سرا نانی و كلتورێ‌ ژ دەستدانێ‌

عبدالرحمن بامەرنی

ل تاخێ‌ ئەز لێ‌ ئاكنجی، چوار فرنێن نانی لێهەنە و دوو فرن ژێ‌ یێن سەمونانە و دوو فرن ژی، یێن پێڤەدانا سەوكان، لێ‌ بۆ خوارنا تێشتێ‌ و ئینانا نانی، من هەر چار دانە سەرپێ‌ و دەرێن هەمییان د داخستی بوون. تا ڤێرە تشتەكێ‌ ئاساییی بوو، ژبەركو دوو ژوان فرنان ب سیستەمێ‌ غازێ‌ كار دكەن و بەهانا وان، ئەگەر پلێن گەرماتیێ‌ دبن (سفر)ێ‌ دابن، غاز دبیتە بەستی و فرنە كار ناكەت، زێدەباری ژبەر كەتنا بەفرێ‌ و نزمبوونا پلێن گەرمێ‌، ب بریارەكا فەرمی، بێهنڤەدان بۆ هەمی دام و دەزگەهێن میری هاتبوو راگەهاندن. من گوت تا ڤێرە تشتەكێ‌ ئاسایی بوو، لێ‌ یا نە ئاسایی، من ئێڤاری قەستا فرنێ‌ كر، كو نانی بۆ شیڤێ‌ بینم، سرا نانی گەلەك یا درێژ بوو و تشتێ‌ سەیر، ئەڤێن بەری ئەڤرو دوو نان یان چار نان دكرین و تێرا وان دكرن، دوو قات و سێ‌ قات نان دكری! ئەڤە ژی وەك چاڤ ترسیانەك، بتنێ‌ كو ئێك دانە فرنە ژبەر هوكارێ‌ بەستنا غازێ‌، فرنە نەشییان كارێ‌ خوە بكەن، من پسیار ژی ژ كەسەكی كر، كو چەند نمونێن وەك وی ل بەر فرنێ‌ و سرا نانی بوون، من گوتێ‌: ما بهایێ‌ پێنج هزار دیناران یانكو 20 نان، بۆ هەوە گەلەك نینن؟ گوتی، مانێ‌ دێ‌ كەینە د بەفرگرێدا، ئەرێ‌ لڤێرە پرسیار، ما دێ‌ قەیرانا داخستنا فرنان یا بەردەوام بیت یان بتنێ‌ ئەڤرو بوو؟! پێنەڤێت دگەل ئەڤرو دێ‌ بدووماهی هێت، لێ‌ هێشتا ئەم نەشیاینە خوە ژ كلتورێ‌ ژ دەستدانا تشتان رزگار بكەین،
كو بابەت بخوە چەندین رەهەندان د هەلگریت، ئەڤە ژ سەرهلدانێ‌ وەرە ئەم نەشیاینە كلتورێ‌ بەری سەرهلدانێ‌ و ژ دەستدانا تشتان ژناڤ خوە راكەین، كو ژ رەنگەڤدانێن وێ‌، تا نوكە ژی كەس پارێن خوە ل پانكا نادانیت و كەسێن زەنگین پارێن خوە دبەنە دەرڤەی وەلاتی و پرۆژان دروست دكەن و چەندین بابەتێن ژڤی رەنگی، كو تا ئەم خوە ژڤی كلتورێ‌ سەقەت رزگار نەكەین، چوونا مە یا بەرەڤ پێش ژی، دێ‌ لەنگی پێڤە یا دیار  بیت.... !

http://www.rwangauraxna.com/ba/detail.aspx?IDNews=171&fbclid=IwAR0Tilu_DbMVlfunuQ62HF8VJs8rlVnSuGea5Mf3ZgDKD8r9hMcxLxzT_ZI