عبدالرحمن بامەرنی
((چیرۆك ژی دگەلە))
ڤەگێر ئەو كەسەیە یێ چیرۆكێ ڤەدگێریت، دبیت ئەو كەساتییەك بیت دناڤ چیرۆكێ بخوەدا و دبیت ژی كەساتییەك بیت ژ دەرڤەی چیرۆكێ و دبیت ژی گرێدانەك دناڤبەرا ھەردووكێن مەگوتیدا ھەبیت، ئەڤە ژی ل سەر ڤەگێرێ ب خوە دمینیت و شێوازێ دەربرینێ و نڤیسینێ و ئاڤاھییێ چیرۆكێ ڤێ چەندێ بۆ مە دیاردكەت، كا ڤەگێر كییە و بڤێ ڤەگێرانێ رۆلێ وەرگری دھێت، چ ئەو وەرگرە خواندەڤا بیت و چ ژی گوھدێر بیت. دڤێ خواندنا كورتدا، دێ ل سەر خالەكێ راوەستین، ئەو ژی تەكنیكا ڤەگێرانێ یە ئایا ڤەگێران و جورێ ڤەگێرانێ ئەگەرە كو خواندەڤا ب چیرۆكێ ڤە بھێتە گرێدان یان نە؟!
بۆ ڤێ چەندێ مە كورتەچیرۆكا (تزبیێن دەستێ بابێ من)، ژ كومەلا كورتەچیرۆكێن بناڤێ (ئەو كچا ھەمی ھیڤیێن وێ فرین) یا (بژیان سەبری مەسیحە)، وەرگرتییە. چیرۆك بەحسێ سەردەمێ ئەنفالان دكەت، پێشمەرگەیەك نەشێت خێزانا خوە قورتال بكەت و بتنێ ئێك زارۆكی دگەل خوە دبەتە ئیرانێ و چار زارۆكێن دی ل دەف كەسەكی دھێلیت، كو ئێك ژ وان كەسان ڤەگێرا چیرۆكێ بخوەیە و دناڤ چیرۆكێ دا چەند وێنەیێن ناخ ھەژین دكەڤنە بەرچاڤ، ژوان: (ئەنفالا رەش ھات.. ئێك زارۆك دگەل خوە بر و بەرەڤ ئیرانێ دا رێ........... و چار پرتێن دلێ خوە ل گەلییێ رەشاڤە بەرەڤ دێرەلۆكێ برن، ل وێرێ ھێلان و ب دلەكێ ڤالا زڤری، دا خزمەتا گەلێ خوە بكەت). لاپەرە 26. د وێنەكێ دیدا دبێژیت: (دڤێت لەزێ بكەین، بەری حكومەت بھێت؟ ڤان زارۆكان بكەینە د تەلیسان دا و بھاڤێژینە دزێیێ مەزن دا). لاپەرە 26 و دوێنێ سیێ دا، بڤی رەنگی بەحسا دیتنا بابێ خوە دكەت و دبێژیت:
دەستەكێ تزبیا كرنە ستوھێ من، ل بەر ھەمبێزكرنێ را گوتە من:
جەگەرا من، ئەز بابێ تەمە. لاپەرە 27.
