تەوزیفكرنا جوانیێ د شعرەكا (حەسەن فەتاح) داعبدالرحمن بامەرنی
جوانی سالوخەتەكە یان دیتنەكە مروڤ بریارا جوانیێ بو ددەت و نە هەر تشتێ ب بەرچاڤێن مروڤی بكەڤیت یێ جانە، (كانت) دبێژیت: (جوانی ئەو تشتە یێ مروڤان كەیف خوش دكەت و زەوقا مروڤی پێ ڤەدبیت)، نڤیسەر و رەخنەگر (ئەمین عەبدولقادر) دبێژیت: (جوانی بیرەك نینە كو ژ دەرڤەی كارێ هونەری، هەبونا خوە هەبیت). ژ ڤی روانگەی ژی، رائێخستنا وێنەیێن شعرێ دناڤ قالبێ دەقی دا، دەما هوزانڤان ئاڤاهیێ قالبێ شعرا خوە ل سەر د نژنینت، پێنگاڤەكە بەرەڤ ژیانەكا دی و خولقاندنا كەش و هەوایەكی، كو تێدا ژیان برەنگەكی بهێتە دیتن، رەنگەك بیت هەمی هەستێن مروڤی تێدا ب ئاگەهـ بكەڤن و هوزانڤان رحێ ب دەقێ خوە یێ شعری د پەخشیت و بتایبەتی ئەو هوزانڤانێن شیان هەبن، دگەل وێنەیێن شعرێن خوە ببنە ئێك رح و ئێك گیان، ژبەركو رح تشتەكێ روحانی یە، دشێت كارلێكرنێ د هەستێن كەسێن دی دا بكەت، شاعر ژی د بزاڤێن بەردەوام دایە كو سنعەتكاریەكا جوان بەرهەم بینیت تا وی راددەی هەست بكەت، جوانیا وێنەیێن شعرا وی دێ بدلێ پترترین كەس بن و پترترین كەس دێ بریارا جوانیێ ژ بو دەن.
ئەگەر ئەڤا ل سەری پێشەكیەك بیت ژ پەیوەندیا شعرێ ب هەستێن خاندەڤای ڤە، دڤێت شاعر ژی بزانیت دێ چاوان ڤێ هەڤگرتنێ و ڤان هەستان دناڤبەرا دەقێ خوە و خاندەڤای دا دروست بكەت و ئازرینیت. دەما خاندەڤا شعرەكێ د خوینبیت یان گوهلێ دبیت، هەست بكەت یێ دگەل تشتەكی یان بونەوەرەكی راوەستیایی كو شیانێن گوهلێبونێ و دیتنێ و بیستنێ هەنە، گەلەك جاران ژی دەما وێنەیێ شعری د ئاخڤیت، ئەڤ ئاخفتنا هەنێ گەلەك ئارامترە ژ ئاخفتنا كەسانەكی كو هەبون و نەبونا وی چ جوداهیا خوە نەبیت! ئەڤە د حالەتەكی دا، ئەگەر تێهزرینا مە بو ژیانێ و كەسێن دی، ل سەر بنیاتێ ئافرێندەریێ و داهێنانێ و ژیانێ و هەڤالینیێ بیت، كو هندەك مروڤان ژیانا خوە ژ بو ڤێ چەندێ تەرخانكریە.
ژ بو پتر روهنكرن ژی، دێ شعرەكا هوزانڤان (حەسەن فەتاح)، بناڤێ (ئارمانج) وەرگرین و بزانین ئەڤ هوزانڤانە چەند شیایە ڤێ هەڤگرتنێ دناڤبەرا دەقێ خوە یێ شعری و خاندەڤایێ خوە دا دروست بكەت. د وێنەكی دا دبێژیت:
هەمی هەستێن من ژ تە دەستپێدكەن
و ل دەف تە ژی بدوماهی دهێن
وەغەرێن تە ژ سینگێ من نا بورن
دڤێ پارچە وێنەی دا، هوزانڤانی هەولدا یە، هەر پێنج هەستێن خوە، ب هەبونا وێ ڤە گرێبدەت، یانكو ئەگەر مروڤەكی چ ژڤان هەستان لدەف نەبن، هینگێ هەبون و نەبونا وی چ جوداهیا خوە دگەل ئێك نابن. بو تەئكیدكرن ژی ل سەر ڤێ دانپێدانێ و بو جوانیا وێنەیێ خوە یێ شعری، هوزانڤان یێ دبێژیت هەستێن من ژ تە دەست پێدكەن و لدەف تە بدوماهی دهێن، یانكو دان پێدانەكا عاشقانە و تژی وەفاداریە بو كەسانەكی كو مروڤ ژیانێ پێ ب بەخشیت و حەژێكرنا خوە بو دیار بكەتن، لێ هەر ژڤی وێنەی ئەگەر هوزانڤان لڤێرە بتنێ راوەستیابا، دبیت جورە نە ئارامیەك لدەف خواندەڤای پەیدا ببا، ژبەركو دا ئەڤ پسیارە مینیت، ئایا ئەو كەسا مروڤ هەبون و نەبونا خوە پێڤە دهێلیت، ژ هەژی وێ چەندێ یە یان نە؟ هوزانڤان هەست بڤێ نە ئارامیێ دكەت و بو جوانكرنا وێنەیێ شعرا خوە، ڤی وێنەی بدوماهی دئینیت و دبێژیت: (وەغەرێن تە ژ سینگێ من نا بورن). ئەگەر ل وێنەكێ دی تەماشا بكەین، دەما دبێژیت: (چاڤێن تە هەڤڕكی یا ستێران دكەن)، یانكو خەلك چەند ل بەرامبەری ستێران د راوەستن و خەلك چەند عاشقێ وانن و تەماشا دكەن، هێشتا چاڤێن تە بو من ژێ جوانترن. یان دەما دڤی وێنەی دا دبێژیت: (سەرێن من و تە ل سەر بالگەهەكی..... خەونا ب هشیاریێ ڤە دبینن)، یانكو حەژێكرنا مە هەردوویان تا وی راددە یە، ژبلی ئێك و دوو ئەم چ خەونێن دی نابینین، هشیاربون ژی ب وێ رامانێ كو روژەك بهێت و ئەو هەردوو تێدا حەژێكرنا خوە بكەینە راستی و هەمی دەرگەهێن داخستی، ل بەر سینگێ خوە ڤەكری ببینن.
%20copy.jpg)
ليست هناك تعليقات:
إرسال تعليق