عبدالرحمن بامەرنی
ل بازاری من ھەڤالەكێ خوە دیت و پشتی كەیفخوشیێ، گوت: ئێدی ئەز تە ل ناڤ بەھیان ژی نابینم، مانێ داوەت ھەرچوون!. ھەڤالێ من راست دگوت، ژبەركو ل ناڤ بەھییان مرۆڤ ھەمیان دبینیت، مرۆڤ پرسیارا ساخی و سەلامەتییا ئێك دكەت و خوە ئەگەر ئەو دەرفەت دروست نەبیت، كو تێدا مرۆڤ لدەف ئێك روینیت و دەرفەتا ئاخفتنێ یا كێم ژی بیت، لێ مرۆڤ دشێت تشتەكی ژ رەوشا وی بزانیت، ژ تەندروستییا وی، دەما مرۆڤ ل سەروچاڤ و پریڤەچوون و راست راوەستیانا وی دنێریت. ژ حالخوشییا وی، كا چ جلوبەرگ ل بەرن و كا چەند كەس بخێرھاتنێ دگەل دكەن. ھەر چەندە ل ناڤ داوەتان تشتەكێ جودا بوو، ئەگەر كەسەكی بەرگیز نەبانە ژی، دشییا ب (20) ھزار دیناران بەژنا خوە ب جوانترین شەل و شەپك ب خەملینیت و ئەڤە بۆ ژنان ژی ھوسا، لێ دگەل حالخۆشبوونا خەلكی، دگەل نەمانا نەختی، ئێدی سەر سوبەحی ژی كێم بوون و ئەگەر كەسەك داوەتەكێ بكەت ژی، ئەو داوەت ژ چوارچوڤێ خێزانێ یان كەس و كارێن نزیك دەرباز نابیت.
دا بھێمە سەر سوحبەتا ھەڤالێ خوە و پیچەكێ بەحسا بەھییان بكەم، ھەر چەندە مە گوتنەك یا ھەی و من بخوە گەلەك باوەری ب وێ گوتنێ و راستی و دروستییا وێ ھەیە، یا دبێژیت (داوەت ب قەرن و بەھی د فەرن)، یانكو بۆ چوونا ناڤبەھیێ چ بەھانە بۆ نەڤێن و ئەڤە ئەركەكێ مرۆڤاتیێ و ھەڤالتیێ یە و تایبەت دڤێت مرۆڤ دخوشی و نەخوشیێن ئێكدا دگەل ئێك بیت. ل نەخۆشیان ژی زێدەتر، ژبەركو خودانێ بەھیێ چاڤێ وی ل سەر ھەر كەسییە كانێ دێ بیتە بەشەك ژ خەمێن وی یان نە؟ لێ تشتێ من دڤێت ل سەر راوەستم لڤێرە، شێوازێ یان تیتالێن ھندەك بەھییانە و ئەڤە ژی ژ بەھیێن دەڤەرەكێ بۆ دەڤەرەكا دی جوداھی ھەیە، بۆ نموونە دێ قەستا ناڤ بەھیەكێ كەی، ھندی گوندیەكێ وان ھەی، دڤێت دناڤ بەھیێ دا بن و ئامادەبوویا وان ھەبیت. ڤێجا ئەو كەسە چەند نزیكی خودانێ مری بیت یان چەند یێ ژێ دویر بیت، ژبەركو ل گەلەك گوندان، چەندین مالبات تێدا ھەنە و ھەر مالباتەك ژ دەڤەرەكێ و ژ عەشیرەتەكێ ھاتییە و ئەڤا ھەنێ ژی وەك من تێبینی كری، گەلەك جاران ئامادەبوونا وان ژ بەر ئێك و دا كەس بەحسا وان نەكەت بوویە. دا لڤێرە پیچەكەێ راوەستین! راستە ھەڤخەمی یا جوانە، چوونا ناڤ بەھیێ ئەركە و وەك من گوتی چ بەھانە بۆ نەڤێن، لێ لدویڤ نزیكییا نیاسینێ ھندەك تا دووماھیێ لناڤ بەھیێ بمینن و ھندەكێن دی ژی قەستا سەر كارێن خوە بكەن، ژبەركو گەلەك كەس ب ھندەك ئەركان ڤە د گرێدایینە كو بەرژەوەندیێن ھندەكێن دی ب وی كەسیڤە ھەنە، نەك یێن وی بتنێ و تشتێ گەلەك جاران من گوھلێبووی، ھندەك دبێژن (بابۆ بەھییا وان گەلەكا ب قەرەبالغ بوو)، لێ ل ڤێرە پرسیار، ئایا ئەگەر د بەھیەكێ دا بەھیچن دكێم بن، ئەو مرۆڤە مەبەستا من ئەو كەسێ مری، كەسەكێ باش نەبوو؟ باشی ب مەبەستا، ئایا خەلكی حەژ وی كەسی نەدكر و خرابیێن وی زێدەتر بوون. پێنەڤێت نەخێر، ژبەركو ئەڤە تیتالەكە چ باش چ خراب بتنێ ب ھندەك دەڤەران ڤە گرێداییە و ئەز ڤێ داردێ رەد ناكەم و ئەز وی مافی ژی نادەمە خوە، ژبەركو رەنگە پەیوەندیێن مرۆڤایەتیێ ژی زێدە و موكم بكەت و ھەر چنەبیت وەك ھەڤالێ من گوتی، ل ناڤ بەھییان ئەم ئێك دبینین و پرسیارا ساخی و سەلامەتییا ئێك دكەین و لدویڤ گوتنا وی، ئەگەر ئەم چووین و مانا مە دناڤ بەھیێ دا ژ چارێكا دەمژمێرێ دەرباز نەبوو، ھینگێ ئەم نەشێین ئێك و دوو ببینین و لێ ئەگەر پرسیارێ ژمن بكەی، كێشك باشترە، گوندی ھەمی ب كەسێن (نزیك و دویر)ڤە تا دەرگەھـ داخستنێ لناڤ بەھیێ بمینن یان بتنێ كەسێن نزیك و لێزم بمینن؟ ئەز دێ بێژم یا دوویێ باشترە.
ـــــــــــــــــــــ
رۆژناما ئەڤرو ژمارە (3597) یا رۆژا 22/9/2024
ليست هناك تعليقات:
إرسال تعليق