عبدالرحمن بامه‌رنى
هینگێ ئەز ل وی گوندی بووم، یێ لێ ژ دایكبوویم. سال 1992ێ بوو، بەربەركێن زڤستانێ بوون و دڤیابا مە كارێ وێ كربایە. بەرمیلەكا گازێ من هەبوو و چەند خولپەكێن داربەریێ و چەند دارێن هشكارە ژناڤ رەزی من بری بوون و ب تەرەكتورێ من كێشابوونە بەردەرێ خانێ و ب قایدا سوپێ، من كەلاشتبوون. لێ زڤستانا گوندی، ئامادەكرنەكا زێدەتر بۆ دڤییا، بوویە وەك رێیەكا نەچاریێ، من قەستا گەلیكان كر بۆ داربرینێ (ل رۆژئاڤایێ گوندی سێ گەلیك یێن هەین، كو ل ئێك ژوان گەلیكان شكەفتەكا گەلەك جوان بناڤێ0شكەفتا عەیشو نازا لێ هەیە و ئەم ب زمانێ گوندی دبێژینێ، شكەفتا عەیشوكێ). دار برین چاوا بوو: دارێن ب ستوراتییا زەندكا مرۆڤی، بەژنەكێ تا دوو بەژنا د درێژ و دەما مە د برین و د پەچنین، ب شارەزایی ئەگەر مرۆڤی ئێك ئێكە ژووردا فراندبا، تا نزیكی جهێ تەرەكتور د گەهشتێ، ژ چیایی دهاتنە خارێ.
دا بزڤرمە حاسیبێ..! سوپا دارا و د هەر رۆژەكێ دا دێ چەند سوپان هلكەم و د هەر هلكرنەكێ دا، دێ چەند قەدێن داران تێكەم و ئایا دێ زڤستان چەند رۆژان ڤەكێشیت و دێ پێدڤی ب چەند قەدێن داران بم؟! من ئەڤە هەمی د سەرێ خوەدا دئینان و د برن و من پلانا خوە ب جوانی دارێژتبوو. ئەگەر ئەز لدویڤ پلانا خوە چبامە، زڤستانا من وەكی گولەكێ دا دەرباز بیت، لێ شاشییا من د حاسیبا خوەدا كری، تەماعكاری بوو. من گوت ئەگەر زڤستان یا خوش بیت و خانیێ ئەز تێڤە ل نهوما دویێ یە و لبەر تیرۆژكا هەتاڤێ یە و ئەگەر ئەم شیاین چەند دانێن رۆژێ ل بەر هەتاڤێ بمینین، دێ گەلەك سوپە ژمە ڤە بن و دێ گەلەك قەدێن داران زێدەكەن و دێ بۆ مە مینن. من بۆ خوە گوت: دارێن من ژ ناڤ رەزی ئیناین، كو قورم و خولپێن بری بوون، ئەز وان بەری ئەڤێن من ژ چیایی ئیناین ب سوژم، تا نزیكی بهارێ دبن، دێ ئەڤێن دی هشكارە بن و دێ بۆ تەنیرێ و نانێ سێلێ دباش بن و دێ بارگرانیەكا دی ژمنڤە بیت، ئەو ژی كێشانا دارا و هەژكا. لێ پێشبینیا من ب سەرێ مندا شكەست و زڤستان بەرۆڤاژییا هزرا من هات. زڤستانەكا سار و بەفرین و خوە ئەو رۆژێن تاڤا رۆژێ ژی هەی، ژبەر سەرمایێ ئەم نەشیاین بچینە بەر تیشكا وێ و سوپا مە هەر یا پێدادای بوو. ئەو زەندكێن من ژ چیایی ئیناین، من بۆ دووماهیێ هێلابوون، ژبەركو گەلەك هشكارە بوون و دەما من گرێل كرین، گەلەك ب بەرا و كەڤرا كەفتبوون، خوە لبەر سوپێ نەدگرتن و دبوو چقچقا وان و زوی دبوونە خولی.
هەر چەندە بۆ سوحبەت من هەڤالێ خوە كرە دناڤ بابەتیرا، لێ مەبەستا من رك و رك حكومەتە، هەر ژ رێڤەبەریێن بچویك بگرە تا دگەهیتە وەزارەتان و هێشتا بلندتر. ئەگەر هینگێ حساب و پلانێن من بتنێ ئینان و برنا د سەرێ مندا بیت، پا ئەڤێن من گوتین هەر ئێكی ژوان چەند شیرەتكار لدووران هەنە، ئەڤ شیرەتكارێن هەنێ ژی بتنێ كارێ وان دانانا پلانانە. لێ نە پلانا من ژ بەر تەماعكارییا من سەرگرت و نە ژی پلانا وان سەردگریت، ژبەركو هەر ئێكی ژوان دڤێت (حیلێ) ل یێ دی و ل یێ ژخوە مەزنتر بكەت. لێ د ئەنجامدا، هەر چەندە من پلان هەبوو، لێ ژ تەماعكارییا من، ئەز و خێزان ل بەر سەرمایێ ماین، لێ ئەڤێن من ژێ گوتین، هەر چ پلان ژی نینن و ئەڤرو یێ جاددەكێ چێدكەن و سوبەهی یێ خرابدكەنەڤە، ژ تەماعكاری و بێ پلانییا وان، ئەڤرو هاولاتیێن مە هەمی د قەیراناندا دنالن، قەیرانێن نەبوونا كارەبێ و نەبوونا گازێ و پەنزینێ و بێكاریێ و هەژاریێ و لیستە گەلەك گەلەك یا درێژە و ئەڤە قەیرانا موچەی ژی هاتە سەر!!.
*گوتار ل سه‌ر مالپه‌رى
*گوتار ل سه‌ر فيس بوكى مالپه‌رى
ليست هناك تعليقات:
إرسال تعليق