گرنگیا گێرانا (فێستیڤالا دانیكا و فێستیڤالا بەرورایا) د چ دایە؟!

عبدالرحمن بامەرنی

دڤان چەند رۆژان دا چەند چالاكیێن جودا ھاتنە ئەنجامدان، چالاكیێن رەوشەنبیری و كەلتوری و ئابوری و ئەو چالاكی ژی ل دەرڤەی پارێزگەھێ بوون، ل گوندان وەك یا بەكر بەگێ ئەرزی و یا سێڤێن بەرواریا و یا دانیكا ل بامەرنێ. د ھەر سێ چالاكیان ژیدا خەلكەكێ زێدە بەرێخوەدابوویێ و ھەر كەسەكێ خواندنەكێ بدەتێ، ھەم چوونا خەلكی بۆ ڤان چالاكییان، بەشدارییا وان لڤان خرڤەبوونان، دێ زانیت ئەڤ چالاكیێن ھەنێ چەند دگرنگ بوون و ب تایبەتی ژی بۆ ئەڤرویا نوكە ئەم تێدا دژین، قەیرانێن ئابوری و یێن سیاسی، رێژا بێكاریێ و ئێدی خەلكی ھەناسەكێشانەك دڤێت، كو رێكا دوویێ بكەیڤتە بەرچاڤێن وی، دنیابینینەكا دی و ھندەك ھیڤی و ئومێدێن دی.

ئەگەر ئەز چالاكییا رەوشەنبیری یا بەكر بەگێ ئەرزی ژناڤ دەربینم و بتنێ ل سەر ھەردوو فێستیڤالێن دانیكا و بەرواریا راوەستم، ئێك چالاكیەكا كەلتوری و ئێك ژی چالاكیەكا ئابوری، چالاكیا كەلتوری یا سێھەمین فێستیڤالا دانیكا بوو، كو خەلكێ بامەرنێ بخوە پشتەڤانییا وێ دكەن و ئەڤە جوداتر ژ فێستیڤالا بەرواریا، كو جھێ وێ یێ گونجایە، پێش وەخت بەرھەڤی بۆ دھێتە كرنێ و لایەنێن فەرمی پشتەڤانییا وێ دكەن، لێ تشتێ ھەردوو فێستیڤالا نزیكی ئێك دكەت و ببیتە ھێڤێنێ ڤێ نڤیسینێ، وەكھەڤیا ھەردوو فێستیڤالانە د چەند خالەكاندا، كو گەلەگ گرنگە پیتەكێ زێدەتر بۆ بھێتە دان و لایەنێن پەیوەندیدار خوە لێ بكەنە خودان.

گرنگیێن ھەردوو فێستیڤالان، ئێك: ژ روویێ ئابوریڤە، ھەرێما كوردستانێ پشت بەستنێ ل سەر داھاتێ پەترولێ دكەت و ژبەر چەندین ئەگەران، خەلكی دەست ژ چاندنێ یێ بەردای و یان وێ گرنگیا جاران نادەنێ، گێرانا ڤان جورە فێستیڤالان ژی ئەگەرەكێ بھێزن كو داھاتێ حكومەتا ھەرێما كوردستاێ باشتر لێبھێت، ئەگەر خەلكی بەھایێ چاندنێ زانی، كو ژبیرنەكەین ئەڤ سالە بەرھەمێ گەلەك جوتیاران ژ ھنار و سێڤان بۆ دەرڤەی ھەرێمێ و عیراقێ ھاتە ھنارتن و ئەڤە ژی پێنگاڤەكا گەلەك باش بوو. دگەل ڤێ ژیدا، گوند دێ ھێنە ئاڤاكرن، خەلك دێ ئازادتر قەستا بەروبۆمێ چیای كەت، قەیرانا كرێچیاتیێ دێ كێم بیت، دەستێ كاری دێ پەیدا بیت و بێكاری دێ كێم بیت و خوشگوزەرانی یا خەلكی ژی دێ ژ گەلەك روویانڤە باشتر لێھێت. دوو: ژلایێ رەوشەنبیری ڤە، گێرانا ڤان فێستیڤالان، خەلك ئاشنایی كەلتورێ خوە یێ كوردەواری دبیت، ژین و ژیارا باب و باپیران و ھوسان ھەستا نەتەوەیی و حەزا ئاخێ زێدە دبیت. سێ: ژ روویێ گەشت و گوزاریڤە، ئێدی ئەڤ دەڤەرێن ئەڤ چالاكیە لێ دھێنە ئەنجامدان دێ بنە ژێدەرێ ژیانێ، خەلك دێ بەروبومێ خوە لێ بەرچاڤ كەت بۆ فرۆشتنێ و تا خەلك دێ ژ دەڤەرێن دی، باژێرێن دی خرڤە بن و ئەڤە بخوە ژی داھاتەكە بۆ خەلكێ ڤان دەڤەران و یێن ل دەرفەتێن كاری دگەرن.

*رۆژناما ئەڤرو ژمارە 3423ێدا بلاڤ بوویە یا رۆژا 30/10/2023