چیرۆكا من و بەرچاڤكێ

عبدالرحمن بامەرنی

لڤان سالێن دووماهیێ، من هەستكر ئەگەر ئەز بەرچاڤكەكێ بدەمە بەرچاڤێن خوە دێ باشتر بیت، ئەڤە ژی پێنەڤێت ل سەر داخوازییا هەڤالەكێ من بوو. ئەڤ هەڤالێ من، دووراتییا چاڤێن وی یا باش نەبوو و من ژی ب یا وی كر، ژبەركو ئەوی كەرب ژ بەرچاڤكا من یا رەش ڤەدبوون، ئەوا ژبەر هەتاڤێ من ددا بەرچاڤێن خوە. من بەرێخوەدا ئێك ژ كلینیكێن دهوكێ و ئەز چوومە دەف نوژدارەكێ چاڤا، پشكنینەك بۆ چاڤێن من كر، نەڤیا بێژیتە من، چاڤێن تە پێدڤی بەرچاڤكێ نینن و ددەمەكیدا ئەز پاریەكێ باشم و ئەو یێ زمان خۆش، گوت ئەگەر تو بەرچاڤكەكێ بدەیە بەرچاڤێن خوە، وەك تو بەرێخوە بدەیە كچەكا مكیاجكری. پێنەڤێت ئەڤە زمانەكێ بازرگانیێیە و من ژی بۆ كەنییا وی گوتێ، یەعنی تا نوكە ئەز كچكان بێ مكیاج دبینم؟ ئەوی كەنییا خوە بەردا و من زانی (10) هزار دینار چوونە سەر بهایێ بەرچاڤكێ و دا كورت كەم، (65) هزار دینارێن رەق من كرنە ددەستێ ویدا و درێژناكەم رۆژەكێ ئەز یێ سیارێ دهاژووم و نزانم چاوان من دەستێ خوە برە چاڤێ خوە، كتەكا شیشێ بەرچاڤكێ پێڤەنە.

من ئەو هێلا و ئەز ل ئێكێ دی تشقلیم، ئەوی ژی رەنگەك ل بەر من شرینكر، شیشە و دەستكێن وێ ئاسن، یان دا ژ بەریكا من كەڤیت جامێ وێ شكێت یان دەستكێ وێ و ئەز بۆ وی بوومە مەعمیلەكێ هەیڤانە و تا خودانخێرەكی بەرێ من دایە دەف ئێكی، جام پلاستیك، دەستك پلاستیك، نەدشكێت و ئەز بەندكی ژی دئێخمێ و دستویێ خوەدا وەك ستڤانكی شوردكەم و لێ ئەڤە دووماهی نینە، دەما هندەك دكاندار من دبینن بڤێ بەرچاڤكا (شكل ماقیل)، ئەز دزانم سەرباركەكی دهاڤێژنە سەر بهایێ تشتی و لێ ئەز ناڤەشێرم ژلایەكێ دیڤە، ئەڤ بەرچاڤكە گەلەك هاری مندكەت، دەما دچمە رێڤەبەریەكێ، سەرەدەریەكا جوانتر دگەل من دهێتە كرنێ، خوە ل دكانێن محەلێ ژی، دەما ئەز بێ بەرچاڤك، هندەك دبێژن مام و لێ دەما بەرچاڤك ل بەر چاڤێن من و ئەو بەندك پێدا شور دبیت، هەر ئەوێن دبێژن مام، دبێژنە من سەیدا.

ــــــــــــــــــــ

رۆژناما ئەڤرو ژمارە (3681) یا رۆژا 22/10/2024