چیرۆك ب پیشاندانا جھی و دەمی و كاراكتەرێن چیرۆكێ دەستپێدكەت، ئەو ژی ھەر ئێك ژ (ئەنفالان، ئیران، توپ و تەیارە، خزمەتا گەلی، مامێ ھەژار، چار زارۆك، خانیك، برس و نانێ جەھی، ئاژەل، سالح، تەلیس، بریارا ئازادیێ، زارۆكێن پێشمەرگەیان، تاپیێ، بەفر، بەعسی، پێلاڤا قێری، كۆل، ترس، تراشین، تزبی، دێو، دایكا مێرەم، پێنووس، چیرۆكەكێ بنڤیسیت). ژ خواندنا ڤێ چیرۆكێ ژی، نڤیسەری گرێدانەك دناڤبەرا ھەردوو جورێن ڤەگێری دا دروستكریە و ب زمانێ كەساتیێ سیێ (وی)، چیرۆكێ دەست پێدكەت و دبێژیت: (ئێك زارۆك دگەل خۆ بر) یان (مامێ ھەژار، ھەر چار زارۆك دخانیەكێ پری ڤیان دا ڤەشارتن) لاپەرە 26. نڤیسەرێ چیرۆكێ كەساتیێ دووێ ژی دئینتە دناڤ چیرۆكێدا و دبێژیت: (دڤێت لەزێ بكەین بەری حكومەت بھێت). لاپەرە 26. دیسان ھاتیە و ب زمانێ كەساتیێ ئێكێ ژی ئاخفتییە و دبێژیت: (تو ژمن نە ترسیایی تە ئەڤ ئاخفتنە گوت، ئەرێ ما تو ژ خودێ ژی نە ترسیایی). لاپەرە 26. و ئەگەر بزڤرینە جورێ ڤەگێری ئەوێ نڤیسەرێ د كورتە چیرۆكا خوەدا بكارئینایی، دێ بینین كو وەك ڤەگێرەك ژی ھاتیە دناڤ چیرۆكا خوەدا و دبێژیت: (پێنج رۆژ بورین، رژێمێ بریارا ئازادیێ دا، ئو گوت: دروستە زارۆكێن پێشمەرگان ل سەر ناڤێن وان بھێنە توماركرن). لاپەرە 27 و ھەر دگەل ڤی وێنێ پەركێشكری، وێنەیەكێ دی ددویفرا دھێت و نڤیسەر بخوە دبیتە ڤەگێر و دبێژیت: (شەڤەكا تاری و بێ بەخت، ھندە دێ دەستێ من ب ملڤە ژ قوقلكێ ئیننە دەر، ھندی یێ من لدویڤ خۆ دكێشن، ھەتا گەھاندی مە بنێ زینییێ و كرمە د تاپیێ دا). لاپەرە 27.
ژ ئەڤا ل سەری ژ جورێن ڤەگێرانێ و ب كارئینان و تێكەلكرنا كەساتیێن ڤەگێری بۆ مە دیاردبیت، كو نڤیسەرا چیرۆكێ گەلەك ب گرنگی ل سەر ڤێ چیرۆكێ راوەستیاییە! ئەو گرنگییا ئەز ژێ بەحسدكەم، ئێك دەما ئەو وەك ڤەگێر دھێتە دناڤ چیرۆكێدا و وێنەیەكێ ناخ ھەژین دروست دكەت، بابێ وێ ل غەریبیا وێ بھێلیت و زەلامەك وێ و سێ خیشك و برایێن وێ ب خودان بكەت و رەوشا ترسێ ژ رژێما بەعس وەسا نیشان بدەت تا وی راددەی ئێك بھێت و بێژیت ڤان زارۆكان بكەینە د تەلیسەكی دا و بھاڤێژینە ئاڤێ یان بابەك نەشێت زارۆكێن خوە دگەل خوە دەرباز بكەت و خەما وی مللەتێ وی ئەركێ وی یێ پێشمەرگاتیێ بیت و لدووماھیێ دێمێ وی بابی ژبیربكەت، یێ ئەو ئینایە ھەبوونێ و حەژێكرن دایێ و بێژیتە كەسەكێ دی باب و ئەڤ لێكدانا وێنەیان ھەمی تراژیدیایەكێ بۆ مە وەك وەرگێر و ھەمی تشت ب ھونەرێ ڤەگێرانێ دھێتە نمایشكرن و نھێنییا لدەف من بخوە یا بەھایەكێ مەزن بڤێ چیرۆكێ ددەت چ وەك ڤەگێر یان وەرگر، ئەو تزبینە یێ بابێ وێ د ستویێ وێ داناین و حەژێكرنا خوە دوبارە بۆ نیشاندایی و تشتێ ھێشتا ڤی بەھایی زێدەتر ژی لێدكەت، ئەڤە زێدەتر ژ سیھـ سالان ئەو تزبی وەك بیرھاتن دگەل وێدا ماین و ھەر ئەو تزبی بووینە ئەگەر، كو ئەم وەك وەرگر ڤێ چیرۆكا خەمگینا ئەنفالان بخوینین.
ـــــــــــــــــــــــ
*بژیان سەبری مەسیحە، كورتەچیرۆك، تزبیێن دەستێ بابێ من، لاپەرە 26 و 27، 2025 دھۆك.
