قەهوا من ژی خلاس بوو و كورونا نەچوو

عبدالرحمن بامەرنی

سەیر نەبینە دەما ئەز مانشێتەكێ‌ ژڤی رەنگی بۆ گوتارا خوە بدانم، ژبەركو ئەز عاشقێ‌ ڤەخارنا قەهوێ‌ مە و ئەگەر ڤەگێرەكا خوە دگەل ڤەخارنا وێ‌ بێژم، زێدەتر ژ حەفتیەكێ‌ من ل مال قەهوە نەڤەخاریە، ژبەركو كوپێ‌ من یێ‌ قەهوێ‌ شكەست بوو و بێژمەتە نیڤا دكانێن دهوكێ‌ یێن تایبەتمەند بفروشتنا ڤان جورە تشتان، من یێن تێكڤەداین، تا من كوپەك بدلێ‌ خوە دیتی و دوبارە ئەز ل ڤەخارنا وێ‌ زڤریم. خەما من یا مەزن، نە مانا من د خانیڤەیە و بێهن تەنگی، ژبەركو بۆ كەسەكێ‌ وەكی منێ‌ تەمەنێ‌ خوە دناڤ پەرتوكانرا دەرباز كری، مانا بتنێ‌ بۆ وی بێزاری نابیت، تایبەت ژی نوكە ئەز مالپەرێ‌ (روانگە و رەخنە) برێڤە دبەم، لێ‌ یا من بێزار دكەت، سەرەرای ڤێ‌ ماندیبوونێ‌ یا ئەز ب گوتارێن هەڤالانڤە دبەم، كو رێكخستنەكێ‌ د بلاڤكرنا واندا دروست بكەم و شاشیێن رێزمانی و خالبەندیێ‌ و تشتەكێ‌ (بەرهەڤ) ل ئاستێ‌ پەیاما وان و خواندەڤانی دابیت، ئەز ل سەر مالپەری دانم، دێ‌ بینی گەلەك د سەر بابەتانرا دچن و د خوینن و هەر چنە بیت بابو ئەو تشتێن هوین دخوینن لایك بكەن، هەر چەندە لایكرن د خزمەتا گشتی دایە و دێ‌ خواندەڤا زێدەتر پەیدا بن، كو مەبەستا مە هەمیان، ئەم بەرێ‌ گەنجێن خوە بدەینە خواندنێ‌، شوونا بوبجی و مژوولاهیێن رەنگە بتنێ‌ دەمێ‌ وی دەرباز بكەت و یا راستی ژی، ڤێ‌ لایكرنێ‌ بیرا من ل زارۆكینیێ‌ ئینا، دەما ئەم د چووینە دزیێن باهیڤ تەركان، بەس راستی بیت دەما مە خوە د سەر پێژانی را دهاڤێت و مە بەریكێن خوە ژ باهیڤ تەركان تژی دكرن و ئەم دەردكەفتین، مە پێژان وەكی بەرێ‌ لێدكرە ڤە، ئەڤە نە ژ ترسا خودانێ‌ رەزی، كو بزانیت مە دزیێن وی یێن كرین، لێ‌ ژبەركو مە دزانی وی ماندیبوون یا ب وی رەزیڤە بری و هەر چنەبیت، مە رەنجا وی بەرچاڤ وەردگرت و مە بۆ دوعا ژی دكرن، لێ‌ هوین ژ دوعا ژی (عەفوو)، بتنێ‌ لایك بكەن، دا بزانین ئەم یێن تشتەكی دگەهینین..!

http://www.rwangauraxna.com/ba/detail.aspx?IDNews=454&fbclid=IwAR3AvHgC4St2KpGj4JdGsJEsfqXWM6LX3IY7Ou0aHSvg15nFSDCt2WathB4