عبدالرحمن بامەرنی
ھەلبژاردن ب پرۆسەكا دیموكراسی دھێنە زانین و لھەمی وەلاتان تایبەت ئەڤ وەلاتێن پێشكەفتی و ئەڤێن گرنگیێ بمافێ مرۆڤی ددەن، ھەلبژاردنان دكەنە بنەمایەك بۆ رادەستكرنا دەستھەلاتێ، چ ل سەر ئاستێ تاكی بیت یان حزبێ و ئەڤا من دڤێت دڤێ گوتارێدا بەحس بكەم، ئایا مە شییا چ ئەزموون ژڤێ گەرا ھەلبژاردنێن پەرلەمانێ كوردستانێ وەربگرین یێن 2024ێ؟ ئەز بەحسا قوناغا پشتی دەنگدانێ ناكەم و چ حزبەكێ دەنگێن خوە كێمكرن یان زێدەكرن و كیژ كاندید شییا دەنگێن پێدڤی بۆ خوە بینیت، لێ ئەز دێ بەحسا بەرنامەیێ حزبان كەم، بەرنامەیێ كاندیدان. مە ھەمیان دیت چ شلەژان كەفتبوو ناڤ جاددێ، حزبان ب سەرۆكێن خوەڤە خۆ بەردابوونە ناڤ جەماوەرێ خوە و دا بشێن باوەرییا وان بدەستڤەبینن و دەنگێن خوە زێدەبكەن، ئەو تشت دگوتن یێن خەلكی پێدڤی پێھەی، چ خۆشگوزەرانی بیت یان خۆشكرنا ژیانا وان و ئایندێ وان و نەھێلانا كەموكۆرتیان و ژخوە بەربژێران ژی، سەرەدانێن خوە چر كربوون، كەسێن سلاڤەك ژی دگەل ھەیی، خوە دگەھاندنێ و سەرەخۆشی لئێك دكرن و مرۆڤایەتییا خوە دوپاتدكرن. لڤێرە چ دگەھینیت، ھەم حزب و ھەم كاندید كەفتبوونە حالەتێ تەنگاڤیێ، ل تەنگاڤیییان ژی مرۆڤ پێدڤی ھەر كەسی دبیت، مرۆڤ قورتال ببیت چ ئەو قورتالبوونە رزگاربوونا مرۆڤی بیت ژ روودانەكێ یان گەھشتنا مرۆڤی بیت بۆ پلەو پوستەكی و حزبێن مە و بەربژێران ژی ئەڤە كر، برەنگەكی و دوویان دەستێ خوە ل بەر دەنگدەری درێژكرن كو وان ژ ڤێ تەنگاسیێ رزگار بكەن، ھندەكان پارە بەخشین، ھندەكان جوامێرییا خوە ئینا پێش و مرۆڤكانێ و عەشیركانێ خورتكرن و لدویڤ رھـ و دیندەھاخوە چوون و ژخوە حزبان ھەر خزمەتا كری ئینانە بەرچاڤێ دەنگدەری و ھوسان، لێ ئەڤ ھەلبژاردنە و ئەڤ دەستێخوە درێژكرنا ل بەر دەنگدەری، بتنێ تشتەكی پیشانی مەددەت، ئێدی دەمھات ئەم چ وەك تاك چ حزب دەستان ژ ھندەك رەفتارێن خوە بەردەین و خوە شوربكەینە ناڤ خەلكی و دەستێ ھاریكاریێ بۆ وان درێژبكەین، دا ل رۆژەكا ھوسا ئەو ژی دەستێ خوە بۆ مە درێژ بكەن.
ــــــــــــــ
كوردستانی نوێی بادینان ژمارە 7
ليست هناك تعليقات:
إرسال تعليق