* رۆژناما ئه‌ڤرۆ 3760- 2025/ 05/06
ـــــــــــــــــــــــــــ
كورتەچیرۆك/ بژیان سەبری مەسیحە
تزبییێن دەستێ بابێ من
ئەنفالا ڕەش هات.. ئێك زارۆك دگەل خوە بر و بەرەڤ ئیرانێ دا رێ، ترس و لەرزەكا زۆر دەنگێ تۆپ و تەیارا گورمە گورما ئەوان چیا دهەژاندن.. چار پرتێن دلێ خو ل گەلییێ ڕەشاڤە بەرەڤ دێرەلۆكێ برن، ل وێرێ هێلان و ب دلەكێ ڤالا زڤڕی دا كو خزمەتا گەلێ خوە بكەت.
مامێ هەژار هەر چار زارۆك د خانیكەكێ پڕی ڤیان دا ڤەشارتن و كرنە زارۆكێن خو.. ب دلۆڤانی سەرێ خو دانا سەر.
برسە، هندە دێ مرۆڤ كەڤلێن گیانەوەرا خوەن.. كەسەكی جەهێ ڕەش بۆ ئاژەلێ خوە ئینا.. خەلكێ دەڤەرێ هەمی پێوەر بوون ژێ وەرگرت و خارن.
صالحی گۆتە مامێ من:
-دڤێت لەزێ بكەین بەری حوكمەت بهێت؟ ڤان زارۆكان بكەینە د تەلیسان دا بهاڤێژینە د زێیێ مەزن دا.
-تو ژ من نە ترسیای.. تە ئەڤ ئاخڤتنە گۆت. ئەرێ ما تو ژ خودێ ژی نە ترسیای.
پێنج رۆژ بورین، رژێمێ بڕیارا ئازادییێ دا.. ئو گۆت: دروستە زارۆكێن پێشمەرگا ل سەر ناڤێ وان بهێنە تۆماركرن.
شەڤەكا تاری و بێ بەخت، هندە دێ دەستێ من ب ملڤە ژ قوقلكێ ئیننە دەر، هندی یێ من ل دویڤ خوە دكێشن، هەتا گەهاندی مە بنێ زینییێ و كرمە د تاپیێ دا، رۆژانە دگەل دویكێلا بۆمبا و دەنگێ گورمە گورمێ بۆ وێرێ دبرم، رۆژ یێن دبورن.. بەفرە دونیا گەلەكا سارە !
مامێ هەژار، دەستێ خوە دانا بن گوهێ خو و سەرێ خو هەژاند، دلۆڤانییا وی گەلەك ژ ترس و پیساتییا بەعسییا مەزنتر بوو، دیارییەك بۆ من ئینا بوو، پێلاڤەكا قێری ل پێ من كر، ل وی دەمی ب تنێ ژییێ من دو سال بوون، بەرەف بنێ گوندی برم و دەرێ كولی ڤەكر، دەمێ ب ژۆر كەڤتیم، ترسێ ئەز گرتم، دبینم. كەسەك یێ دیارە، ئەڤە چار سالە رهێن خوە نە تراشی نە، من خو د پشت مامێ خو ڤە، ڤەشارت.
-من گۆتە مامێ خو باب ! ئەڤە كی یە؟ ئەزا ژێ دترسم
دەستەكێ تزبییا كرنە ستۆهێ من، لبەر هەمبێز كرنێ را گۆتە من:
- جەگەرا من، ئەز بابێ تە مە.
ترسا من پتر لێهات.. من هزر دكر ئەڤە ئەو دێوە یێ د چیرۆكێن دایكا مێرەم دا و یێ هاتی من ببەت، چونكی من شیماتیێن كرین، لێڤێن من شۆڕ بوون و من گۆتێ:
- ببورە ئەز خەلەتییا نا كەمە ڤە.
ئازادی و دووماهییا نەخوشیا، مرۆڤ تاما وان نزانیت تاكو نەبینیت، دبیت كەسێ هزر نەدكر رۆژەك بهێت، كو پێنووسەكی هەلگریت، یان دو رێزكێن چیرۆكەكێ بنڤیسیت، بەلێ رۆژ هەتا هەتا دپشت چیایا د ڤەشارتی نابن.. دەمەك دهێت گەشتر دهەلێن.
نوكە ژی ئەو تزبییە د ناڤ دەستێن من دا نە.. لبەر سینگێ بابێ خوە لاڤا ژ بۆ مامێ هەژار و دایكا دویێ دكەم.
ليست هناك تعليقات:
إرسال تعليق