عبدالرحمن بامەرنی
ھەر دەما كەفتە ناڤ نڤینێن خوە، ئێكەم تشتێ رێگرییێ ل خەوەكا خۆش دكەت، دەستێن وینە. ئەڤە رۆژا سەیدای گوتيیێ دەستێن تە وەك یێن ھەمیا نینن! ھەر شەڤ دەستەك دھێت و خەوێ ژ چاڤێن وی ڤەدرەڤینیت.
وێ شەڤێ دەستێن چایچییەكی بەلا خوە ژێڤەنەدكرن و ل دەك پەیالە رادكرن، پێنج پەیالە و شەش پەیالە و حەفت پەیالە و ھەمی ژی د تژی چا. گوتە خوە، ئەڤە ژی وەك نەخۆشیەكێ یە و ھەڤالەكێ وی بۆ پێشنیارا سەرەدانا نوژدارەكێ تایبەتمەند كر.
ئەرێ دڤێت نوژدارەك پشكنینا من بكەت، چ تیشكەكێ بۆ من بگریت یان پشكنینا خوینا من بكەت، چ زانم، ئەڤە كارێ وییە و یا ل سەر من ئەز بكەم، ددەمێ پێدڤیدا ئەز ل كلینیكا وی یێ بەرھەڤ بم و ھەر گاڤا سكرتێری ناڤێ من گازی كر، ئەز بەرەڤ دەرگەھێ نوژدار تێڤە بچم و ھەر پرسیارا وی ژمن كر، ئەز دێ بەرسڤێ دەم.
ئەرێ دێ بەرسڤا ھەمی پرسیارێن وی دەم. مانێ ئەز ژ ھەڤالێ خوە دزانم، دەما ئەز دگەل وی چوویمە كلینیكا نوژاری و گوتيیێ ددانێ من یێ دئێشیت. پشتی پشكنینێ، نوژداری گوتێ ددانێ تە چ تێنەمایە و دڤێت بھێتە ھلكێشان!
نەخێر ئەز ب پێشنیارا ھەڤالێ خوە ناكەم و دترسم نوژدار دەستێن من ژ قوقلكێ بینتە دەرێ و مانێ سەیدا ژمن و ھەڤالێ من و نوژداری ژی باشتر دزانیت. یا گوتی دەستێن وە یێن مەنە و ئەو دبن كونترولا مەڤەنە. ھەر گاڤا مە ڤییا دێ پێكڤە دەستێ خوە بلندكەن و ھەر گاڤا مە ڤیا دێ ئیننە خارێ و دەما من گوتییێ قوربان، ئەڤە ژوێ رۆژا جەنابێ تە گوتی دەستێن تە وەك یێن ھەمیان نینن، خەو ب چاڤێن من نەكەفتییە و ھەر شەڤ دەستەك لمن دبیتە مێھڤان و ناھێلیت خەو نزیكی چاڤێن من ببیت؟ گوت: دەما دنڤی دەستێن خوە ل بن بالیفكێ دانە و بكەڤە خەوێ.
راستی ژی ئەڤە ھزرەكا جوانە. ئەرێ بوچی دێ قەستا نوژداری كەم و سكرتێرێ وی پارێ كلینیكێ ژمن وەربگریت، شنی بەرێ من بدەتە دەرمانخانێ و ئەو پارێ دەرمانان ژمن وەربگریت، بتنێ دا كو بنڤم! نەخێر ئەز پێدڤی ڤێ ھەمییێ نینم و دێ قەستا دكانەكێ كەم، یا باشتر دێ قەستا ھوستایەكێ لاندكا كەم، ئەوان شارەزایی ددروستكرنا لاندكاندا ھەیە.
مانێ ئەو ھەمی شولا دزانن، ئەو دێ رێكەكێ بۆ من پەیدا كەن كو ھەر شەڤ دەستێن خوە ژێڤەكەم و سپێدێ دوبارە بێخمە جھێ وانڤە و ھەر شەڤ ژی من ئەڤە دكر، من دەستێن خوە ددانانە بن بالیفكێ و من سەرێ خوە ددانا، ھێشتا چاڤێن من نەكەفتینە سەر ئێك، وەكی پشیكێ خەوێ خوە ل چاڤێن مندا. تا رۆژەكێ ل دەنگێ دیكلی ھشیار بوویم و ئێكەم تشتێ ھاتییە سەر ھزرا من، بەری بچمە سەر دەستئاڤێ، دڤێت دەستێن خوە بەمە جھێ وان و من بالیفك قولپاند، عەرد كۆن بوو و دەستێن من دیار نەبوون. رابوومە ژ قونڤە و من گازێ دەیكا خوەكر.
ـ دادێ دەستێن من ددیار نینن؟
ـ ما سەیدایی نەگوتبوو دەستێن وە یێن مەنە، ھەما تەنا بنڤە، دەستێن وە یێ ل جھەكێ ئەمین.
دەیكا من راست دبێژیت، دەستێن مە یێ ل جھەكێ ئەمین و ما دێ بوچی لێگەرم!
ئێ باشە سەیدا، تە گوت دەستێن وە یێ دبن كونترولا مەڤە، ئو پا ل چوونا دەستئاڤێ؟! باشە ئەگەر دەستێن مە دبن كونترولا وە ڤەبن، دەستێن نڤیسەری و یێن گوشتفرۆشی و یێن شوفێری و یێن ماموستایی و یێن نانپێژی تێكەلی ئێك بوون، كی دێ شێت ھەر دەستەكی دانیتە جھێ وی یێ درۆست و باشە كی دێ گرەنتییێ دەت، كو دەستێ دزیكەری، چەكۆچێ دادوەری نەھلگریت؟!! ئێ باشە دزی ژی ب سەرێ خوە، رێڤەبرنا سەقەت ژی ب سەرێ خوە، بەرەللایی ب سەرێ خوە، مانە دڤێت پاریەكی بەرێڤەیی گەرییا خوە بكەین؟!!
ــــــــــــــــــــــــــــــــــــــ
ئهڤرۆ 3936- 2026/ 25/02
ليست هناك تعليقات:
إرسال تعليق