كورتە چیرۆكـ 1 ـ
سەعد محەمەد رەحیم
و، عبدالرحمن بامەرنی
رێیەكا سەرئەڤرازی و چەپ و چیرو ئاسێ یە.. بەرێن بچووك ژبن پێن وان د پەشن. رۆژ ل پشت وان، دوور دكەڤیت.. ساڤا ل بەر سینگا دەیكا خوە دخەو دچیت. پێنگاڤێن وان دگرانن و هێشتا یێ هندەكان دبینن، ئەڤێن بەری وان ب سەر چیایی كەفتین.. بدەنگەكێ گەلەك نزم و دژوار، دبێژیت:
ـ ئەم دشیاین پێنج خولەكێن دی ژی خوە بگرین.
زەلام دبێژیت:
ئەگەر مە پێنج خولەكان خوە گرتبا، نوكە ل سەر شوستەیی، ئەم كەلەخێن هاڤێتی باینە.
كچك دبێژیت:
ـ یا تێهنی مە.
پیتەی ب ئاخفتنا وێ نادەن.
ژنك دبێژیت:
ـ تو باش لێنەگەریایی.
زەلام قایشا چانتا بچیك ڤەدگوهێزیتە ملێ خوەیێ راستێ.. دەستێ خویێ چەپێ بلند دكەت.. سەحدكەتە دەستێ خوە.. بۆ جارا دەهێ تەئكید دكەت، وی دەمژمێرا خوە یا (ئولما) یا كەڤن ل سەر كومەدینێ هێلایە.. وەستایی دبێژیت:
ـ من لێگەریا، ل چ جهەكی نەبوو.
ـ ئەگەر تە قەستا ناڤ چەمی كربایە.
ـ باوەرناكەم چبیتە وێرێ.. چ جارەكێ بتنێ ناچیتە ناڤ چەمی.
ـ ما دێ بوچی چیتە بازاری، چ پارە دگەلدا نەبوون؟.
ـ ئەڤ گوتنە چ مفای ناگەهینن، دڤێت لەزێ بكەین.
ـ تو، هەر وەكو تو گرنگیێ نادەی.
تاری ل بەرامبەری وان خوە پەحن دكەت.. خوە ب سەر كەڤر و گیایێ هشكدا دكێشیت.. دەما دەست ب پرێڤەچوونێ كری، چ سیبەر نەبوون، عەسمانی شیناتی و گەرماتی نیشانددا. ل وی دەمی زەلامی هزر ل رۆژێ دكر، ژنكێ ژی چ هزر نەدكرن.. دەنگێ گوللەییان نزیك دبوو و رۆژ دژوارترە، كو رێ بدەت مرۆڤ ببینیت.. نوكە دەنگێ گوللەیان ناهێتە گوهێن وان، دووماهی سەركەفتی، ل بەر چاڤێن وان بەرزە دبن.
ژنك دبێژیت:
ـ ئەم دشیاین خوە بگرین.
زەلام لێ دزڤرینیت:
ـ ئەم دووماهی بووین یێن رەڤین.
ساڤا دەست بگریا خوە دكەتەڤە. ژنك مەمكێن خوە دەردئێخیت و بشكوژێن وان دچنە ددەڤێ ویدا.
ـ ئەگەر تە ل پشت دیواری گازی كربایێ.
ـ مە دەم نەبوو.
ـ تە دەم نەبوو، زارۆكی رزگار بكەی؟.
ـ ما كی دزانیت، دبیت ئەو لناڤ چەمی بیت.
ئاخینكا رادهێلیت.. بەرێخوە ژێ وەردگێریت، ل كچا خوە دزڤریت.. بەرێخوەدانا وێ یا تژی هیڤی، رەجفكان دئینتێ.
ـ د بتلیدا بتنێ چەند چپك یێن ماین.. برایێ تە دێ پێدڤی بیتێ.
ـ ئەو شیری ڤەدخوت.
ژنك بدەنگەكێ كزگریوكی دبێژیت:
ـ پا هەكە ل ناڤ چەمی بیت و وان گرتبیت؟.
كچك دبێژیت:
ـ ئەو هەردەم دچیتە (بەیتوتێ).
د راوەستن.. چاڤێن وان ڤێكدكەڤن.. كچك ل سەر كەڤرەكێ نزیك د روونیت.. زەلام دبێژیت:
ـ نابیت. دا وی گوهـ لمە بیت و ئەم....
ژنك دبێژیت:
ـ تو ب سەر نەكەفتی..
ـ دڤیابا تە.. ئەز بغار چوومە بازاری.
كچك تەئكیدێ دكەت:
ـ ئەو هەردەم ل بەیتوتێ دنڤست.
نە ئارامیێ ژنك گرت.. بەرێخوە ددەتە ساڤایێ خوە.. دەست بگریێ دكەت.. زەلام چانتا خوە ددانیتە سەر كەڤرێ برەخ كچكێڤە.. ب سەر ژنكێدا خوە دچەمینیت، دەستێ وێ یێ زراڤ دگریت.. ئەوی ژی دڤێت بكەتە گری.. نەشێت.. كچك دبێژیت:
ئەوێ هەنێ تشتەكێ ل نشیڤ پرێڤە دچیت.
