عبدالرحمن بامەرنی
مەبەستا من ب دەستەواژەیێ ئێكهەلویستیێ، دەما پرسا ھشیاریا نەتەوەیی ب سەر هەر پرسەكا دی دكەڤیت، مە چاوان دیت ل بەرخوەدانا شەرڤانێن رۆژئاڤا و برینا كەزیێن شەرڤانەكا كورد ژ لایێ چەكدارەكێ سوپایێ سوریا ڤە، هەوەكا ڤەھاندنا كەزیان لدەف ژنێن كورد درۆستبوو و ڤێ هەوێ چ سنوور نەھێلان، كچ و ژنێن كورد، ملێ خوەدا بەر و هەمیان كەزی ڤەھاندن، هەمی تەخێن جڤاكی پشتەڤانیا خوە بۆ دیاركرن و كەسێ نەگوت، ئەڤە نە ژ باژێرێ منە، كەسێ نەگوت ئەڤە نە ژ حزبا منە، ژ خوە ئەوێن دژی سەركولیا ژنان و ب ناڤێ ئایینی دبێژن دڤێت ژن یا سەرپۆش كری بیت ژی، خوە بێدەنگ كرن، ژبەركو قەبارەیێ بابەتی ژ وێ چەندێ مەزنتر لێهات، ئەو بشێن رەخنەیێن خوە دەربێخن و خوە نەرازی بكەن، پرس بۆ پرسەكا نەتەوەیی و ئها یا من دڤێت دڤێ گوتارێدا بێژم ئەڤ پرسەیە، پرسا ئێكهەلویستیێ و كەنگی ئەڤ ئێكهەلویستیە دیاردبیت و كینە مفادارێن ژ بەرئێكبرنا كودەنگییێ ل سەر هەر بابەتەكی؟!
ئەگەر ڤێ بەراوردیێ بكەین و بێژین، كەنگی ئەڤ ئێكهەلویستییە دروست دبیت؟ ئەم دشێین نموونا بەری سەرھلدانێ وەربگرین، ھزركرنا خەلكی هەمی ب ئێك تاڤە دچوو، ژبەركو ئێك دوژمن هەبوو و ئەو دوژمنێ تەخەكا دەستنیشانكرییا تایبەت نەبوو، بەلكو یا هەر كەسێ كورد بوو، چ ئەڤێن كەسوكارێن وان ل ناڤ پێشمەرگەی چ ئەڤێن دەست دگەل حكومەتا رۆخایا وی سەردەمی هەی و چ ژی ئەڤێن بتنێ كاروكەسپێن خوە دكرن و مایێ خوە د چ دا نەدكر، ژبەركو كەسەك ژ دەستدرێژیان قورتال نەدبوو و هەمیان بارا خوە تێدا هەبوو و ئەنجام، ئەڤ ئێكهەلویستی یە بۆ ئەگەرەك كو هەر كەسەك ملێ خوە بدەتە بەر سەرھلدانێ و چەتە و موستەشاران ب چەكێ خوە، خەلكێ ئاسایی نەگوت ئەم بێ چەكین و ژنان نەگوت ئەم ژنین و خوە ئەڤێن دەست دگەل رژێما بەعس ژی هەی، رەفیقان و حزبیان ژی خوە بێدەنگكرن، ژبەركو قەبارەییێ ڤێ ئێكهەلویسیتێ وەكی لەھیەكێ بوو و دشیا هەر تشتی دگەل خوە رامالیت.
كینە مفادارێن ژ بەرئێكچوونێ یان ئەگەر بێژین، بوچی هەردەم ئەڤ ئێكهەلویستیە دروست نابیت؟ رەنگە گەلەك ئەگەر هەبن، ژوان هەڤركیا حزبی ئەگەرەكێ سەرەكی بیت و ژڤێ هەڤركییێ چەندین تشتێن دی دەردكەڤن، وەك گوتارا ئایینی، گوتارا مرۆڤكانێ و گوتارا بنەمالێ و عەشیرەتێ و ئەڤ هەمی گوتارێن هەنێ ژی ب رەنگەكی و دووان كارتێكرنێ ل سەر ژبەرئێكبرنا گوتارا ئێكدەنگییا كوردان دكەن، بەرامبەر دەستكەفتێن مللەتی و پاراستن و بەرگریكرن ژ ماف و بەرژەوەندیێن كوردان و ئەگەر مە بڤێت ئێكهەلویسیتا مە كوردان ل هەر چار پارچێن كوردستانێ یا پاراستی بیت، دڤێت ل سەر وان خالان راوەستین، یێن دەرزێ د ئێخنە سەر ڤێ ئێكرێزیێ و ب هەر چ ناڤەكێ بیت و كییێ مفادار بیت، دڤێت بێژینێ (ستووپ) و ئەگەر پێدڤی بكەت، دڤێت هەلویستێن توند ژی بەرامبەر بهێنە وەرگرتنێ.
ــــــــــــــــــــــــــــــــــــــــــــــــ
ـ رۆژناما كوردستانی نوێی ھژمار (9590) یا رۆژا 2026-01-29
ليست هناك تعليقات:
إرسال تعليق