من جیرانەكێ دكاندار یێ هەی و هەر دەما من دبینیت، حەز دكەت بابەتەكی دگەل مندا ڤەكەت. ڤێجارێ گوت: (كا وەرە جیران، ئەرێ چ بەحسا كارەبا 24 سەعەتییە؟). لێ جیرانێ من خوە ل بەرسڤا من نەگرت و گوت: (جیران ئەز دڤێ كەهرەبێ ناگەهم، پارێ من یێ سێ هەیڤان (346) هزار دینار بوون و یێ ڤێ هەیڤێ بتنێ (348) هزار دینار یێن هاتین).
من گوتێ ئێ جیران، ئەڤ كارەبە دەستكەفتە، بەلێ دڤێت ئابووریێ تێدا بكەین و بزانین دێ چاوان مفای ژێ وەرگرین و پارێ وێ ل سەر مە نەبیتە گەلەك. جیرانێ منێ دكاندار كورسیكەك، كو چەند تەبەقێن هێكان یێن خالی كربوونە تێكدا و برەنگێ كورسیكێ ڤەدچوون، كێشا بەر كورسیكا خوە و گوت روینە دا بۆ تە سوحبەتەكێ بكەم. جیرانێ من گوت ئەڤە بابێ من هوسا یا گوتی و چیرۆك راستە و دگوت: (ل گوندەكی كەسەك هەبوو، گەلەك كارێن خراب دكرن و هەمیان نەخۆشیا خوە ژێ ددیت و نەدشیان چ چارەیا ب بەنێ، گیسكەكێ بێ سەروبەر هەبوو و چەند گوندییەك دیتبا، دا بێژیتێ من گیسكێ خوە بۆ قەلیا زڤستانێ یێ هەلگرتی و دەما وەرزێ پایزێ نزیك بووی، شەڤەكێ چوو دوو بەرخێن قەلەو ژ كۆتانەكێ دزین و هەر وێ شەڤێ سەرژێكرن و كەڤلكرن و دا بەر دەڤێ داسێ و ئەو گوشت قەدقەد كر و كارێ قەلیێ كر. دەما خودانێ بەرخان ل بەرخێن خوە یێن بەرزە دگەریا و هاتیە مالا وی پرسیار دكر، دیت چ تەشت و ئامانێن د خانی ڤە هەین، دتژی گوشتن! دەما پرسیار ژێكری و كا ئەڤە چ گوشتە و بەحسا هەردوو بەرخێن خوە یێن بەرزەبووی ژێ كرین؟ گوتێ ما من چەند جاران گوتبوو تە، كو من گیسكەكێ هەی و دێ كەمە قەلی، ئها ئەڤە گوشتێ وی گیسكی یە. كابرایی بەرێخوەدایێ و گوتێ، وەلا مامو سەر بەختێ من تە گەلەك جاران ئەڤە یا گوتیە من، كو دێ گیسكێ خوە بۆ زڤستانێ كەمە قەلی، لێ ئەڤ تەشت و ئامانێن تژی گوشت و گیسكێ تە، چ جارەكێ ناچنە بەر ئێك!).
هێشتا من چ تشت نە گوتین، جیرانێ من گوت: بەری ئاخفتنا خوە بێژی ئەز دا چیرۆكا بەرخێن دزی و قەلیا زڤستانێ و بابەتێ كارەبا 24 سەعەتی بینمە بەر ئێك و پاشی تو شنی یا خو بێژە. گوت: بۆ زانین دەما ئەم جلشوویێ هلدكەین یان یا گیزەرێ حەمامێ، ئەم هەمی تشتێن دی وەك بەفرگرێ و تا گلوپێن پێدڤی ژی د ڤەمرینین و چ جارەكێ ئەم ناهێلین دوو تشت پێكڤە د هلكری بن، دگەل ڤێ ژی، ئەڤ تشتێ دڤێ هەیڤێ دا مە هلدكرن، هەمان تشت بوون یێن د هەیڤێن دیدا مە هلدكرن و زڤستان و سەرما هەمان تشت بوو! ما خودانێ بەرخان یێ نەحەق بوو بێژیت (ئەڤە چ جارا ناچیتە بەرئێك). یا راستی بیت جیرانێ من ئاخفتنا من هێلا دگەریا مندا و ئەز (قفل) كرم، ئێدی ئەز نەشیام بەرەڤانییێ ژ ڤێ كارەبێ و بهایێ وێ بكەم.
ــــــــــــــــــــــــــــــ
رۆژناما كوردستانی نوێ ژمارە (9605) یا رۆژا 2026/2/19
ـ لینكێ رۆژنامێ https://knwe.org/KU/ArticleDetails/9514...
ليست هناك تعليقات:
إرسال تعليق