عبدالرحمن بامەرنی
ئەز كوردان هند د هەڤكێشەیا وەلاتێن دەوروبەردا نابینم، هندی د هەڤكێشەییا تێگەهشتنێ و راڤەكرنێدا. ئەو تێگەهشتن و راڤەكرنا ئەز ژێ بەحس دكەم، گرێدایی تێگەهشتن و راڤەكرنا زهنیەتا سیاسیێ كوردە، د ئیدارەدانا پرسێن گرنگ و چارەنڤیسدا.
بۆچی من گوتی د زهنیەتا سیاسیێ كورددا و من نەگوت د زهنیەتا هزركرنا تاكێ كورددا؟ ژبەركو تاكێ كورد هەردەم خودانێ دوزا خوەیە و هشیاریا نەتەوەیی لدەف وی خورتترە ژ هەر تشتەكی و ئەز دێ ڤێ ب نموونە بێژم و نموونا خوە كورتكەمە سەر باشوورێ كوردستانێ، مەبەستا من هەرێما كوردستانێ و ڤان پێشهاتێن داوییێ ل رۆژئاڤایێ كوردستانێ. دەما بابەتێ رۆژئاڤایێ كوردستانێ گەرمبوویی، عەشیرەتێن عەرەب خوە ژ ناڤ هەسەدێ ڤەكێشایین و تا راددەیەكی ئەمریكا پشت ل كوردان كری، هۆڤاتیا سوپایێ سوریا، تەكبیر و ب ناڤتێدانا خودێ یا سەربازێن سوری، كو گەلەك ژێ خودان رەگەزنامێن وەلاتێن دی بوون.
رهێن وان سەروچاڤێن داعشان دئینانە بەرچاڤ، ئەڤ داعشێن ل سالا 2014ێ ب سەر شنگالێ دا گرتین و ئەو ئینایە سەرێ كوردان یا ئینایی. د بەرامبەردا كورد، ئەگەر ژ هەمی نەتەوەیەكی زێدەتر گرێدایی بنەمایێن ئیسلامێ نەبن چ ژ وان كێمتر نینن، ئێدی تاكێ كورد تێگەهشت كو ئەڤا رووددەت تشتەكێ نە دروستە و نە رەوایە و ب هیچ رەنگەكی نە بەرامبەری ئێكە. وەك كارڤەدان، مەلایان و زانایێن ئاینی و ل سەر مینبەران، دەنگێ ئێكگرتنا كورد و بەرخودانێ كرنە بابەتێن گوتارێن خوە، ئەو زوی تێگەهشتن، كو نابیت ئەو ب ناڤێ ئایینی بهێنە خاپاندن و نە بتنێ ئەڤە، مە چەند نموونە دیتن كو چەند مەلا ل سەر مینبەرێ ئیناندنە خارێ، ئەڤێن دڤییان بابەتی ب رێدا ببەن و تا سكالا ژی ل سەر هاتنە توماركرنێ و هندەك ژ گوتارخواندنێ ژی هاتنە دویركرن و ئەڤە ژبلی خوپیشاندانێن سەرتاسەری، وەك پشتەڤانی بۆ بەرخودانا رۆژئاڤا و ئەڤە ژبلی دهانا چوونا خەلكێ رۆژئاڤادا و كۆمڤەكرنا كەلوپەلێن پێدڤی و گەهاندنا هاریكاریان.
ل ڤێرە هشیاریا تاكێ كورد هەر زوی دیار بوو و تێگەهشت، كانێ ئەو ل بەرامبەری كێییە. لێ یا تا ڤێگاڤێ كورد تێنەگەهشتین، زهنیەتا عەقلێ سیاسیێ كوردە و ئەز بتنێ بەحسا ئێكرێزیا ناڤمالا كوردی ناكەم، كو رەنگە ئەو ژی فاكتەرەكێ بهێز بیت بۆ سەرخستنا هەر داخوازیەكێ، لێ مە بڤێت و نەڤێت، نموونا هەر پارچەیەكێ رەنگڤەدانا ل سەر پارچا دی هەیی.
ژڤی دەرهاڤێژەیی ژی، دڤێت ئێدی زهنیەتا سیاسیێ كورد زێدەتر، زهنیەتەكا واقعیانە بیت، خواندنێن هەمەلایەنە بن بۆ هەر پێشهاتەكێ و ژڤی روانگەی كێشێن خوە ب هەلسەنگینن، ئەو ژی (دێ چەندێ ب دەستڤە بەردەن و دێ چەندێ ب دەستڤەئینن). دبیت ئەڤە خواندنا من بیت، لێ كورد، مەبەستا من زهنیەتا عەقلێ سیاسیێ كورد راڤەكرنا وان بۆ پێشهاتەیان دڤێ هەڤكێشەییێ نەگەهشتییە و نەشیاییە خواندنێن جیهانی و دویربینانە بدەتێ، هندی خواندنێن هەرێمی و كورتبینانە ددەتێ و نموونە ژی هەم ل باشوری و رۆژئاڤایێ كوردستانێ دا دەستكەفتێن مە كوردان زێدەتربن ژ ئەڤا هەیی.
ــــــــــــــــــــــــــــــــــــ
رۆژناما كوردستانی نوێ ژمارە (9593) یا رۆژا (2026/2/3)
ليست هناك تعليقات:
إرسال تعليق