رەڤاندیێن ئێزدی دناڤبەرا دوو فەرماناندا

 عبدالرحمن بامەرنی

پشتی روودانێن داعشا تیرورتسی و ب سەرداگرتنا دەڤەرا شنگالێ و كوشتن و تالانكرن و برنا كچ و ژنان. تشتێ ھەرە بەرچاڤێ ئەز بخوە ڤە مژویل دكرم، چاوانیا باوەریبوونا كچ و ژنێن ئێزدی بوو، ئەڤێن خوە ژ دەستێ داعش رزگار دكرن و دھاتنە ناڤا جڤاكا ئێزدی ڤە! بێی ئەڤ كچ و ژنێن ھەنێ ھزربكەن، كو رەنگە د چاڤێن جڤاكێ ئێزدی دا شكەستی بن یان بەرێخوەدانا جڤاكێ ئێزدی ب چاڤەكێ كێماسی بیت و ئایا دێ ئەو ھێنە قەبوولكرن یان نە؟ د دەمەكیدا، رەنگە دەستدرێژی و كرین و فرۆشتن و ئاین گوھورین د دەرحەقی واندا ھاتبیە كرنێ.

ب شانازیڤە ئەڤ كچ و ژنێن ھەنێ ھاتنە قەبوولكرن و بەلكو پێشوازیەكا جوان لێ دھاتە كرنێ و نە بتنێ ئەڤە، بەلكو بەرێخوەدانەكا تایبەت بۆ ھەبوو و ئەو بەرێخوەدانە یا تژی رێزگرتن بوو، ژبەركو ئەڤە یێن بووینە قوربانیێن دەستێ تیرۆرستێ و ئەوان بەرخودان یا كری. ژ لایەكێڤە ئەڤا ھەنێ رەنگە دیتنا من بیت یان گەلەك كەسێن وەك من، ئەڤێن ھزردكەن كو ڤان كچ و ژنان چ گونەھا خوە نەبوویە و قوربانینە و تشتەكێ ل سەر وان ھاتیە سەپاندن و وان یا شیای خوە ژ ناڤ دەستێ دوژمنێ خوە رزگار بكەن. لێ دھەمان دەمدا، ئەڤە پرسیارە د سەرێ مندا دروست دبوو، ئەز وەك نە كەسەكێ ژ ئول ئێزدی، ئایا ئەگەر ئەڤ كەسێن ھەنێ ژ ئاینێ موسلمان بانە بۆ نموونە و ھەمان سیناریویا داعشا تیرۆرست ھاتبانە رەڤاندن، ل بازاران ھاتبنە فروشتن، دەستدرێژی و كێمكرن و سڤكاتی ددەرحەقی واندا ھاتبایە كرنێ، ئایا دا جڤاكێ مە وان وەرگریت یان نە؟ ئایا دا بەرێخوەدانا كومەلگەھی، دەرو جیرانان بۆ وان چاوان بیت؟ ئایا ئەو كچا رزگاربووی دا ژ لایێ كورەكێ بۆ زەواجێ یا مەقبوول بیت یان نە و دەھان پرسێن دی یێن بێ بەرسڤ و راستی بیت، ئەڤ وێرەكیا ڤان كچ و ژنێن ئێزدی و خوە ژ دەستێ ڤان تیرۆرستان رزگار بكەن و جارەكا دوبارە بزڤرنە ناڤ باوەشا كومەلگەھێ خوە بۆ من یا سەیر بوو، ئەو چاوان وان ئەڤ وێرەكییە دایە خوە و ئێدی ڤی بابەتی گرنگیا خوە لدەف من ھەبوو، ئەز بزانم ئەڤە چ عەقلیەتە بشێت ڤێ باوەریێ بۆ ڤان كچان و ژنان دروست بكەت، كو بەلێ ھین قوربانینە و ھین قوربانیێن دەستێ رەشن و زوری یا ل وە ھاتیە كرنێ و دەما ھین دزڤرن، مافێن وە نەھاتینە بن پێكرن و دێ ب رێزگرتن ڤە ھێنە قەبوولكرن.

