جورە ئیلهامەك بو دهێت و هەمی كەسان تا راددەیەكی ئیلهاما شعری لدەف هەیە و بەهرەمەندی لدەف هەیە، لێ هەر ئێكی لدویڤ گرنگیپێدانا وی، كا مژولاهیێن وی چنە و گرنگیێ ب چ ددەت، بو نمونە، ئەگەر هوزانڤان بیت، دێ هەمی هەستێن خوە ل سەر پەیداكرنا وێنەیەكێ شعری كومڤەكەت و هوسا بو چیروك نڤیسی، شێوەكارەكی، سینارستەكی و هەر كارەكێ هزركرن و بیركرن تێدا هەبیت. هەر كەسەك ژی دێ هەولدەت، ئەو تشتێ هاتیە دهزرا وی دا یان ب پێش چاڤێن وی كەتی یان گوهـ لێبوی، وێنەكی یان بیروكەیەكێ ژێ دروست بكەت.
دا بزانین ئەو سنعەتكاریا پشتی ئیلهامی دهێت چەند یا گرنگە، دێ هەولدەین، چەند نمونەیەكێن شعری وەربگرین. دشعرا (خەونا دپەنجەرێ دا)، یا هوزانڤانا كچ (ئاواز نهێلی)، چەندین وێنە دكەڤنە بەر چاڤێن مە و دهەمیان ژی دا مروڤ دزانیت هوزانڤانێ زێدەتر ژ هەر تشتەكی سەربور دنڤیسینا شعرێ دا هەنە و شعر وێ ئالوز و مژویل دكەت، ئەو ژی وەك وان كەسان یێن قەلەم و دەفتەرێن وێ دبەریكێ دا و لهیڤیا ڤێ ئیلهامێ كا دێ ژ كیش نشكێ ڤە ئەجنێن شعرێ بو دەركەڤن. هوزانڤان ل سەرێ شعرا خوە ب سێ وێنەیان دەست پێدكەت و ئەگەر ل سەر وێنێ ئێكێ راوەستین:
(خوناڤ یا چاڤێن داربەریا دشووت)، ئەگەر وەك ئیلهاما شعری لڤی وێنەی تەماشە بكەین، دێ بینین كو هوزانڤانێ شیایە مفای ژ ئیلهاما شعری وەربگریت، لێ ئایا ئیلهام بتنێ بەسە كو وێنەیێ وێ یێ شعری كراسەكێ جوانیێ ژی بچیتە بەر! ئەز باوەردكەم، چ ژ فەرهەنگا وێ و چ ژی ژ كێم ل سەر راوەستیان، هوزانڤانێ یا خوە د سەر ڤی وێنەی را بازدای. ئەگەر وەك جوانی تەماشە بكەین، ژبەركو بەلگێ بەریێ ژ بەلگێن هشكە و دارابەریێ ژ وان دارانە یێن خوە ل بەر گەرمێ و سەرمایێ دگرن و ب سالان ل سەر بنێ خوە دمینن، بەلگێ وێ ژی تا وی راددەی یێ هشكە، دەما مروڤ ددانتە سەر دەستێ خوە و پف دكەتێ، دێ بینیت تژی توز ل سەر رادبیت. یانكو هوزانڤان، دشیا بو وێنێ خوە یێ شعری، ل بەلگەكێ نازكتر بگەریت ژبەر ڤان خالان، ئێك دارێن بەریێ زێدەتر ل دەرڤەی گوندی دهێنە دیتن یان ل چیایی هەنە و جهێ ژ هەمیان نزیكتر ژی، ئەگەر ل ناڤ گورستانەكێ هەبن، دڤی حالەتی ژی دا، وێنە دێ یێ مری بیت، دڤیابا بەلگەكێ گولەكێ، شینكاتیەكی ئینابا، دا گەلەك جوانتر بیت، بهزرا من ئەگەر هوزانڤانێ خوە بڤی وێنەی ڤە ماندیتر كربا، دا شێت كراسەكێ جوان كەتە بەر و خاندەڤای ل سەر راوەستینیت.
دوێنێ دوێ دا، (كەسك و سوری یا خو دنزارێ بەروژی ئالاندی)، دێ بینین، ئیلهاما شعری ژی تێدایە و ژ لایەك دیڤە سنعەتكاری ژی بو هاتیە كرن و بڤی سالوخەتدانێ، هوزانڤانێ شیایە ب داهێنانەكا جوان، وێنەكی بكێشیت كو خاندەڤایێ وێ ژێنەبوریت.
دوێنەیێ سیێ ژی دا، (چاڤێ روژێ دل نادەت پەلاتینكێن رەنگین ژ خەو راكەت)، ئەڤ وێنەیە ژی گەلەك یێ جوانە و هوزانڤان، شیایە برێكا بەلاتینكان و چاڤێ روژێ، وێنەكی دروست بكەت، بو تشتەكێ گەلەك بهێز و دبەرامبەر دا، تشتەكێ گەلەك لاواز و بێ هێز و لڤێرە یا شیایی جوانی و نازكیێ بگەهینتە ئێك، كو ژیان هونەرە و جوانیە و حەژێكرنە، ئەگەر مروڤی زانی وێ ژیانێ كراسەكێ جوان بكەتە بەر و وەك بویكەكێ ب خەملینیت.
ليست هناك تعليقات:
إرسال تعليق