عبدالرحمن بامەرنی
ئەو ھەڤالێن ئەز ژێ بەحسدكەم، ھەڤالێن قوتابخانێ بوون و ئەم ل ناڤ بازاری بووین و مە ھەڤالەكێ خوە یێ دی ژی دیت و دەما چاڤێ وی ب مە كەفتی، گوت وەرن پێكڤە چایەكێ ڤەخوین؟ ھەر چەندە جاروباران چاڤێ مە ب ئێكدكەڤیت و ئەم سلاڤەكا ل سەر پێ ل ئێك دكەین، لێ ب دیتنا مە ھەردووكان و ئەو ژی دگەل، دێ سوحبەت و بیرھاتنێن مە ژی خۆش بن و مە ملێن چەند كورسیكان گەھاندنە ئێك و ھەڤالێ مە گازی چایچی كر و ھەڤالەكێ مەیێ دی ژ دویرڤە ھات و یێ دكەتە كەنی، گوت من ھین دیتن، ھەر چەندە من كارەكێ گرنگ ژی یێ ھەی، لێ دیتنا وە و روونشتنا دگەل وە دێ تامەكا جوداتر ھەبیت.
چا بۆ مە ھات و مە چایا خوە ڤەخار، ھندەك پرسیارێن بچیك، كار، خێزان، زارۆك و مە خوە بەردا بیرھاتنان، باژێرێ نەجەف و بەغدا و فەلوجە و (تەسنیع عەسكەری) بۆ كاكلكا بابەتێ مە و ھەڤالێ مە یێ كارێ خوە ھێلایی و ھاتی لدەف مە روونشتی، گوت: ھین دزانن دەما من ھین دیتین من ھەست كر ئەز یێ ھەیم؟ مە گوتێ چاوان؟ گوت: ئەز ھەڤالێن خوە یێن تەمەنێ خوە كێم دبینم، ئەڤێن ئەز دگەل دروینم یان ئەو دمن ناگەھن یان ئەز دوان ناگەھم، تا وی راددەی ئەو سترانێن ئەز حەژێدكەم كەسێ نەڤێت گوھێ خوە بدەتێ و ئەو پەرتووك و رۆمانێن جاران من د خواندن و مە دگەل سوحبەت و دانوستاندن دكر، مە بەحسا كاراكتەرێ وێ رۆمانێ دكر، ئەز كەسەكێ نابینم بێژمێ كا چ رۆمانا نوی ھاتیە یان وە بەرێخوەدایە چ فلم؟ ھەڤالێ مە بەرێخوەدامە و ئەگەر كەسەك ل وارا نەبایە و ئەوێ بتنێ بایە، رەنگە دا كەتە گری، گوت: ل بیرا وە دھێت دەما مە پێكڤە گوھداریا سترانان دكر و دێ بێژی مە ھەمیان ئێك زەوق ھەبوو، زەوقا ئێك ستران و ئێك جورێ فلمی و ئێك جورێ پەرتووكێ و حەژێكرنێن مە ھەمیان وەكی ئێك بوون و نە بتنێ ئەڤە، بیرا وە دھێت دەما ئێكی نوكتەك یان پێكەنینەك گوتبا، مە ھەمیان پێكڤە پێ دكرە كەنی و نوكە ھەمان نوكتە یێن دھێنە گوتن و ھەر كەس لێڤێن خوە ژی ژ سەر ئێك راناكەت، دێ بێژی ئەم (ئەھلولكەھفین) و سەرەرای ئەڤ تشتێن لدەف مە ھەمی ب بھابوون، سترانێن مە و گەریانێن مە و بیرھاتنێن مە و لێ نوكە ھیچ تشتەكی ژوان بھایێ خوە یێ جاران نەمایە و نە بتنێ ئەڤە، ئەز ھەست دكەم ھەڤالێن بەرێ نەماینە یان ئێك لدویڤ ئێكی یێ دچیت و ھەما كەسەك چەندەكێ ب بەرچاڤێن تە نەكەفت، ئێدی ژبیرا تەچوو تا ژ نشكەكێڤە چاڤێن وە ب ئێك دكەڤن و تشتێ ئەز گەلەك جاران پرسیار دكەم، ئەرێ ئەڤ خەلكە بەرەڤ كیڤە دچیت؟ ئایا چوونا وان بەرەڤ تونێلەكا تارییە یان ژیانا مە ئەو تونێلا تاری بوو و نفشێ نوكە یێ ژوێ تاریێ دەركەفتی و ئەرێ ھین بێژن رۆژەكێ چوونا مە ژی ھەر بڤی رەنگی بیت و ھەمی تە ژبیربكەن؟!!
ھەڤالێ مە ئەم ھەمی د مەندەھوشیێ دا ھێلاین، ھەڤالێ مە گەلەك تشت گوتن، ئەرێ راست ئەڤ گوھورینێن ھەنێ دروست بووینە یان مە نەشیاییە خوە دگەل بگونجینین! ئەز بەحسا وی ھەڤالی و سوحبەتێن وان ناكەم، لێ ئایا چەند كەس ھەنە و ھەمان ھەست و دیتنێن ھەڤالێ مە یێن ھەین، ئایا ئەو نەشیایینە خوە دگەل رۆژەڤێ بگونجینن و دگەل رابردوویێ خوە ماینە! ھەر چەندە سوحبەتا من یا ھەڤالێن من بوو، لێ راستی بیت من بەحسا وان ھەمی كەسانە یێن بڤێت خوە دگەل ئەڤرۆ و گوھورینێن نوی بگونجینن و تایبەت گێسكێ ژیریا دەستكرد دێ ھەمی تشتەكی دگەل خوە مالیت.
ــــــــــــــــــــــ
ھژمار 3755 رۆژا29/5/2025
ليست هناك تعليقات:
إرسال تعليق