سەبارەت (ژن و زەلامان)

عبدالرحمن بامەرنی

من تەماشای بەرنامێ تەڤن دكر ئەڤێ ژ لایێ (رێبەر كوردو) ل سەر شاشا وارتیڤی دهێتە پێشكێشكرن و پرانیا جاران دوو كەس مێهڤانێن وینە و ڤێجارێ بابەت ل سەر ژنان بوو. تشتێ بۆ من ژ وێ خەلەكێ بالكێش و ئەز پالڤەدایمە نڤیسینا ڤێ گوتارێ، دەما ئێك ژ مێهڤانان دگوت (سویندا ژنان ب بسكێن سور و یێن زەلامان ب سمبێلان) بوو و بەرنامە هەلگرێ چەندین تەوەرێن دانوستاندنان بوو، كو بەرنامە ب سەرێ خوە و گوتارا من ب سەرێ خوە، لێ گەلەك جاران مە د دانوستاندنێن خوەدا ئەڤ سوحبەتە كریە، ئایا ژ كەنگی وەرە پێگەیێ ژنان هاتیە بەزاندن و ژ كەنگی وەرە زەلامسالاری دروست بوویە و ژ كەنگی وەرە یەكسانییا دناڤبەرا ژن و زەلاماندا تێكچووبیت؟! كو ئەڤ پرسیارێن هەنێ، هەلگرێ چەندین بەرسڤانە و گەلەك جاران دهێتە ڤەگێران، كو نە ژمێژە كور دگەل كچان و ژنان دچوونە هەژكان، كەزان و بێمكان و یا من دڤێت بێژم نە بتنێ ل دەف مە، بەلكو ل پرانییا گوند و باژێركان ئەڤ تشتە هەبوو و ژن سەربەست دچوو ناڤ جنیكێ، عاقاری، گژو گیای و نە مەترسییا دەستدرێژیێ ل سەر هەبوو و نە باوەرییا هەڤژینێ وێ یان باب و برایێن وێ ل سەر هەبوو و ئەوێ بخوە ژی ئەو باوەری بخوە هەبوو، كو وەك هەر نێرەكی ئەو ژی دشێت ژیانا خوە یا تایبەت، یان خێزانێ ببەتە سەر و بەشەكێ كارێن مالێ بێخیتە سەر ملێ خوە و تشتێ ئەڤ هەڤكێشەیە تێكدایی، دەما گوند مەزنبووین و باژێر پەیدابووین، جوداهییا ئاستێ خواندنێ پەیدابووی، دەما زەلام بوویە خودان داهات و ژن مایە دخانیڤە و ئێدی هەمی تشت ب سەرێ وێدا شكەستن، بۆ شەرەفا زەلامی، بۆ عەورەت و بوو و بوووو تا دووماهیێ، ب كورتی، دا ژن بشێت پێگەیێ خوە یێ دروست بزڤرینیت، یان دڤێت باژێر دوبارە ببنە گوندێن بچیك یان ژی ژن بخوە خو پێبگەهینیت و خوە ئاڤا بكەت و نە مینتە بدویڤ جوانكاریێ بتنێڤە، هینگێ جوانكاری پێگەیێ وێ لاواز نیشان ددەت.

*رۆژناما ئەڤرو ژمارە 3441 یا رۆژا 2023/12/3