عبدالرحمن بامەرنی
پرانییا قوتابیان و خوە ماموستا بخوە ژی، ل نڤیسینا دارشتنێ ئاسێ دمینن! ماموستا پێشوەخت دێ بابەتەكی بۆ قوتابییان دەستنیشان كەت، رەنگە دێ هندەكێ بەحسێ بابەتێ دارشتنێ كەت و هندەك سەرقەلەمكان ژی بۆ قوتابییان بەرچاڤكەت، لێ دەما دارشتنێن قوتابیان دگەهنە بەردەستێ ماموستایی، رەنگە دێ هەمیان ژی خوینیت، لێ یێ پشت راستە پرانییا ڤان دارشتنان قوتابیێن وی نە نڤیساینە. رەنگە ماموستا دێ بۆ خوە هزر دكەت، ئەڤە ئەركەكە دڤێت قوتابی جێبەجێبكەت و ئەو هزردكەت پەنابرنا قوتابیێ وی بۆ كەسەكێ دی، كو دارشتنێ بۆ بنڤیسیت، د خوەبخوەدا تەمامكرنا ڤی ئەركییە.
دەما ئەز قوتابیێ ناوەندی و ئامادەیێ ژی، كێشا من یا سەرەكی نڤیسینا دارشتنێ بوو. ئەز باوەرم نە بتنێ ئەز، بەلكو ئەڤە كێشا پرانییا مە قوتابیان بوو، هەر چەندە من هەولدان دكرن كو ئەز بخوە بۆ خوە بنڤیسم، تایبەت ژی ئەگەر دارشتن یا كوردیێ با، لێ ماموستای نمرا باش نەددا من و هەڤالێن من یێن قوتابی نمرێن وان ژ یێن من باشتر بوون، من دزانی ژی و ماموستای بخوە ژی دزانی كو كەسەكی دی بۆ وان دنڤیسیت! هەتا ئەز گەهشتیمە قوناغا ئامادەیێ، هینگێ ماموستا (سەدیق شەرۆ) بۆ مە ل زمانێ عەرەبیێ دهات، هەر دارشتنا دابامە، وی حەزدكر مە نڤیسیبا. ئەز دێ بتنێ بەحسا خوە كەم، ژبەركو من یێن خوە دنڤیسین، ب عەرەبییا خوە یا كودرییا من ل سەر زال، لێ من هەولددا داهێنانێ د نڤیسینا دارشتنا خوەدا بكەم و دەما دەفتەركا دارشتنا رادەستی مەدكر، دگەل دەستخوشیێ، هەر جار نمرەكا بلند من دبر، ژبەركو وی دزانی من یا نڤیسی و ئەڤە بۆ وی یا گرنگ بوو، ئەنجام ژی، ئەو دارشتن بۆ من بونە هاندانەك و ئەو ژی خالەك بوون و ئەز بومە نڤیسەر.
ئەڤە ژبلی كو نوكە ب ساناهیتر بدەست دكەڤن، نامیلكێن دارشتنان ب كوردی و عەرەبی دهێنە فرۆشتنێ، ئەرێ بۆ ماموستایان، هەتا كەنگی دێ بەرێ قوتابی ل تەمبەلیێ بیت؟ مانە دارشتن هاندانەكە، كو قوتابی شیان و بەهرەیێن خوە بینتەدەرێ؟!!
د رۆژناما ئەڤرو ژمارە 3421 یا رۆژا 25/10/2023 دا بلاڤ بوویە.
%20copy.jpg)
ليست هناك تعليقات:
إرسال تعليق