عبدالرحمن بامەرنی
پێشكەفتنا تەكنۆلۆژیایێ شێوازەكێ دی یێ ژیانكرنێ دناڤ مەدا پەیدا كر و نە بتنێ جیهان كرە گوندەكێ بچووك، بەلكو دەرفەتێن زێدەتر ل بەر مە رۆخساندن، تێگەهشتنا مە بۆ كەلتور و كومەلگەهێن دی یێن جیهانێ برنە قوناغەكا دی، كو چ جارەكێ برێكا فێربوونێ و لێگەریانێ ئەم نەدشییاین بگەهینێ. ئەڤرۆ ئەم ل هەمبەر شورەشەكا مەزنین د بیاڤێ فێربوون و گەشەكرنا زمانیدا، ڤێ شورەشا تەكنۆلۆژی شێوازێ فێربوون و پەروەردەكرنێ ژی گوهارتییە و ب پرۆسەیەكا زانستی و هونەری دهێتە ب ناڤكرن. رۆلگێرانا زیرەکیا دەستكرد، وەك هێزەكا نوی شیانێن گوهورینا شێوازێن فێركرنێ هەیە، وەكی زیرەكییا مرۆڤی و دانا بریارێن زیرەك و وەرگرتنا ئەو تشتێ ئەوی پێدڤی پێهەیی و ئەو لێدگەریت.
ئەڤرۆ كەسەك نینە، ئەگەر ئێك ژ ئامیرەیێن زیرەك ل بەر دەستان نەبیت و بكارئینانا وان ئامیرەیان ژی پێدڤی ب هەبوونا زمانەكییە و ئەگەر ئەم زمانێ كوردی و نەبوونا زمانەكێ ستاندەردێ كوردی بكەینە نموونە و ب پرسین، ئایا دێ مە كێشە دگەل تەكنۆلۆژیا نوی و تایبەتی زیرەکیا دەستكرددا هەبیت، ئەگەر ئەم ب زمانێ خوە و دەڤۆكێن خوە داخوازیێن خوە ل بەر سینگا وێ دانین؟ هەر چەندە ئەڤ كێشەیە دێ چارەبیت و زیرەکیا دەستكرد دگەل دەمی دێ شێت خوە دگەل هەمی زمانان گونجینیت و خوە ئەگەر ب لەنگی ژی مرۆڤی پرسیارێ ژێ بكەت، لێ دیسان ئەڤە نابیتە چارەسەری و چ جارەكێ ئەم نەشێین داخوازیێن خوە، وەك مە بڤێت وەربگرین.
ئەز ناڤەگرمە سەر بابەتێ زمانێ كوردی و نەبوونا دەولەتەكا كوردی، كو مە زمانەكێ ستاندەرد هەبیت تا ئەم بشێین خوە دگەل تەكنولۆژیایێ و زیرەکیا دەستكرد بگونجینین، لێ ئەگەر ئەم ب رژدی ل سەر زمانێ كوردی نە راوەستین، ئەم نەشێین مفای ژڤێ پێشكەفتنێ و ڤان گوهورینان وەربگرین یێن جیهان تێدا دەرباز دبیت، هەر بۆ نموونە، دەما من ئەڤ بابەتە د نڤیسی، من چەند تاقیكرنەك ل سەر (chat GPT) كرن و من پرسیارەكا ب بادینی ژێكر و بەرسڤا من ب بادینیەكا سەقەت دا، من هەمان پرسیار ب سورانی ژێكر و بەرسڤا من دروستتردا. من زمانێ لاپتوپی بۆ ئینگلیزیێ گوهوری و من پرسیارا خوە ب لاتینی ژێكر، بەرسڤا من ب پیتێن ئارامی دا و دەما من هەمان پرسیار ب پیتێن لاتینیا تێكەل، كو زێدەتر ل ئالیێ (هەولێرێ و سلێمانیێ) پێ دنڤیسین و شوینا ئەو ب لاتینی بنڤیسن، ب كوردی بەلێ پیتێن ئینگلیزی دئێخنە دخزمەتا نڤیسینا خوەدا، یانكو پیتا (e) كو رامانا پیتا (ە) ددەت، ئەو دێ نڤیسین (a) كو دبیتە پیتا (ا)، وەك پەیڤێن (وەرە were) ئەو دنڤیسین (وارا wara) كو چ رامانەكێ ب چ دەڤۆكێن كوردی نادەت و بتنێ خوە دگەل گونجینن، لێ زیرەکیا دەستكرد شییا پرسیارێ دروست وەربگریت و بەرسڤا من دا.
لێ ژبەركو مە دروست زمانێ كوردی دیجیتال نەكریە، بەرسڤێن زیرەکیا دەستكرد ژی دێ لدویڤ وێ نەدروستیێ بن و هەر بۆ نموونە من نڤیسارەك ب بادینی بۆ (چات جی پی تی) نڤیسی و من گوتێ بۆ من بكە عەرەبی و من ئەڤ هەلبژاردەیە ژی بۆ زێدەكر، ئەگەر ئەو د بادینیا من نەگەهێت، ئەز دشێم ب سورانی بنڤیسم؟ لێ وێ ب عەرەبیەكا گەلەك جوان ئەو نڤیسارە بۆ من دروستكرد. ژڤێ تاقیكرنا بچووك، چ دەردكەڤیت، دڤێت ئەم زمانێ خوە یێ كوردی بكەینە زمانەكێ تەكنۆلۆژی و تا ئەم ڤێ نەكەین، ئەم نەشێین مفای ژ پێشكەفتنێن نوی وەربگرین و ئەم دێ ل پێنگاڤا دووێ بین و نە بتنێ ئەم نەشێین دروست خوە دگەل جیهانا نوی ب گونجینین، بەلكو دێ ژ دیڤەلانكێن وان بین.
ـــــــــــــــــــــــــــــــــــــــــــــــــــــ
رۆژناما كوردستانی نوێ ژمارە (9607) یا رۆژا 2026/2/23
ليست هناك تعليقات:
إرسال تعليق