سەرحوچەكی تاك بكەن

عبدالرحمن بامەرنی

هەڤالەكی گوت: "دا ب

چین حەبكەكا فیتامین (D) بخووین"، من گوتێ: "حەبكا فیتامین (D) یانكو چ؟". گوت یانكو خوە بدەینە بەرهەتاڤێ و بابەتێ مە چوو سەر مفایێ فیتامین (D)، مفایێن وێ بۆ لەشی و ب هێزكرنا هەستییان و ڤەكولینێن تازە ئاماژێ ددەن، كو ئەڤ فیتامینە بۆ وەرەرا عەقلی باشە و لدویڤ داتایان بیت، پرانیا خەلكێ مە ئەڤ فیتامینە لدەف یێ كێمە، ژبەركو كێم دچنە بەرهەتاڤێ و بابەت چوو سەر وەلاتێن پێشكەفتی و ئەڤێن ل سەر لێڤێن دەریایێ و چاوان لەشێ خوە ددەنە بەر هەتاڤێ و كورتییا بابەتی، ئەم ل رۆژەكا هاڤینی چووینە سەر خابیری و مە خوە ئێخستە ئاڤێ و نزانم چاوان بیرا من چوو سەر حەبكا فیتامین (D) و من گوت ئەڤە خوش دەلیڤەیە، ئەز چوومە د ئاڤێدا و من خوە بەر هەتاڤ كر، زێدەتر ژ نیڤ دەمژمێرێ من ئەڤ كارەكر و من چ مەرهەمێن سوتنێ ژی د لەشێ خوە نەدابوون و باجا ڤێ چەندێ ژی، سێ رۆژان كەتمە د خانیڤە و سەرێ من د خورییا، ژبەركو سەرێ من یێ نیڤ حوچ بەرگرییا تیشكێن گەرمێن هەتاڤێ نەكر.

هەڤال دبێژنە من هەرە پرچا خوە بچینە و من ژی گوت دا لێگەرەكێ ل ناڤ مالپەرێن ئەنترنێتێ بكەم، زیانێن پرچ چاندنێ و مفایێن وێ چنە، لێ من بەرۆڤاژییا هەڤالێن خوە دیت، ئەڤێن شیرەتێن چاندنا پرچی لمن دكرن، ل چەندین وەلاتان سەرحوچی بدەست كەسێ ناكەڤیت و ئەڤە هندەك وەلات وەك نمونە: (ل وەلاتێ مسرێ و مەغرب، سەرحوچی تاجا زەلامینیێ یە. ل توركومانستانێ زەلام نەشێت ژ ژنەكێ زێدەتر بینیت ئەگەر یێ سەرحوچ نەبیت.. ل بەرازیل مەرجێ كچكێ ئەوە پرچا زەلامی بینیت، ئەگەر پرچا وی یا بووش بیت شوی پێناكەت، ژبەركو ئەو هزردكەن زەلامینی لدەف وان یا كێمە (مەبەست ئینانا زارۆكان).. ل ئوزبەكستانێ ژی یێ سەرحوچ بیت، مەهرا ژنێ نادەت) و لێ ئەڤ مفایێن هەنێ هەمی نەشێن قەناعەتێ بۆ من دروستبكەن، جارەكا دی ب سەركولی خوە بدەمە بەر هەتاڤێ، خوە ئەگەر ل تەرمەیێ مالێ ژی بیت.

--------------------

رۆژناما ئەڤرو ژمارە 3416 یا رۆژا 17/10/2023