ئەز و پەرتووك

عبدالرحمن بامەرنی

تشتەكێ ئاساییە ھەر تاكەكی گرنگیدانێن خوە ھەبن و یا من بخوە پەرتووك بوون. تشتێ ئەز كێشیایمە جیھانا پەرتووكێ، ئەو جیھان بوو یا ژ دەرڤەی خەیالێن من، ژ دەرڤەی خێزانێ، ژ دەرڤەی قوتابخانێ و ئەوا دناڤ پەرتووكێن قوتابخانێدا، ئەڤ سێچارەكێن من گوتین، تشتەكێ ئاساییە بۆ ھەر تاكەكێ ژیانەكا ئاسایی ببەتە سەر، لێ دناڤ پەرتووكێدا، مرۆڤ جیھانەكا جوداتر دبینیت، سەربورێن كەسێن دی، روودانێن سەیر و ڤەگێرانێن لایەنێ دی یێ مرۆڤ تێدا دژیت. بیرا من ل ڤەگێرەكێ دھێت، گوندیەكی كو بتنێ دەوروبەرێن گوندێ خوە دیتی و تێدا ژیایی، جارەكێ (بابە دەروێشەك) ل گوندێ وان دبیتە مێھڤان و دبێژیتێ ژ دەرڤەی گوندێ وە، جیھانەكا دی یا ھەی، جیھانەك گەلەك مەزنتر و جوداتر ژ ئەڤا ھین دبینن و مامەلێ دگەلدا دكەن. ئەو ژی مەرەق دكەت وێ جیھانێ ببینیت یا جوداتر ژ ئەڤا مەلای ل رۆژێن ئەینی بۆ گوندیا بەرچاڤدكر، ئەڤا وی ھزردكر جیھانەك گوندێ وییە و یا دوێ ئاخرەتە. ئەو ژی رێكا ھاتن و نەھاتنێ دگریتە بەر و گوند بەر گوند تا ل گوندەكی دەركەفتی و مەزناھییا وی گوندی دەھجاركی ژ یا گوندێ ئەو لێ دژیا مەزنتر. ئینا زڤریڤە و چەندین شەڤبێریان ئەڤ جیھانا نوی كەتیە بەرچاڤێن وی بۆ گوندییا ڤەدگێرا! ئھا من بەحسا ڤێ جیھانێ یە و د پەرتووكێدا مرۆڤ لێ ئاشنا دبیت، ئەگەر مە بڤێت ئەم پێناسەیەكێ بدەینە ژیان و ھەبوونا خوە. لبیرا منە بەری سەرھلدانێ بوو، ئەز و ھەڤالەك، كو ئەو ژی وەك من حەژێكەرێ خواندنا پەرتووكێ بوو، مە زانی ل بەغدا رێكا پێنج دەمژمێرا ژ دھوكێ دیرتر، ل رۆژێن ئەینی ل جھەكی سەرێكزێدەكرنا پەرتووكان یا ھەی، مە ئەو رێك ھەمی دا بەرخوە و من رۆمانەكا (فیكتور ھیگوی) كری و تشتێ ئەز پالدایمە ڤێ نڤیسینێ ژی، دەما ئەز دناڤ پەرتووكخانا خوە دگەریام، چاڤێ من چوویە سەر وێ پەرتووكێ و ھەر چەندە چیرۆك و سەربورێن من و پەرتووكێ گەلەكن، لێ تا ڤێرە رۆژنامە رێكێ زێدەتر نادەتە نڤیسینێ.

*د رۆژناما ئەڤرو ژمارە 3430 یا رۆژا 2023/12/11 دا بلاڤ بوویە.