عەبدولڕەحمان بامەڕنی
مەبەستا من ب دەستەواژەیێ هێزا (نەرم)، تورێن كومەلایەتی و دەستەواژەیێ (سەرهەڤسار) ب مەبەستا (سەربەردایی، كیڤی، شەمبۆز، زیانكەر). بۆچی من ئەڤ هەردوو دەستەواژەیە پێكڤە ئینان؟ ژبەركو كارلێكا وان دگەل ئێك، زیانێ دگەهینتە تاكێن كومەلگەهی هەمیێ، چ زارۆك بن، گەنج بن، ژن بن، زەلام بن یان كەسێن پیر، هەروەسا كەسێن زانا و نەزان ژی.
ژبەركو بابەتێ هێزا نەرم گەلەك چەقان ب خوەڤە دگریت، ئەز بتنێ دێ ل سەر تورێن كومەلایەتی راوەستم و تشتێ دگەل تورێن كومەلایەتی و هەمی ئێك دەنگ، تورێن كومەلایەتی ب زیانبەخش دزانن بۆ سەر كومەلگەهی هەمیێ بێ جوداهییا تەمەنی یان رەگەزی و زیانێن وێ ژی كورتبنە سەر ڤان بابەتان، ئەو ژی (مرۆڤایەتی و سەرەدان و پەیوەندیێن جڤاكی یێن كێمكرین، دابونەریت یێن بەزاندین، شیرازێ خێزانێ یێ تێكدایی، گەلەك تشتێن خەلكی ب شەرم دزانین ئەڤرو یێن دبنە تشتەكێ ئاسایی، رێژا جودابوونا هەڤژینان ژ ئێك و چەندین بابەتێن دی). تا وی راددەی هندەك بۆ دچن، كو ئەڤ تورێن كومەلایەتیێن هەنێ، لێدانە ل ئایینی و تایبەت بۆ وەلاتێن موسلمان هاتینە دروستكرن و هندەكێن دی بۆ دوپاتكرنا دیتنێن خوە بڤی رەنگی بابەتی لێكددەن، كو مەبەست ژ دروستكرنا ڤان پلاتفۆرمان، بۆ بابەتێن هەوالگیری و كۆمڤەكرنا داتا و زانیاریانە ل سەر وەلاتێن دی و تا دووماهیێ. لێ پرسیارا لڤێرە ئەڤەیە، ئەم وەك كومەلگەهێ كوردی ژ هەڤێ هەڤكێشەیێ ل كیڤەینە؟ بۆ بەرسڤدانەكا پرسیارەكا ژڤی رەنگی، دڤێت ئەم بزانین ئەم وەك كومەلگەهێ كوردی ل چ ئاستین ژڤێ هەڤكێشەییێ، رێژا گرنگیا مە د چ دایە و ئایا دێ چ مفا، ژ مە هێتە وەرگرتن، ئەگەر هات و داتایێن مە بكەڤنە ناڤ دەستێن وەلاتێن دی، ئەڤێن داتا و زانیاریان ل سەر وەلات و كومەلگەهێن دی خرڤە دكەن؟
ژ ئەڤا ل سەری، مە دوو رێك هەنە ئەم بگرینە بەر، یان ئەم خوە ژڤێ جیهانا نوی داببرین، نەهێلین هیچ پلاتفۆرمەك بمینیت یان ژی تورێن كومەلایەتی (هەڤسار) بكەین، هەڤسار ژی ب مەبەستا ئەڤ پلاتفۆرمێن هەنێ چ دیكە (سەربەردایی، كیڤی، شەمبۆز، زیانكەر) نەمینن و كونترۆلا وان بكەڤیتە ناڤ دەستێن مە. هەرچەندە ئەڤە پێنگاڤەكا ب ئاسانی نینە، لێ شوینا ئەو مە بێخیتە د خزمەتا خوەدا، ئەم وێ بێخینە د خزمەتا خوەدا و چ مە بڤێت یان مە نەڤێت، جیهان یا هاتیە گوهورین، پێشكەفتنێن جیهانێ وەكی لەهیەكێ ب سەر جیهانێ هەمیێدا دگرن، بێ جوداهی و دا كو ئەم بشێین شوونا زیانێ ژ وێ لەهیێ، مفایی ژێ وەربگرین، دڤێت ئەم دڤێ هێزا نەرم بگەهین و شرۆڤەیێن زێدەتر بدەینێ.
ئەم كورد كومەلگەهەكێ ئاژەلداری بووینە، ئەڤ گوتنا هەنێ نە یا نوكە یە و هێشتا عەقلیەتا وێ درێژەپێدان هەیە. سەرەرای ئەم نوكە دناڤ باژێراندا دژین و مە زانكۆ و سازی و دامودەزگەهـ هەنە، لێ هێشتا پێیەكێ مە ل عەقلیەتا ئاژەلداریێ یە و مە ئەو وێرەكی نەدایە خوە، ئەم خوە دگەل باژێری ب گونجینین. هەر بەلگە ژی بۆ گوتنا من، تێگەهشتنا مەیە بۆ چارەسەركرنا كێشان ب رێكا عەشیرەتێ و حەزا (مەیلا) مە بۆ هەبوونا كومەلگەهەكێ داخستی ژڤێ پەرەللایا هەیی.
بوویە ئەگەر زیانێن ڤێ هێزا نەرم ل سەر مە هەبن، كو من بابەتێ تورێن كومەلایەتی وەرگرتیە، دڤێت ئەم ب ئاسایی ببینین و ئەڤ كۆما پێزانینێن نوی، پێزانینێن سەیروسەمەرە و ئەڤێن هەنێ هەمی بوومە تشتێن نوینە، بوویە چاڤێن مە دچنێ و ژبەركو مە نەبووینە یان ل مە قەدەغە بووینە حەزا مە دچیتێ و ژبەركو ئەم دوودلین ژ هەلبژارتنێن خوە، ئەم لدویڤ ریكلامێ دچین نە جوری و دەهان نموونێن دی و دڤێت ب تشتەكێ ئاسایی وەربگرین، خوە ئەگەر زیانێن وێ ژی هەبن و لێ بۆ عەقلیەتا مە یا كوردی، ئەگەر بەراوردیێ ژ زیان و مفا وەرگرتنێ بكەین، دێ بۆ مە زیانێن وێ زێدەتر بن، دێ پرسا مە یا نەتەوەیی گەهینتە جڤاكێ نێڤدەولەتی و (نموونا كەزیێ) گەلەك یا جوان بوو و یا ژ هەمیێ گرنگتر، دێ ژ عەقلیەتا داخستی بەرەڤ جیهانەكا ڤەكریتر دەركەڤین، ب مەرجەكی ئەگەر ئەم بشێین ڤان توران سەرهەڤسار بكەین، ئەگەر ئەو سەرهەڤساركرنا هەنێ یا رێژەیی ژی بیت.
ـــــــــــــــــــــــــــــــــــــــــــ
ـ رۆژناما كوردستانی نوێ ھژمار (9615) یا رۆژا 2026-03-05
ليست هناك تعليقات:
إرسال تعليق