بحث هذه المدونة الإلكترونية

pertook

pertook

2011/02/04

(سه‌عدوللا بامه‌رنى) ژ په‌رتوكا من یا بناڤێ (شاعرێن بامه‌رنێ)


سه‌عدوللا بامه‌رنى، ئه‌وێ ب كه‌له‌پورێ كوردى دهاته‌ نیاسین (هوزانڤان، سترانبێژ، ئاوازدانه‌ر، ده‌رمانێن كوردى و  نڤیسه‌ر)، دڤان بواران هه‌میان ژى دا شیا ناڤه‌كى بو خوه‌ چێكه‌ت، ل ده‌ستپێكا سالێن حه‌فتیا قه‌ستا ئێزگێ رادیویا كوردى ل به‌غدا دكه‌ت، چه‌ندین سترانێن خوه‌ لێ توماركرینه‌ و شیایه‌ چه‌ندین به‌رنامه‌یان ژى لێ پێش كێش بكه‌ت، كو د وى ده‌میدا كه‌سێن وه‌ك وى ل (ده‌ڤه‌را به‌هدینان) دكێم بون كو بشێن وێ بوشاتیێ پر بكه‌ن و ده‌ڤه‌را مه‌ پێدڤییاتى ب بلیمه‌ته‌كێ وه‌ك وى هه‌بو، ژبو تژیكرنا وێ بوشاتیێ و ئێك ژ سترانێن وى بو رادیویا به‌غدا توكاركرین ب ده‌نگێ خوه‌.
وه‌ره‌ بچین مه‌تینا 
ل چیاكێ ژورى ل ئه‌ڤرازى
خه‌ملا دیندارى شوینه‌
ل ئێك و دوو بكه‌ینه‌ گازى

هه‌ر وه‌كو مه‌ گوتى كو وى هوزان دنڤیسین و ئاواز ژى بو ددانان و ئاله‌تێ عودێ ژى لێددا، ده‌نگێ وى ژى یێ هاریكار بو و ب ده‌نگێ خوه‌ چه‌ند ستران ژى توماركرینه‌. ژ سترانبێژێن سترانێن وى دوباره‌ گوتین،  یان هوزانینَن وى كرینه‌ ستران، (شڤان په‌ه‌روه‌ر، بشار زاخوى، سه‌میر زاخوى، گولبهار، عه‌بدوللا زێرین و لڤێ دوماهیێ ژى سترانه‌كا وى ژلایێ تیپا دهوك ڤه‌ دوباره‌ ب ده‌نگێ فه‌رسه‌ت حسێن و ئالان عومه‌ر ڤه‌ هاتیه‌ توماركرن). ژبلى لایه‌نێ هونه‌ى ژى سه‌عدوللایى شاره‌زه‌یه‌كا باش د چێكرنا ده‌رمانێن كوردى دا هه‌بو و ل سالێن هه‌شتیان په‌رتوكه‌ك بناڤێ (گیا و ده‌رمان) چاپكریه‌ و تشتێ جهێ به‌حسكرنێ دڤێ په‌رتوكێ دا، هه‌ر ده‌رمانه‌كێ كوردى گیایه‌كێ كوردى ژى دگه‌ل دا هاتیه‌ وێنه‌كرن و ئه‌ڤ گیایه‌ هه‌مى ژى ل چیایێن كوردستانێ هه‌نه‌، زێده‌بارى پێشكێشكرنا به‌رنامه‌یه‌كێ كه‌له‌پورى دته‌له‌ڤزیونا كوردستان دا كو به‌رنیاسبونه‌كا به‌رفره‌هـ بو چێبو و خه‌لكى ب كه‌له‌پورێ كوردى ناسدكرن.
سه‌عدوللا بامه‌رنى گه‌له‌ك جاران ژلایێ رژێما به‌عس ڤه‌ هاتیه‌ گرتن و جاره‌كێ ژى ژوان جاران ژبه‌ر ڤێ هه‌لبه‌ستى هاتیه‌ ده‌سته‌سه‌ركرن و هاتیه‌ ئێشاندن.

بلا من شنویكا زانى
كو ئه‌ڤین خلاس بو
زیندانه‌ بو من خانى
ستێرا گه‌ش لمن ئاڤابو
ئَێدى من به‌سه‌ جانى 
تالان ل ئه‌ڤینیێ رابو

سه‌رێ چیا به‌فرێ لێكر
دیندارى به‌لگ وه‌راندن
دلێ من گرت و ژێكر
ئه‌ڤیندار هو ئاراندن
بێهنا بارانێ لێكر
وه‌ره‌ پێش دلێ كون كون

خوزى من تو نه‌دیتباى
چ ل دلێ بریندار بكه‌م
ئاڤریێت خوه‌ لمن بده‌ باى
دلێ چه‌روان كول و خه‌م
من به‌سه‌ ژڤێ ژینا ماى
ئێدى ئه‌ڤینێ ناكه‌م

دوماهى خاتر خاستنا هوزانڤانى ژڤێ دنیایێ، ل شه‌ڤا 29ـ1ـ2006ێ وه‌غه‌را داویێ دكه‌ت و ل گورستانا ناحیا بامه‌نێ  دهێته‌ ڤه‌شاتن، بتنێ یا بمه‌ دمینیت ئه‌م بێژین خودێ گیانێ وى ب به‌هه‌شتا به‌رین شاد بكه‌ت.

+ ئه‌ڤ نڤیسینه‌ به‌شه‌كه‌ ژ په‌رتوكا (شاعرێن بامه‌رنێ ـ ژ نالبه‌ندێ مه‌زن بو نالبه‌ندێ بچویك) ئه‌وا ژ لایێ سه‌نته‌رێ ڤه‌كولینێن كوردى و پاراستنا به‌لگه‌نامه‌یان ـ سالا  2011دهوك.

إرسال تعليق