زەلام و ژنك رادبنە ژ پێرڤە.. دووماهی بایێ گەرم كراسێ رۆژئاڤابوونێ د هژینیت.. كچك ژی دهێت و لدەف وان د راوەستیت.. ساڤا دكەتە گری.. دوماهی چپكێن د بتلیدا ماین د بشێڤنە دەڤێ وی.. ژنك دبێژیت:
ـ دبیت ئەو یێ ددویف مەرا دهێت.
زەلام دبێژیت:
كەس ل وێرێ نینە.
ـ دا خوە بگرین.
ـ پا هەكە ئەو بن؟.
ژنك بێدەنگ دبیت.. ساڤا بێ پێژن دمینیت.. هەر سێكێن دی ژی بەرێخوددەنە بنێ گەلیێ تاری، د چاڤێن واندا هیڤیەكا هشكا بێ ئومێدە.
بەغدا/ ئاب 2014
ـ 2 ـ
روودانەكا گەرم
هێشتا ل چایخانێ، دەنگێ كت و متێن گوللەیان دهێت.. دەنگ ژ كولانێن پشتێ دهێت.. رۆژنامەڤانێ پیر پێشنیار دكەت قەستا وی جهی بكەت و روودانێ رومال بكەت.. وێنەگرێ گەنج دبیتە رێگر:
ـ دڤێت ئەم د شێت بین، تا لڤی دەمی ئەم دەركەڤین.
ـ ئەڤە كارێ مەیە.
ـ كارێ مە نە ئەوە ئەم ب پێن خوە، بەرەڤ مرنێڤە بچین.
دێ بینە دەستپێشخەرێن بلاڤكرنێ.
ـ ل ئاخرەتێ!.. كی گرنگیێ پێددەت؟.
رۆژنامەڤانێ پیر داخوازا پیالەكا دییا چایێ دكەت.. وێنەگرێ گەنج بەرەڤ ئاڤ تەزینكێڤە دچیت و كوپەكێ ئاڤێ ڤەدخووت و دزڤریت.
ـ ئاڤا تێهن شیرە و چ تام تێدا نینە.
ـ یا باشترە تو چایەكێ ڤەخوویی.
ـ یا باشترە نوكە ئەم ل مالێن خوە بین.
ـ تو بكێر ڤان كاران ناهێی.
وێنەگرێ گەنج جگارا دووماهیێ ژ پاكیتێ دكێشیت ئەڤا ل سەر مێزا ل بەرامبەری وی دانایی.. رۆژنامەڤانێ پیر ب ئاڤریەكا دلپێڤەبوونێ تەماشای وی دكەت.. چایچی پەیالا چایێ دئینیت و پسیار دكەت.
ـ تو چ دبێژی ماموستا؟ دێ كەنگی ئەڤە بدووماهی هێت؟.
رۆژنامەڤانێ پیر فرەكێ ل پەیالا خوە ددەت و هەر وەكو وی گوهـ ل پسیارێ نەبووی، رۆژنامەڤانێ گەنج كەنیەكێ بەرددەت.. چایچی سەروچاڤێن خویێن خوهدای ب پشتا دەستێ خو، ڤەدمالیت. ژ نشكەكێڤە دەنگێ پەقینەكێ، نزیكی ئەو جهێن لێ دهژینیت.. شیشێ پەنجەرەكێ د شكێت و توز دهێتە خوار.. بەری دەنگێ قیژیێن مرۆڤان و زیڤێنا گوللەیان و مشێنا ئوتومبێلێن بلەز، هەمی تشت بێدەنگ و شر دبن.
هندەك ژ دەرڤە دهێنە ناڤ چایخانێ و پاشی ژنەك دهێتە د ژوورڤە و زارۆكەكا لاواز دكێشیت و دبیت، نە گەهشتبیتە تەمەنێ قوتابخانێ.. هەمی چاڤ لدوور دزڤرن.. ژنك ب دەنگەكێ تژی هیڤی دبێژیت:
ـ كورێ من.. من كورێ خوە د پەقینێدا بەرزەكر.
چایچی شیرەتا لێدكەت:
ـ پیچەكێ لڤێرە بمینە، هەتا تشت بێدەنگ دبن.
ژنك دكەتە گری.. كچك دەیكا خوە دبینیت یا دكەتە گری، ئەو ژی دەست بگریێ دكەت، رۆژنامەڤانێ پیر دبێژیت:
ـ خانما من ئەز دێ نوكە دەركەڤم و ل زاروكێ تە گەرم، سالوخەتێن وی چنە؟.
ـ ژنك ب كزگریوكیڤە سالوخەتێن زاروكێ خویێ بەرزە و ناڤێ وی بۆ دبێژیت.. رۆژنامەڤانێ پیر دەردكەڤیت.. وێنەگرێ گەنج ددویفرا دچیت، بێی ئێك پەیڤ ژی بێژیت.
• د رۆژناما صباح كوردستان ژمارە 50 دا بلاڤ بوویە.
ليست هناك تعليقات:
إرسال تعليق