ده‌ست هژاندن
هه‌مى حه‌زدكه‌ن ده‌ما هه‌ڤاله‌كى یان كه‌س و كاره‌كێ خوه دبینن، وه‌ك رێزگرتن بچنه ده‌ستێ وى. هنده‌ك جاران مروڤ یێ به‌رهه‌ڤه تا ده‌هـ مروڤان ده‌ستێ وان بگڤێشیت و بهژینیت. چ ئه‌و مروڤ ل دیوانه‌كێ درونشتى بن یان ژ جهه‌كێ دویر هاتبن و ئه‌گه‌ر بو ده‌مه‌كێ كێم ژى لده‌ف وان بمینیت و بخازیت خاترێ ژ وان بخازیت! دووباره دێ كت كته چیته ده‌ستێ هه‌میان ڤه. ده‌ست هژاندن بو هه‌میان خوشه و هنده‌ك پیروزیێ دده‌نێ و بو هنده‌كان مه‌رجه ده‌ست بهێته گڤاشتن و دبێژن: دبیت (خدر پێغه‌مبه‌ر) بهێته ده‌ستێ ته و ئه‌گه‌ر ته تبلێن وى گڤاشتن و هه‌ستى دده‌ستى دا نه‌بون، ئه‌و تو دشێى (مرادا) خوه ژێ داخاز بكه‌ى.
گرنگیا ڤێ په‌یوه‌ندیێ بو هه‌میان خوشه و هه‌مى رێزێ لێدگرن، هونه‌رێ رێزگرتنێ ژى چ ژ هونه‌رێن دى كێمتر نینه، ئه‌گه‌ر به‌ها و سه‌نگا وێ بهێته زانین. ئه‌ز بكێماتى ژى نابینم ئه‌گه‌ر به‌شه‌ك ژ په‌یمانگه‌ها هونه‌رێن جوان، یان مادده‌یه‌كێ گرنگ ژ په‌یره‌وێ خاندنێ ل قوتابخانه‌یان، بو هونه‌رێ رێزگرتنێ بهێته ته‌رخانكرن.
جیهانگیرى
ئه‌گه‌ر ل مروڤێ ڤى سه‌رده‌مى بنێرین و ئه‌و ته‌كنه‌لوژی و پێشكه‌تنا كه‌تیه به‌ر ده‌ستێ وى، به‌راورد دگه‌ل مروڤێ ته‌مه‌نێ خوه دپێنجى سالێن بورى و پێدا بوراندین. دێ چ بینین؟! مروڤێ نوكه تێرێ دخوت و جلێن باش دكه‌ته به‌رخو و چ كێماسیان، هه‌ر ژ كه‌یفێ و ده‌م بوراندنێ و كه‌شخێ لخو ناهێلیت. هه‌ر حه‌ز و خواسته‌كا هه‌بیت ژى، بێى زه‌حمه‌ت و ماندیبون دشێت بده‌ست خوه ڤه بینیت. تشتێ بهایێ رێزگرتنێ ژى دناخێ وان دا بلند دكه‌ت و هه‌ر ئێك خوه بهه‌مى تشته‌كى بزانیت، دێ بینى هه‌میا وه‌ك ئێك ده‌رفه‌ت هه‌یه كو خوشیێ ببینن. هه‌مى دشێن ب ساناهى ل كه‌نالێن عه‌سمانى بنێرن و بچنه سه‌ر كومبیوته‌رى و دئه‌نترنێتێ دا شاره‌زا بن. لڤێره مه‌ترسیا جیهانگیریێ ده‌ست پێدكه‌ت، هه‌مى تشته‌ك بو هه‌میان یێ به‌رهه‌ڤ بوى و ب ساناهى دهێته به‌ر ده‌ستێ وان، جیهان یا بویه (به‌رزه‌حفیه‌ت) و هه‌مى دشێن غه‌ریزه‌یێن خوه تێدا تێربكه‌ن. جیهانگیریێ شیایه ژى گه‌له‌ك پیڤه‌رێن ژیانێ و مروڤایه‌تیێ نه‌ك بتنێ نه‌هێلیت، به‌لكو بشكێنیت ژى. ده‌ما كوره‌ك بو خو كچه‌كێ دهه‌لبژێریت، یان كچه‌كێ حه‌ز ل سه‌ر كوره‌كى هه‌بیت. پسیارا ژ هه‌میێ نێزكتر بو هه‌ردوو ره‌گه‌زان دڤێ هه‌لبژارتنێ دا ئه‌وه، ئایا ئه‌ز دێ چه‌ند ژێ قازانج كه‌م؟ ئه‌و چ به‌رژه‌وه‌ندى نه من و وى دگه‌هیننه ئێك! لڤێره كه‌سایه‌تیا مروڤى به‌ره به‌ره دهێته ژ ده‌ست دان. ده‌ما ئه‌و كور به‌ره‌ڤ هه‌لبژارتنا كچه‌كێ ڤه دچیت هه‌ولدده‌ت، ئه‌وێ كچێ گه‌له‌ك سالوخه‌ت لده‌ف هه‌بن (ئه‌ڤ نمونه بو بازرگانى و كرێكارى و فه‌رمانبه‌رى و هه‌مى تویژێن جڤاكى) ژى، ئه‌ڤێن هه هزر دكه‌ن، ئه‌ڤا بو دهێت وه‌ك خه‌لاته‌كى یه و دڤێت ئه‌و خه‌لات لدویڤ خواسته‌كا وى بده‌ست بكه‌ڤیت و بمافێ خوه دزانیت، ژبه‌ركو ژ ئه‌نجامێ هه‌لبژارتنا وى بو یه. هزر دكه‌ت وه‌ك كه‌ره‌سته‌یه‌كى، چاوان ل بازارى ئه‌و كه‌ره‌سته یێ به‌رچاڤكریه، بلا تا ئه‌و كه‌س چ كور یان كچ، ببیته هه‌ڤژینا وى و هه‌ڤپشكا ژیانا وى، تا ئه‌و پروسه یه یا سه‌ركه‌تى ژى بیت. ژبه‌ركو یا ل سه‌ر بیناتێ جیهانگیریێ هاتیه پێكئینان، یا ژ كێماتیا ڤالا نابیت. ئه‌ڤه هه‌مى ژى بو ئێك خال دزڤرن، ئه‌و ژى ژبه‌ركو هه‌مى تشته‌ك لدویڤ هه‌لبژارتنا مروڤى یه نه‌ك پێدڤیاتیا مروڤى.
كه‌سێ سیبه‌ر
كوردان ژ مێژه گوتیه هه‌ر كه‌سه‌كى دناڤ خوه دا (زرویه‌ك) یێ هه‌ى. زرو ژى بو سه‌رهاتیه‌كا كورده‌وارى یا كه‌ڤن دزڤریت، هه‌ر وه‌كو هاتیه ڤه‌گێران: كوره‌كێ گه‌له‌كێ شیم هه‌بو و هه‌ر تشتێ قه‌ست كربایێ یان كاره‌كێ پێ راببا، دا بو ب خرابى زڤریته ڤه و گوندیان هه‌میا نه‌هییا خوه ژێ دكر. ئه‌ڤ گوتنه ژى پتر بو وان كه‌سان دهێت، ئه‌ڤێن شیماتیان دكه‌ن، ب وێ رامانێ كو هه‌ر كه‌سه‌كى، كه‌سه‌كێ دى دناڤ خوه یا خو دا هه‌یه و خرابیا، پێ دده‌ته كرن.ده‌ما ئه‌م دگه‌هینه وێ باوه‌ریێ كو هه‌ر كه‌سه‌كى دناڤا خوه دا كه‌سه‌كێ دى هه‌بیت! نه بوێ رامانێ كو ئه‌و كه‌س بتنێ كه‌سه‌كێ خرابكارانه بیت، به‌لكو كارێن باش ژى هه‌نه و ئه‌گه‌ر مروڤ یێ دبریاره‌كا خو دا دوو دل بیت ژى، ئه‌و كه‌سه یه، مروڤى پشت راست دكه‌ت و وێ بریارێ ئێكلایى دكه‌ت. لڤێره هه‌ر كه‌سه‌ك بدیتنه‌كا جودا ره‌فتارێ دگه‌ل ڤى كه‌سى دكه‌ت و ناڤ لێ دكه‌ت و ناڤكرنا ژ هه‌میان ژى زانستیانه‌تر، كه‌سێ سیبه‌ر دهێت. هنده‌كان وه‌ك مروڤێن شێت ده‌ما بتنێ درێكه‌كێ دا دچن، دگه‌ل خوه دكه‌ڤنه دان و ستاندنێ و هنده‌ك ب شاره‌زایانه ره‌فتارێ دگه‌ل كه‌سێ خو یێ سیبه‌ر دكه‌ن. كه‌سێ سیبه‌ر ژى، كه‌سێ دوێ یه و یا گرنگ دێ چاوان ره‌فتاره‌كا جوان دگه‌ل دا كه‌ى و كه‌یه كه‌سه‌كێ مفاكه‌ر! لڤێره، دا كو ئه‌م بشێین وێ كه‌ساتیا باش بخو هه‌لبژێرین و بشێین دگه‌ل ده‌ردورێن خو دباش و رێكخستى بین و ره‌فتارێن مه هه‌مى ل سه‌ر بنیاته‌كێ رێزگرتنێ بن، دڤێت ئه‌م بزانینن چاوان دێ كه‌سێ خوه یێ سیبه‌ر په‌روه‌رده كه‌ین و ملكه‌چى خوه كه‌ین.
تێبینى: ئه‌ڤ بابه‌ته دگوڤارا سیلاڤ یا ژماره 57 دا بلاڤ بویهعبدالرحمن بامه‌رنى
%20copy.jpg)
ليست هناك تعليقات:
إرسال تعليق