عبدالرحمن بامەڕنی
هەر كەسێ ل كەتوارێ هەیی یێ هەرێما كوردستانێ بنێریت، هەر ژ ئێكەم هەلبژارتنا پەرلەمانێ كوردستانێ ل سالا 1992ێ و درۆستبوونا حكومەتا هەرێما كوردستانێ و تا نوكە، دێ شێت ب ئاسانی د نەخشەیێ سیاسییێ هەرێمێ بگەهیت و ئەڤ نەخشەیێ هەنێ ژی نە یێ پشتی سەرهلدانێ یە، بەلكو ژ ئەنجامێ ناكوكیێن سیاسیێن حزبێن كوردی دروست بوویە و جوگرافیا ڤان حزبان، هوكارەكێ سەرەكی بوویە ژبۆ دروستكرنا سنوورێن وەهمی، كو نوكە ئەم ب دوو زوونان زەرد و كەسك ناڤ دكەین.
پرسیارا دهێتە پێش ژی ئەڤەیە، بۆ راستكرنا رێرەوێ سیاسی ل هەرێما كوردستانێ، ئەم پێدڤی چینە؟ ئایا ئەم پێدڤی بالانسەكا سیاسینە، یان ژی ئوپۆزسیونەكا بهێزین؟ بۆ بەرسڤا ڤێ پرسیارێ ژی، دێ زێدەتر ل سەر ئێكهەلویستیا یەكێتیی نیشتیمانیی كوردستان و نەوەی نوێ راوەستم، ئەگەر كورسیێن هەردوو حزبان كۆمڤەببنە سەر ئێك، دێ هێتە بەرامبەری كورسیێن پارتی دیموكراتی كوردستان و دێ بالانسەكا هێزێ دروست بیت بۆ دابەشكرنا پوستان، كو ئەڤە سالەك و چەند هەیڤە، نە پەرلەمانێ كوردستانێ چ روونشتن كرین و نە ژی حكومەت هاتیە پێكئینان.
دا بزڤرینە سەر بابەتێ خوەڤە و كانێ كیژان بۆ هەرێما كوردستانێ گونجایترە، بالانسا سیاسی یان ژی ئوپۆزسیونەكا بهێز؟ رەنگە هەبن بێژن ژ سەرهلدانێ وەرە، هەردوو حزبێن سەرەكی ژبلی شەرێ ناڤخویی و دو ئیدارەییێ و دوو زوونیێ و دوو هێزێن پێشمەرگەی و...هتد، نەشیاینە دناڤخودا ئێكگرتنەكێ دروست بكەن و ئەڤ ئێكگرتنا هەنێ، ببیتە خێر و بێر بۆ قەوارەیێ هەرێما كوردستانێ و هەبوونا ئوپۆزسیونەكا بهێز ب گونجایتر ببینن، رەنگە ژی هەبن و بێژن، ئەگەرێ سەرەكییێ دویركەفتنا حزبێن مە ژ ئێك، ژ ئەگەرێ هەبوونا ئوپۆزسیونێ یە، ب مەبەستا ئەڤ ئوپۆزسیونە زێدەتر بالانسێ تێكددەت كو بشێت هەڤسەنگییێ راگریت و باشترین بەلگە ژی ئەڤە سالەكێ زێدەتر ئەم بێ پەرلەمان و بێ حكومەت ماین.
د هەردوو حالەتان ژیدا، رەنگە بوچوونێن جوداتر هەبن و هەر لایەنەك بارەكا مافداریێ دگەل خوە دانیت و هەردوو ژی درۆستن، لێ ئەڤە كەنگی چێدبیت؟ ئەگەر قەوارەیێ هەرێما كوردستانێ، ب رەنگەكێ دی درۆستبایە! بوویە ئەز دگەل وێ بوچوونێمە، دڤێ قوناغێدا هەرێم پێدڤی چ حزبێن ئوپۆزسیون نینە و دڤێت بالانسا سیاسی بهێتە راگرتن، خوە ئەگەر بەرەیێ یەكێتیی نیشتمانی و نەوەیی نوێ چەند مەزن ژی ببیت و بشێن حكومەتێ پێكبینن، حكومەت یا سەركەفتی نابیت و د بەرامبەردا ئەگەر پارتی دیموكرات ژی هەمی بزاڤەكێ بكەت و هەمی حزبێن ئوپۆزسیونێ و ئیسلامیان ژی بكێشیتە لایێ خوە و یەكێتیێ دگەل (28) كورسیان بهێلیت، دیسان نەشێت حكومەتێ پێكبینیت و دڤێت هاولاتی و دەنگدەرێ كوردستانێ زێدەتر دڤێ هەڤكێشەیێ بگەهن، تایبەت ئەو دەنگدەرێ بزاڤێ دكەت ب رێیا دەنگێ خوە و بلند دەرئێخستنا ئوپۆزسیونەكێ، گوشارێ ل سەر یەكێتی و پارتی بكەت.
ـــــــــــــــــــــــــــــــــ
ـ رۆژناما كوردستانی نوێ ھژمار (9585) یا رۆژا 2026/1/22
ليست هناك تعليقات:
إرسال تعليق