عبدالرحمن بانڕرنی
قێركرنا جادێن بازارێ دهۆكێ، دێ جوانیەكێ و پاقژیەكێ دەنە سەروسیمایێ بازاری هەمییێ و دێ ئەڤ جوانییە یا بەردەوام بیت. هێشتا من ئاخفتنا خوە تەمام نەكری، كو مە سێ هەڤالان دناڤ پاركا نەورۆزدا پیاسەدكر، هەڤالەكێ مە گوت: "ئەرێ تو بێژی خەلك ڤێ پاقژیێ، دگەل ڤی سەروسیمایێ نوی یێ بازاری راگریت؟". مەبەستا هەڤالێ من، ئەڤ گوهورانكاریێن نوكە ل بازاری دهێنەكرن بوو. شوستە و بەردەرێ دكانان هەمی بوونە ئێك قیاس و ب تابۆكێ هاتنە رازاندن. ددەمەكیدا هەر دكاندارەكی ب كەیفا خوە، هندەكان (سیرامیك) دانابوو و بلندی و نزمی ل هندەك جهێن دی هەبوو و هندەكان ژی زێدەگاڤی ل سەر شوستەیی كربوون. لێ نوكە جوداتر، دیمەنەكێ شارستانی ب بازارێ دهۆكێ هاتیەدان و تایبەت ژی نوكە هەردوو جاددێن سەرەكی یێن ناڤ بازارێ دهۆكێ، یێن دهێنە قێركرن و هەكو ب كوردەواری دبێژین (بازار دێ كەڤلێ خوە گوهوریت).
من گوتە هەڤالێ خوە، مانێ نوكە ئەم یێ دناڤا پاركا نەوروزدا پیاسێ دكەین، ئەرێ تە تێبینیا گلێشەكی كرییە ل بەر پێن خوە؟ هەڤالێ من دوبارە لدوور خوە زڤری و بەرێخوەدا دەردوورێن خوە و هەر وەكو ڤییا ئاخفتنا من تەئكید بكەت و گوت نەخێر. من گوتێ نڤیسەرێ ب ناڤ و دەنگێ رۆسی (تولستوی)، گوتنەكا گەلەك جوان یا هەی و دبێژیت (مرۆڤێ پاقژ ب هشیاری دناڤ جهێن پیسدا دەرباز دبیت، لێ دەما پیساتیێ دبینیت و پێلاڤا وی پیس دبیت، هشیاریا وی كێمترلێدهێت. لێ دەما دبینیت كو پێلاڤێن هەمیان دپیسن، ئێدی ئەو هشیاریە ژی لدەف نامینیت و پێنگاڤێن خوە دهاڤێژیت)، ئەڤ گوتنە ل سەر ڤێ پاركێ دهێت و دێ ل سەر گوهورینێن نوكە ل بازاری ژی دهێنەكرنێ دهێت. نوكە ئەم یێ ل پاركێ و ئەم گلێشی نابینین و هەمی پاقژییە، ئەگەر مە گلێشەك هەبیت ژی ئەم ژی ناهاڤێژینە بەرپێن خوە. ل ڤان گوهورانكاریێن بازاری ژی وەسا، ئەگەر كەسەكێ زێدەگاڤی ل سەر شوستەیان نەكر، پاقژی راگرتن، ئەگەر چ دكانداران زێدەگاڤی نەكرن، باوەربكە بازار دێ وەكی قودیكا رۆناهیێ مینیت، تو گلێشی لێ نابینی و بازارێ دهۆكێ دێ بیتە جوانترین و پاقژترین بازار.
ــــــــــــــــــــــــــــــــ
ئەڤرۆ 3943- 2026/ 09/03
ليست هناك تعليقات:
إرسال تعليق