عبدالرحمن بامەرنی
ھێشتا ھینگێ گوند گوند بوون، دەولەت ژی وەكی نۆكە نەبوون بشێن خزمەتگوزارییان بگەھیننە ھەمی گوندان و ژبەر پێدڤییا گوندییان ب بابەتێن ئاینی و تایبەت ژی كورد ئایندارن و پێدڤییا وان ب مەزگەفتێ و مەلایی ھەبوو. بوویە ل ھەر گوندەكی بۆ خوە مەلایەك پەیدا دكر، مەزاختیێ مەلایی ژلایێ گوندییانڤە دھاتەدان و ئەڤە تا دەستپێكا سەد سالییا بۆری ژی ھەر ھۆسا ھەبوو! دا بھێمە سەر بابەتێ من مەبەست پێ. ل گوندەكێ مەلا و ئاغایێ گوندی رێكەفتنێ دكەن، سالێ ھەمیێ ئەڤ مەلایە ل گوندی بمینیت، بەرامبەری كۆژمەكێ پارەی و ل رۆژەكێ داوەتا كورێ ئاغایی بوو،
ئاغای دەستەكێ دھۆل و زرنایان ئینابوو سەر داوەتا كورێ خوە و بتنێ شاباشێن د بەر سەرێ زرنابێژیرا كرین، دگەھشتنە وی كۆژمێ پارەی، ئەڤێ بۆ سالێ ھەمیێ دا مەلا وەرگریت. ئینا مەلا چوو دەف ئاغایی، گوتێ: ئەز ب زانینا خوە و ئایندارییا خوە، یێ ھەمی رێكێن باش نیشا گوندییان ددەم و مەلاتیێ ل گوندی دكەم و ئێك رۆژا زرنابێژی، ب قەد ئێك سالا من بەرامبەری ئێك دەرچوو. ئەو سوحبەت ل جھێ خوە و دا ل گوتنێن نڤیسەرەكی بزڤرین، (د. موستەفا مەحمود) د پەرتووكا خوە یا ب ناڤێ (خالا كەلینێ)دا دبێژیت: "ئەڤە حالێ دنیایێ خرەكێ یە و ھەر ژ بەری پێنج ھزار سالان ھۆسانە. سەماكەرەك پارەی زێدەتر ژ نڤیسەرەكێ وەردگریت و ئەڤێ بۆ تمبلكێ لێددەت، زێدەتر ژ نانپێژی و دارتاشی و ئاسنگەری وەردگریت و ئەگەر ئەم ئەڤرو (ئەنشتاین)ی داخواز بكەینە سمینارەكا زانستی و دیسان ژنەكا نیڤ رووت بۆ كارەكێ رۆژنامەڤانی، دێ جەماوەر ئەنشتاینی بجھـ ھێلن و ب ھزاران كەس دێ ل دوورێن وێ ژنا نیڤ رووت بەرھەڤ بن و ئەڤە ژی نە گونەھا مەیە، بەلكو پرانیا خەلكی د نەزانن، خویێن كەیفێ نە و كویلێن حەزێن خوەنە و بوویە ئەوان پشتەڤانیا بابەتێن چننە پێ باشترە ژ بابەتێن رژد!ـــــــــــــــــــــــــــــ
رۆژناما ئه‌ڤرۆ 3589- 2024/ 09/09
ليست هناك تعليقات:
إرسال تعليق