سلاڤەك بۆ سەیدایێ حەجی

عبدالرحمن بامەرنی

سەیدایێ حەجی كورتكریێ سەیدایێ (حەجی برەھیم) بوو، ھینگێ ئەز ل پێنجێ سەرەتایی بووم و ئەو بۆ مە ل وانا ئاینی دھات، تشتێ ژ بیرھاتنێن سەیدایێ حەجی چ جارەكێ ژبیرا من نەچیت و من بۆ خوە وانە ژێ وەرگرتی، دەما ئەنجامێن دووماھیا سالێ ل سەر قوتابیان بلاڤدكرن، باش بیرا من دھێت، ل گورەپانا قوتابخانا بامەرنێ یا سەرەتایی، قوتابی پول پول د رێزكری بوون و ئەنجامێن قوتابییان ژی پول پول ڤێرا دھاتن و ناڤ گازی دكرن، گەھشتە پولا پێنجێ و بۆ دلقوتكا مە، دەما سەیدایێ حەجی ناڤێ من خاندی، ھوسا گوت: "كورێ مەلایی یێ ل دەرسا ئاینی كەفتی!". راستی ئەڤ شێوازێ سەیدایێ حەجی پێ ناڤێ من گازی كری و ئەز ل وانا ئاینی (ئێكمال) دەرچوویم، رەنگڤەدانەكا گەلەك مەزن لمن كر، ل دەستپێكێ و ل وێ سالێ، تا من وانا ئاینی راكری، ئەز یێ شكەستی بووم، ھەر ژبەر خوە ژی نە، ژبەر بابێ خوە، كو باھرەكا وێ شكەستیێ من د چاڤێن وی ژیرا ددیت، ئەو كەسەكێ خواندەڤا، ھەر ل زارۆكینیێ ئەز دانایمە بەر دەرسێن خواندنا قورئانێ و دووماھیێ من خەونێن وی بن ئاڤكرن، ھەر چاوا بیت من ئەو وانە راكر و ئەز دەربازی پولا شەشێ بووم. لێ تشتێ ب سەرێ مندا شكەستی، ل وانا ئاینی ئەز قوتابیەكێ زیرەك بووم، ژ خوشییا پرسیاران، من دوو پرسیار ھەر بەرسڤ نەدان، من ژبیركرن و ئەڤە بۆ ئەگەرێ ئێكمال بوونا من، لێ سەیدایێ حەجی ئەز فێركرمە تشتەكێ باش، كو ئەز خوە ب قەردارێ وی بزانم، وانەكا جوان نیشا مندا، تا سەر ھەستی ئەز پێگیریێ پێبكەم و نە بتنێ ئەز، بەلكو ئەز بۆ ھەر كەسی د بێژم و بۆ وە یێن خواندەڤا ژی، ئەو ژی كارێ مرۆڤ پێ رادبیت، دروست ل سەر وی كاری راوەستیت، یان دڤێت ھەر ژ دەستپێكێ مرۆڤ خوە ژێ ڤەكێشیت، یان وی كاری باش دیراسەت بكەت و پلاندارێژیەكێ بۆ دانیت، خوە ئەگەر ئەو پلاندارێژی یا ھزركی ژی بیت.

• درۆژناما ئەڤرو ژمارە 3408 یا رۆژا 2/10/2023ێ دا بلاڤ بوویە.