دگەل سایدێن ڤەكری

عبدالرحمن بامەرنی

دەما ئەز شوفێریێ دكەم، تشتێ ژ هەمیێ بۆ من نەخوشتر، دەما ل ترافیكێن ڤەكری كەسەك سەرێ ترۆمبێلا خوە دئینتە دناڤ (رێزێ)را و ئەگەر تو رێكێ نەدەیێ ژی، یان دڤێت هورێنەكێ بۆ لێدەیی یان ژی ترۆمبێلێن وە دگەل ئێك قوچانێ بكەن. ئەز ل وە ناڤەشێرم بەری چەند سالەكان من (بی ئێم)ەك هەبوو و هندەك جاران سەرێ من ژی گەرم دبوو و من نەدهێلا كەسەك رێزێ ببریت، هەر چنەبیت خەلكەك فێری رێزگرتنێ بیت و راستی ژی بیت، ئاسنێ (بی ئێم)ێ چەند جاركی بەرامبەری خوە و ترۆمبێلێن نوكەیە. لێ نوكە ترۆمبێلا من هێزا قوچانێ نەمایە و ئەز بەندكی لدویڤ شوفێرێن هوسا بەرددەم، چ دلێ من ب ترۆمبێلا منڤە بیت یان سەرێ خوە نەكەمە دناڤ چ ئاریشاندا و دا بەحسا خوە و دوو شوفێرێن دی بكەم، ئەگەر من ناڤبژیڤانی بۆ نەكربایە، دا چاما ب سەرێ ئێك و دوو ئینین و سوحبەت هوسا بوو. ترافیك یا سور بوو و سایدەكی ڤەكری هەبوو و چەند ترۆمبێل ل بەری من بوون و ئێكی سەرێ ترۆمبێلا خوە كێشا ترۆمبێلا ل بەر سینگا من و دڤییا رێزێ قەد بكەت و ژوی و ژ یێ دی، هەردوو مانە ئاسێ و دەنگێ هورێنا بلند بوو و گەف و ئاخفتنێن وان و قەبەیێن وان، هەردووكان ترۆمبێلێن خوە دان ئالییێ جاددێ و من زانی بابەت دێ خەلەت بیت، من ژی بەرێ ترۆمبێلا خوە دا ئالیەكی و ئەز لدویڤ وان هاتمە خارێ، دەستپێكا قەرقەشا وان، كا كێ ب سەر كێدا شكاندییە و هێشتا بابەت نەگەهشتییە دەستێ خوە لئێك بلندكرنێ، من گوتێ كا راوەستن، من گوتە ئێكی ژوان، ئەرێ تو ڤی دنیاسی؟ گوت نە. من گوتە یێ دی، ئەرێ تو ڤی دنیاسی؟ گوت نە. من گوتێ مادەم هین ئێك ناسناكەن، یانكو چ خوینداری و تولۆبەدەلانێ دناڤبەرا وەدا نینە، خەلەت تێگەهشتنە و هەر ئێك ژمە دا ل ترۆمبێلا خوە سیار بیت، جامێرا ل ترۆمبێلێن خو سیار بوون و بابەت بدووماهی هات.

ـــــــــــــــــــــــــــــــ

رۆژناما ئه‌ڤرۆ 3631- 2024/ 10/11