عەبدولڕەحمان بامەڕنی
ل هەیڤا ئادارێ گەلەك جەژن و هەلكەفت تێدا هەنە، چیێن خۆش و چیێن نەخۆش و دڤێت ئەم كورد گرنگیێ بڤان هەمی هەلكەفت و جەژنان بدەین و هەلسەنگاندنێ بۆ بكەین. ژڤان هەلكەفتان ژی، هەشتی ئادارێ رۆژا جیهانیا ژنان دهێت و هەر چنە بیت ئەم بەراوردیەكێ بۆ بكەین، بۆ رەوشا ژنان، هەردوو قوناغێن بەری و پشتی سەرهلدانێ وەربگرین و ڤێ پرسیارێ ژ خوە بكەین، ئایا ژ سەرهلدانێ تا نوكە، ئەم شیاینە چ بۆ ژنان و باشتركرنا رەوشا وان بكەین؟ رەنگە هەبن بێژن، بەلێ ئەم یێن شیاین گەلەك تشتان بۆ وان بكەین و ئێك ژوان ژی ئەز بخوە بم، بێژین مە پەیمانگەه و زانكۆ یێن هەین و ئەڤرو ب سەدان و هزاران كچ یێن بووینە خودان باوەرنامە.
ئەڤە پێنگاڤەكا باشە بەراورد دگەل بەری سەرهلدانێ، كو عەقلیەتا تاكێ كورد تا راددەیەكی رێگر بوو، كچ بەردەوامیێ ب خواندنا خوە بدەت و هەر چەندە ئەڤ عەقلیەتە تا راددەیەكێ كێم یا لاواز بووی، لێ تا نوكە ژی گەلەك دایباب یێن هەین رێ ب كچان ددەن تا ئامادەییێ بەردەوامیێ بكەن و ژ خواندنێ ڤەدكێشن.
بابەتێ کو من دڤێت ل سەر ب راوەستم، هەر ئەڤ خالەیە، ئەو ژی بەردەوام بوون یان بەردەوام نەبوونا كچان ل خواندنێ و بابەتی كورت بكەمە سەر قەیرەبوونا كچان، بابەتی كورتبكەمە سەر كچا بوویە خودان باوەرنامە و ئایا نوكە د چ رەوش دایە؟ كو ئەڤ هەردوو بابەتێن هەنێ، ب دیتنا من جهێ ل سەر راوەستیانێ نە و دڤێت ئەم ب گرنگی وەربگرین و د سەر را دەرباز نەبین.
بابەتێ قەیرەبوونا كچان و بابەتێ كاركرنا كچان، دوو بابەتێن گەلەك گرنگن و ئەڤ كەسێن ئازارا ژی ژبەر دبەن، هەر ژن بتنێ نە. ئێكەم بابەتێ قەیرەبوونا كچان، كچ دكەڤیتە دناڤبەرا دوو هەلبژاردەیاندا ئایا بەردەوامیێ خواندنا خوە بدەت یان نە؟ ئەگەر بەردەوامی دایێ، دەرفەتا شووكرنا وێ تا راددەیەكی كێم دبیت، ژبەركو عەقلیەتا تاكێ كورد هێشتا ل خالەكێ دەرباز نەبوویە، كو ژنا خواندەڤا دشێت ب چەندین رێكا ژ ژنا نە خواندەڤا باشتر و لێهاتیتر بیت.
ئەڤە ژی وێ دئێخیتە بەرسینگا دوو سەرەرێیان، ئێك ئەگەر بەردەوامی ب خواندنا خوەدا، دێ بیتە خودان باوەرنامە و دێ بیتە لبنەك هەم ژ ئاڤاكرنا خوە و خزمەتكرنا مللەتێ خوە ژی ئەگەر هوسا بێژین، لێ ژلایەكێ دیڤە، باوەرناما وێ بتنێ دێ كاغەز مینیت، دێ بیتە ژنەكا بەرمالی د خانیڤە و ئێدی دەركەفتنا وێ دێ هێتە سنوورداركرن و ژبەركو بەردەوامی یا دایە خواندنا خوە، دەرفەتا شووكرنا وێ ژی دێ كێم بیت و رێژا زێدە یا كچێن قەیرە ژی، ئەو كچن یێن باوەرنامە نە. خالا دووێ، بابەتێ كاركرنا وێ كو ببیتە خودان داهات، راستە ڤێ كچێ یا شیایی ببیتە خودان باوەرنامە، لێ مانا وێ و رێ نەدان ب دەركەفتنا وێ كو ببیتە خودان داهات و دەرفەتێن دامەزراندنێ نەبن، ددەمەكیدا جڤاك بتنێ رێكێ ب دەركەفتنا وێ ددەت ئەگەر بهێتە دامەزراندن و ل جهەكێ فەرمی كاربكەت، ئێدی دەستوپێن ڤێ ژنێ دهێنە گرێدان.
كی بەرپرسە ژ پێشڤەبرنا رەوشا ژنان؟ رەنگە بەرسڤا ڤێ بچیتە داخانا مافێن ژنان ژی دا، لێ بدیتنا من ئێكەم كەسێ بەرپرسیار جڤاك بخوەیە، هشیارییا كومەلگەهی و تێگەهشتن و عەقلیەتا نە گوهورا كومەلگەهی بۆ دابۆنەریتان، كو مخابن چ بەراوردی یا بەرچاڤ ل بەری و پشتی سەرهلدانێ ناهێتەدیتنێ، ئەگەر رێژەكا كێم ژێ دەربێخی و ل بەری سەرهلدانێ جوداتر ژڤان 35 سالێن پێشكەفتنێ و دنیادیتنێ، كێشەییا قەیرەبوونا كچان ئەگەر هەبایە ژی، ئەگەرێن خوە یێن تایبەت هەبوون و نە دبوو بابەت.
ــــــــــــــــــ
رۆژناما كوردستانی نوێ ھژمار (9616) یا رۆژا 8/3/2026
ليست هناك تعليقات:
إرسال تعليق