ئەگەر یێ راستگو بم، ئەڤ پرسا د سەرێ مندا ما بێ بەرسڤ، ژبەركو ئێك ئەڤ كچێن رزگاربووی گەلەك ژێ د بچویك بوون و وان چاوان ئەو وێرەكی دا خوە و یا دوویێ ژی من ھەر دگوت دڤێت بەراھیەكا مێژووی بۆ ڤێ چەندێ ھەبیت، تاكو ئەز ل سەر فرمانا گوندێ باسا راوەستیام، كو بەری نوكە ب زێدەتر ژ 100 سالان ھەمان سیناریو ھەبوویە و نوكە ژی بەرمایێن رزگاربوویێن وێ كارەساتێ ل گوندێ كەلەبەدرێ نە ل نزیك كومەلگەھا شاریا و دەما فەرمان ب سەرێ وان ژی دا ھاتی، كچ و ژن و زارۆك ھاتینە رەڤاندن و (سمۆ باپیر) كو ئێك ژ رزگاربوویان بوو دڤیا بچیت وان كچ و ژنان رزگار بكەت، پرسیارا ھەرە مەزنا مەژیێ وی ئالوز دكر، ئایا ئەگەر وی ئەڤ كچ و ژنێن ھاتینە رەڤاندن ئازادكرن، ئایا دێ جڤاكێ ئێزدی وان وەرگریت یان نە؟ تا بریاردای قەستا دەف میری و بابە شێخی ل لالشا نورانی بكەت و وان گوتیێ، ئەگەر ب حەزا وان بیت و وان ڤیا ب زڤرین، دێ ھێنە قەبوولكرن و ئەو ژ ئێزدیان ژی ئیزدی ترن و تا وی راددەی دەما ئێكەم ژن ل وی سەردەمێ ھاتیە رزگاكرنێ، ل لالشێ، بابەشێخی دەف و شباب فرێكرنە بەراھیا وان و پێشوازیەكا جوان لێھاتە كرنێ و ئەڤ بریارا دروستا میری و بابە شێخی، بۆ ئەگەرەك كو ئەڤرو د كارەساتا شنگالێ دا و دەما داعشان ب سەر دەڤەرێن ئێزدیاندا گرتی، دەھان و سەدان ژن ھەەولێن رەڤینێ بدەن و خوە ژ ناڤ دەستێن ڤان تیرۆرستان رزگار بكەن، ژبەركو پێش وەخت ڤانە دزانین كومەلگەھێ ئێزدی دێ ڤان قوبلوولكەت و دچاڤێن واندا شكەستی نامینن، ھەر چەند د روودانێ چیرۆكا رزگاركرنا رەڤاندیێن گوندێ باسا دا چ بەراھیێن بڤی رەنگی نەبوون كو ئەو باوەری بۆ كچ و ژنێن رەڤاندی دروست ببیت، كو د چاڤێن جڤاكێ ئێزدی دێ وان قەبوولكەت و ژبەر ڤێ ئەگەرێ ژی و نەبوونا باوەرییا پێش وەخت، دوو كچێن ئێزدی ل وی سەردەمی نەوێریا ڤەگەرنە ناڤ كەس و كارێن خوە، نەوێریان ڤەگەرن ناڤ جڤاكێ ئێزدی، ژ ترسا كو خوە ئەگەر ئەو بھێنە قەبوولكرن ژی، رەنگە د چاڤێن خەلكی دا شكەستی بن.

ئەڤ پێنگاڤا كەسێن ئاینی یێن ئێزدی داین، بھزرا من، پێنگاڤەكا وێرەكانە و یا ھەری دروست بوویە، تایبەت بۆ كومەلگەھەكی كو گەلەك بكەڤیتە بەر ھپرشان و گەفێن ئاینی ل سەر بن.

ــــــــــــــــــــــــ

گوڤارا مەحفەل ژمارە (29) یا سالا 2024ێ.