عبدالرحمن بامەرنی
بەری چەندەكێ ئەم ل مالەكێ دروونشتی بووین و سوحبەت چوو سەر (كارتا نیشتیمانی)، كو دڤێت ھەر ھاولاتیەكی كارتا نیشتیمانی بۆ خوە دروستكربیت، ئەگەر مامەلێن وی برێڤەناچن و سەرەرایی دەما بریارەك دەربچیت، حكومەت یان جھێ پەیوەندیدار چەند ھەیڤا مولەتێ ددەن تا خەلك كارۆبارێن خوە رێكدئێخیت و ل دەمێ بۆ وی گونجای ئەوا ژێ ھاتییە داخوازكرن سەر راست بكەت، لێ وەك نەریتەك ل رۆژێن دوماھیێ شنوی بیرا مە دھێت و دبیتە پەلەپەلا مە.
درێژناكەم سوحبەت چوو سەر كارتا نیشتیمانی و بەحسا ناڤەكی ھاتەكرنێ، ناڤێ باپیرێ سیێ بوو و ب شاشی ل سەر ناسناما بارێ كەسایەتی ھاتبوو نڤیسین و ناڤ ژی (بافرۆ) بوو و چیرۆكا ڤی ناڤی ژی، دەما بۆ ناڤنڤیسینێ و دروستكرنا ناسنامان ل دەستپێكا چەرخێ بوری ل گوندان دگەریان، پرسیار ژ ژنەكێ ھاتەكرنێ و ناڤێ وێ و یێ بابێ وێ و یێ باپیرێ وێ؟ لێ وێ ژ ناڤێ خوە و یێ بابێ خوە زێدەتر نەدزانین، ئینا ئەڤێن لدووران گوتێ ھەما بێژە ناڤێ وی (بافرۆ)یە و وێ ژی گوت بافرۆ و ئەڤێ ناڤ ژی دنڤیسین ژی ناڤێ باپیرێ وێ ب بافرۆی نڤیسی و ژ ھینگێ وەرە بافرۆ كەفتیە سەر ناسنامان و دەرگەھێ سوحبەتێ ڤەبوو، چەندین نموونێن دی ھاتنە بەحسكرن، كو ب ناڤ ب شاشی ھاتینە نڤیسین وەكی (محۆ و حەمۆ و عەلۆ ووو) و ھندەكان دویڤچوون بۆ كرن و ناڤێن خوە سەر راست كرن، لێ ئەو سەر راستكرنا ھەنێ بتنێ ل سەر ناسنامێ دروست دبوو و ئەز بخوە چەند كەسان بڤان كورتەناڤان ناسدكەم و یێن كەفتینە سەر دەڤێ خەلكێ و ئێدی سەرراستكرنا وان یا ژ دەست دەركەفتی. دەما من گوتیە نەڤیێن بافرۆی، ئەرێ بۆچی وە ناڤێ باپیرێ خوە راستڤەنەدكر؟ گوت نێ كەس نەمایە ئەم پرسیارا ناڤێ دروست ژێ بكەین و مە ناڤ وەكی خوە ھێلا، لێ نەڤیێن كچان بافرۆ ب بازیدی گوھارتن و دەما مە گوتیێ بوچی؟ مەرەم ژێ روتینا فەرمانگەھێن حكومی، ب كەنیڤە گوتن: "تو ب خودێ ما (بافرۆ) ژی ناڤە؟".
ــــــــــــــــــــــــــ
رۆژناما ئەڤرو 3743 یا رۆژا 13/5/2025
ليست هناك تعليقات:
إرسال تعليق