2013/01/31

تیروژكێن عەشقێ‌ لدەف (شیلان عەبدولمەناف)


عبدالرحمن بامەرنی
هەردەم ئەم بچاڤەكێ‌ نێر تەماشای ئەدەبی دكەین و خو ئەگەر ژنەكێ‌ ژی نڤیسا بیت، ژبەركو ژن بخو ژی یێن فێربوین بزمانێ‌ زەلامی دەربرینێ‌ ژ هەستێن خوە و ژ بوچوونێن خوە دكەن، ئەڤە نە بتنێ‌ د شعرێ‌ ژی دا دهێتە دیتن، بەلكو د هەمی ژانرێن دی یێن ئەدەبی دا و تا د هونەری ژی دا ئەڤێ‌ چەندا هەنێ‌ رەنگ  ڤەدانا خوە هەیە و هەردەم ژنان خوە ل هەمبەر گەڤێن كومەلگەهی  لاواز دیتی یە،  كو مێران هندەك یاسا و رێسا بو ڤی كومەلگەهی دروستكرینە و ژن ژی ئێكەمینن بو ملكەچبون ب وان یاسا و رێسایان ڤە و یێن بوینە پیروزی و دڤێت ژلایێ‌ وێڤە، نەهێنە هنگافتن.

پێنەڤێت ئەڤرو جوداتر ژ بەری چەند سالان، قەلەمێن مێ‌ د بیاڤەكێ‌ بەرفرەهتر دا پەیدابوینە و بزمانێ‌ خوە دشێن دەربرینێ‌ بكەن و ئەو تشتێ‌ ئەو دبێژن و دنڤیسن، ئەو تشتە كو بەرگریێ ژ مافێن وان دكەت كو ڤان یاسا و رێسایان بشكێنن، ئەڤ شعرا دێ‌ كەینە د خزمەتا بابەتێ‌ خوە ژی دا، ئێك ژ نمونێن قەلەمێ‌ مێ‌ یە و هەستێن مێیانە و دەربرینێن مێیانە تێدا سەراڤ دبن، دا بزانین ژن تا چ راددە دشێت بەرامبەر پیروزیێن زەلامی راوەستیت و زمانێ‌ نەخێر بەرامبەر وی بكاربینیت، دێ‌ شعرا پەنابەر یا  هوزانڤانا كچ (شیلان عەبدولمەناف) وەرگرین، كو دكوڤارا چاڤدێر ژمارە 120 دا هاتیە بلاڤكرن.
شعر بخوە ب شێوێ‌ مەسجەكێ‌ هاتیە نڤیسین و یا ئاراستەكری یە بو كەسەكی كو ئەو كەس ژی زەلامە. هوزانڤان دڤێ‌ مەسجا ئاراستەكری دا، بەری بزمانێ‌ خوە باخڤیت بزمانێ‌ هەمی كچان دڤێت پەیامەكێ‌ رابگەهینیت كو ئەو نە یا داڤانە و كچ نە نێچیرەكا ئاسانن كو هەر دەما زەلامی ڤیا دێ‌ تورا خوە هاڤێژیت و ئەو دێ‌ بدەست ڤە چن. هەر وەكو دڤی وێنەی دا، دبێژیت (ئەو نە ئەزم یا دگەل كاروانێ‌ پاییزا تە ددەتە رێ‌)، هەر چەندە شیلان خانێ‌ لڤێرە زمانێ‌ (ئەز) دشعرا خوە دا بكار ئینایە، لێ‌ ژبو تەكنیكەكا جوانتر پەنا بریە بەر زمانێ‌ تاكی بو ڤێ‌ دەربرینێ‌. هوزانڤان وێنێن جوان ب سنعەتكاریەكا جوانتر تەوزیف دكەت و د وێنەكی دا دبێژیت (ئەگەر روژ و هەیڤ و ستێر و بارانی.... عەسمانەكم و هەمیان هەمبێز دكەم!)، ئەڤە ژی هەر لایەنەكە ژوێ‌ مەسجێ‌ كو ئەو باوەرییا لدەف وێ‌ هەی بەس بیت كو بشێت خوە د سەر هەمی ناز و هەستان دا زال بكەت.
 ل دوماهییا ڤێ‌ شعرێ‌، هوزانڤانێ‌ بەروكێ‌ شعرا خوە بەرفرەهـتر لێكریە و ڤێ‌ مەسجێ‌ د كەتە د خزمەتا هەڤكێشەیەكێ‌ دا، ئەو ژی نێر و مێ‌، دەما دبێژیت (دلێ‌ من ژی نە وەلاتێ‌ تە یە..... ئەگەر نیڤ چەرخێ‌ دژی ب بوریت...... تو هەر تێدا پەنابەری..). یانكو هوزانڤان براشكاوانە یا دبێژیت من ژی هەست هەنە و راستە حەزێن من فشارێ‌ دئێخنە سەر من كو لدویڤ وان هەستان و خوەشیان بچم، بەلێ‌ نە رامان ژێ‌ ئەوە هەر كەسێ‌ بیت و ئەو كەسێ‌ هەنێ‌ یێ‌ چاوا بیت و تەمەنێ‌ وی چەند بیت و ئاستێ‌ وی چەند بیت و تا دوماهیێ‌، ژ بەر هندێ‌ ژی دبێژیت، تو پەنابەری، یانكو تە ئەو ماف نینە تو تێدا بمینی و لێ‌ ئاكنجی بمینی، چ ئەڤ دلێ‌ هەنێ‌ عەشقەك تێدا هەبیت و دلێن ژنان ژی نە وەك یێن زەلامانە كو گەلەك ژوور تێڤە هەبن و هەر كەس دشێت گلدێن خوە لێ‌ برائێخیت  و جهێ‌ خوە لێ‌ خوەش بكەت.
هەر چەندە ژ خاندنا ئێكێ‌ ژڤی دەقێ‌ شعری، دبیت خاندەڤا بتنێ‌ ل سەر هندەك وێنەیێن جوان راوەستیت، لێ‌ دەق بخوە گەلەك جوان هاتیە ئافراندن و ئەڤ سنعەتكاری و هوستاكارییا تێدا هاتیە بكارئینان، خاندەڤای گەلەك دویرتر دبەت و تام و چێژەكا خوەشتر ددەتێ‌ ژ ئەوا ژ هندەك وێنان بتنێ‌ دبینیت، ئەگەر زێدەتر هەولبدەت خوە رادەستی شعرێ‌ بكەت و ئەو سحرا ژ موزیكەیا شعرێ‌ و ژ هەستێن مێیەكێ‌، كو هەر دەم زەلام خوە ل بەر ژنان لاواز دبینیت، ئەگەر خاندەڤا ئەو بیت یێ‌ بزانیت دێ‌ چاوان چێژێ‌ ژ شعرێ‌ وەرگریت.


ليست هناك تعليقات: