عبدالرحمن بامه‌رنى
دهوك بەر ب پایتەختێ گەشت و گوزاری یێ هەرێما كوردستانێ، ئەڤە درووشمێ دیدارا گەشتیاری بۆ ل پارێزگەها دهوكێ هاتیە رێكخستن. درووشمەكێ كورت و ئەگەر گەلەك ب سادەیی ڤی درووشمی شلوڤە بكەین، یان كو مە ئەو عەقلیەتە هەبیت، ئەو گەشتیارێ سەرەدانا دهوكێ بكەت، پێنەڤێت بەریكێن وی د تژی پارەنە، ئەم چاوان پاران ژ بەریكێ بینینە دەرێ (مەبەستا بن دزیكرن نینە)، ئەم خزمەتێ بۆ پێشكێش بكەین و ئەو كەسێ پارەی ددەتە مە، وی خزمەتەكەك ژمە دڤێت و كەنگی مە شییا وێ عەقلیەتێ پەیدا بكەین، ئەم خوەشگوزەرانیێ بۆ وی گەشتیاری بەرهەڤ بكەین و خزمەتا وی بكەین، ئەڤە رێكا مە بەر ب پایتەختێ گەشت و گوزاری كورت بوو؟!!
ئەز دێ ب نمونەكێ دەست پێكەم، بەرییا چەندین سالان ئەز بۆ بەهیەكێ ل سەرسنكێ بووم، د دان و ستاندنەكێدا دگەل چەند هەڤالێن خوجهێن وێ، ئێكی ژوان گوت: (دەما ئەم مە بڤێت ئەم ژ دهوكێ بهێینە سەرسنكێ، ئەم شەرم دكەین بێژینە شوفێری دێ چینە سەرسنكێ)، ب بەهانا كو ل سەرسنكێ بارێن مەی فروشتنێ و جهێن لەش فروشیێ لێ هەنە! د بەردەوامییا ئاخفتنێدا، هەڤالێ وی سەبارەت كاری ل سەرسنكێ گوت، (بەری سەرهلدانێ، سەرسنكێ جهێ خودانكرنێ بوو و یێ توڤكێن گولبەرۆژان ژی فروشتبان، دا خێزانەكێ ب خودان كەت و ئەڤە ژبلی ئەو مالێن ل وێرێ، كو ژوورێن خوە ددانە ب كرێ، چ بۆ رۆژەك با یان حەفتیەك با)، هەر وەكو وی گوتی، ل وی دەمی یان بەری سەرهلدانێ سەرسنكێ بۆ هەژاری خێرو بێر بوو، مەبەستا وی گەشت و گوزارەكێ خورت لێ هەبوو. نمونا دی ئەز بێژم، دڤان سالێن بوری دا یان كو پشتی وان دان و ستاندنان، كو ئەز هینگێ سەرنڤیسەرێ رۆژناما چاڤدێر بووم، شەڤەكێ خوەپیشاندان ل سەر جهێن لەشفروشی ل سەرسنكێ هاتە كرنێ و خەلكێ دەڤەرێ (كو هەر تشت ل سەر باژێركێ خوە قەبیل نەدكرن)، هەمی تشت سوتن، جهێن مەی ڤەخارنێ و لەشفروشیێ و هندەك هوتێل خورانگەهـ ژی ژێ قورتال نەبوون.
ئەڤ نمونێن من گوتین، بتنێ بۆ وێ چەندێ نە، ئەگەر مە بڤێت ئەم دهوكێ بەر ب پایتەختێ گەشتیاریڤە ببەین، دڤێت مە ئەو عەقلیەتە ژی هەبیت، دڤێت ئەم ل سەر وێ عەقلیەتێ كاری بكەین، كو ئەم ل پێش هەمی تشتەكی زەمینێ بۆ دروست بكەین، گوتنەكا كوردی یا هەی دبێژیت: "مە خەو ژی دڤێت و مە كەو ژی دڤێت"
ليست هناك تعليقات:
إرسال تعليق