عبدالرحمن بامەرنی
باوەری ب ئەنجامێن ھەلبژارتنان، مەزنترین كوسپەیە ل بەرامبەری لایەنێن ھەڤرك و دەنگدەری بخوە ژی. رەنگە ئەڤا ئەز ژێ بەحسدكەم، زێدەتر بۆ كومەلگەھێ مەیێ كوردی بیت و تایبەت ژی ل ھەرێما كوردستانێ و گومانا ھاولاتییا یا بەردەوام، ل سەر پاقژییا رێڤەچوونا ڤێ پرۆسێ بخوە و دەما ئەنجام بدلێ وی دەرنەكەڤن. دێ بینی گەلەك ھاولاتییان ترس و گومانا ھەی، یاری ب دەنگێن وان بھێتەكرنێ یان دەنگێن وان بھێنە دزین و نەھێنە ھژمارتنێ یان سندوق ب دەنگێن ساختە بھێتە تژیكرنێ یان كرین و فرۆشتن ب دەنگان بھێتەكرنێ و چەندین ترس و گومانێن دی، كو وی پاشگەز بكەن، ئێك باوەری ب ئەنجامێن دەنگان نەھێت و دوو، پێشوەخت بریارا خوە بدەت نەچیتە دەنگدانێ! سەرەرای ڤان ھەمی ترس و دوودلی و گومانان، دڤیابا ئەو یێ گەشبینتر بیت بۆ چوونا دەنگدانێ و دەنگێ خوە ب ئازادانە بدەت، ژبەركو ئەڤ گەرا ھەلبژاتنان، گەلەك جوداترە ژ یێن دەرباز بووی و ئەڤە ژ گەلەك روویانڤە ھاریكارە، كو د بەرژەوەندییا دەنگدەری بخوەدا بیت، ژروویێ بەلانسا سیاسیڤە دێ گوھورین ھەبن، شوینا ئێك بازنەیێ ھەلبژارتنان، نوكە ھەرێما كوردستانێ ل سەر چوار بازنەییان ھاتییە دابەشكرن و ئەڤ دابەشكرنە ژی ژ گەلەك روویانڤە باشە، ژ روویێ دەستنیشانكرنا بەربژێری، قەوارێ سیاسی ل بەربژێرێ گونجای بگەریت كو باوەرییا خەلكی بدەستڤەبینیت. ژ روویێ خزمەتكرنێ ڤە، قەوارەیێن سیاسی پێگیردكەت بەرنامێ خوە دارێژیت كو خۆشگوزەرانیێ بۆ ھاولاتی دروست بكەت و وەك دەنگدەرێ ھشیار ژی، راستی مە پەرلەمانەكێ بھێز دڤێت، خوە ل كێشەییێن سیاسی بكەتە خودان. وەك ئەم دبینین، كێشێن ھلاویستی یێن چووینە د قوناغەكا نویدا، چ دگەل حكومەتا مەركەزی بن یان ژی دگەل وەلاتێن ھەرێمی بن و كی بەرپرسە ژ بەرسینگرتنا ڤان كێشەییان؟ پێنەڤێت، بەشەكێ وێ یێ گرنگ دەنگدەر بخوەیە و دڤێت وی ئەو باوەری ھەبیت، دەنگێ وی دێ گوھورانكاریێن سیاسی، بەلانسا سیاسی دروست كەت و دڤێت دەنگدەر نەكەڤیتە بەر سوزێن نەبەرئاقلێن قەوارەیێن سیاسی و نەژی بكەڤیتە بەر سوزدارییا عەشیرەتێ و بنەمالێ و چەند ئەو دەنگێ خوە بدەتە بەرنامەیێن باش و قەوارەیێ سیاسییێ باش، ئەو یێ ئایندەكێ باش گەرەنتی دكەت.
ــــــــــــــــــــــــــــــــ
كوردستانی نوێی بادینان ژمارە (5)
ليست هناك تعليقات:
إرسال تعليق