حكومەتا بەروپشت

عبدالرحمن بامەرنی

تشتێ جوان یێ جوانە و ئەز رێك بەحسا جاددا دناڤبەرا دهۆك و هەولێرێ دا دكەم، ژ رۆڤییا و پێدا. جاددە دو سایدە و هەر سایدەك تێرا خوە یێ بەرفرەهە، سێ بۆ چار ترۆمبێلان دشێن د بەرئێكرا بچن و تشتێ هێشتا خۆشتر، كو دەمەكی ئەو خۆشیا هەنێ ل بەر تێك دچوو، دەما من ڤیابا قەستا باژێرێ هەولێرێ بكەم، نە بتنێ تەسێن جاددێ و بەرتەنگییا جاددێ بوون، بەلكو ژ بێهنتەنگییا هندەك شوفێران، من چ خۆشی ژ وێ رێكێ نەددیت و ئەڤە ژبلی گەلەك شوفێر بەریكانێ و زیكزاكێ دكەن، هندەك ب سەر مرۆڤیدا دشكێنن و تا وی راددەی من هزردكر، ئەڤ شوفێرێن ڤان سەرپچییان دكەن، هەمی بێ تێشت یێ ژ مالێ دەركەفتین و دڤێن كولێن خوە ژ جاددێ و سەرپێچیێن ترافیكێ دەربێخن. لێ دگەل دانانا كامیرێن چاڤدێریێ یێن خال ب خال، هەمی تشتەك یێ بوویە فیت. یانكو دێ شێی ترۆمبێلا خوە ل وی سایدی هاژوی یێ تە بڤێت و چ ترۆمبێل ل پشت تە، نە عالیێ و نە هورێنێ بكارنائین. بوچی؟ ژبەركو چ شوفێر نەچار نینن، سزایەكێ مسوگەر بچیتە سەر ترۆمبێلا وان.

هەر ل سەر سوحبەتا كامیرێن چاڤدێریێ و حكومەتا بەروپشت! حەژێكەرێن داوەتێ دزانن بەروپشت یان كو چ، دەما داوەتا ملانێ دهێتەكرنێ، داوەتچی ملێن خوە ب هەردوو ئالیان د هەژینن و ناهێلن چ خۆشیەكا داوەتێ و ملهەژاندنێ ژوان بچیت، چ ژ سینگی ڤە بیت یان پشتێ و رێك كامیرێن چاڤدێریێ ژی هوسان دشێن ترۆمبێلا زێدەگاڤ بگرن و بەری نۆكە دەما ترۆمبێل ژ چاڤكێ كامیرێ دەرباز دبوو، شوفێری پێ خوە ل پانزینێ دگڤاشت، لێ نۆكە حكومەتێ ئەو زێدەگاڤی ژی یێن بربركرین و هەڤالێ من گوت ئێ حكومەتێ شولەپێ یە؟ من گوتێ، مانە دەمەكی دگوتن، حكومەت كێریشكا ب عەرەبانێ دگریت؟ گوتی بەلێ؟ من گوتێ و نوكە ب چ دگریت؟ هەڤالێ من ب كەنیڤە گوت، كێریشك بخوە دهێتە د عەرەبانێ دا و ئەڤە ژوێ رۆژێ وەرە، چەند هەڤالێ من چاڤ بمن دكەڤن، ب حكومەتا بەروپشت دكەتە كەنی.

ـــــــــــــــــــــــــــــــــــ

رۆژناما ئەڤرۆ ژمارە (3757) یا رۆژا 2/6/2025