چەند سەرنجەك ل سەر كێشێن كوردا یێن جڤاكی

عبدالرحمن بامەرنی

د پەراوێزا دەھەمین فلمە فیستەڤالا دھوكێ دا، چەندین فلم یێن كورت و درێژ ھاتنە پیشاندان، ئەز بتنێ دێ بەحسا فلمەكێ درێژ و دوو فلمێن كورت كەم، كو بابەتێ ھەر سێ فلمان بابەتێن جڤاكی بوون، زێدەتر پرسا ژنان دھاتە ئازراندنێ، نە یەكسانیا دناڤبەرا ژن و زەلاماندا. ئەز بەحسا سەركەفتن و سەرنەكەفتنا چ ژوان فلمان دڤێ گوتارێ دا ناكەم، لێ ئایا ئەم دشێین چ رێك بگرینە بەر بۆ چارەسەركرنا پرسێن جڤاكی و تایبەتی ژی یێن ژنان، لڤێرە ھونەرمەندێ كورد، برێكا فلمسازیێ ئەڤ دەرگەھە یێن قوتاین، د فلمێ ئێكێدا كو فلمەكێ درێژ بوو، فلم ژیانا كوردەواریێ بوو، ژن و زەلامەك تێدا ئەكتەرێن سەرەكی بوون، ژیانا وان یا گوندی، كارێن ژنان و كارێن زەلامان، لێ ڤێ ژنێ ھەست ب ڤالاتیەكێ دكر، زەلام پیتەی پێنادەت و ب (ژنەكە) ناڤێ وێ دئینیت و ھەردەم ھەست ب نەئارامیێ دكەت و گرانیا لەشێ خوە، تا دووماھی جار ژ زەلامێ خوە داخوازدكەت وێ بگەھینتە نەخوشخانێ و ژبەركو ئالاڤێ ەھاندنێ بتنێ ماتورەك ھەبوو، زەلامی دھاژووت و ژن ل پشت وی بوو، لڤێرە ژن نەچاربوو ژبۆ خوە گرتنا خوە كو نەكەڤیت خوە ب زەلامی ڤە بگریت و بڤێ رێكێ ژن گەلەك نزیكی زەلامی بوو و ئێكسەر ژ زەلامێ خوە داخازكر، وێ نەبەتە نەخوشخانێ ژبەركو تەندروستییا وێ باش بووڤە.

د كورتە فلمەكی ژیدا، زەلامەك ھەڤژینا خوە دكوژیت، دوو كورێن ھەین، كورەك ژ دەرڤە دژیت و دھێت پرسیارا گورێ دەیكا خوەدكەت، لێ برایێ وی یێ دی نزانیت، ھەردوو پرسیار دكەن، قەستا گورستانێ دكەن و ھەر نزانن، دووماھیێ قەستا دەف بابێ خوە دكەن كو یێ د زیندانێ ڤە، بابێ وان دبێژیت ئەز بابەتێ نامووسێ ل سەر خوە قەبیل ناكەم و من ئەو كوشت، ھەر چەندە كورێ وی دبێژیتێ مانێ ھندەك رێكێن دی ھەبوون، وەك بەردان و تەلاقدان، لێ باب تشتەكی بتنێ دزانیت، ل دووماھی و دەرڤەی باژێری گورستانەكا ھەی بناڤێ (ژنێن بێ خودان).

د كورتە فلمێ دیدا، ژنەك و كچا خوە د ترۆمبێلێ دانە، شوفێرەكێ دی ئاخفتنێن نەجوان دبێژیتێ و (تەحەرۆشێ) پێدكەت، ئەو نە ئارام دبیت و د رێكێدا روودانەكێ دكەت و كچەكێ بریندار دكەت، ئەو كچ خووشكا وی كوری بوو ئەڤێ تەحەرۆش ب وێ ژنا شوفێر كری، كچ قوتابی بوو و یا نەخوش بوو، قەستا نەخوشخانێ و نوژداری دكەت، لێ نوژداری دڤێت دەستدرێژیا سكسی ل سەر بكەت، ژ ژوورا نوژداری دەردكەڤیت و روودانا ترومبێلێ دروست دبیت، ئەو ژن كچێ دگەھینتە نەخوشخانێ، نوژدار ھەمان نوژدارە و شوفێرێ تەحەرۆش ب ژنا شوفێر كری دەردكەڤیت برایێ كچكێا قوتابی، ھەر چەندە پولیس دھێن و كچك دبێژیتێ نوژداری یا ڤیای دەستدرێژیا سكسی دگەل من بكەت، لێ ئەفسەرێ پولیسان دبێژیتێ بابەت دێ ئاڤێ ڤەخووت و پرس و بەرسڤانێ و دێ سەرێ وە پێڤە گێژ بیت، ب مەبەستا بابەتی دناڤ خوەدا چارەسەر بكەن و نەگەھینە دادگەھێ!

یا من دڤیا بێژم، ئەڤ ھەر سێ بابەتێن دڤان فلماندا ھاتینە ئازراندن، بابەتێن مە یێن رۆژانە نە، نمونێن ژڤان رەنگان د كومەلگەھێ مەدا دپرن و یا من ڤیای فوكسێ بێخمە سەر، دڤێت ئەم ڤان رێكان، نڤیسەر ب گوتارێن خوە، چالاكڤان برێكێن خوە، ھونەرمەند ژی ب ھونەرێ خوە و پێكڤە خەلك بھێتە ھشیاركرن، ژبەركو ژڤان كێشان كێشێن دی ددوفرا دھێن.

________________

رۆژناما ئەڤرو ژمارە 3451 یا رۆا 20/12/2023