نەوال سەعداوی
وه‌رگێران, عبدالرحمن بامەرنی
دكتورە ل زانكویێ ماموستایا ئابورێ بوو، ئەو من بنەزان گونەهبار دكەت، دەما ئەز ل سەر بابەتێن ژنان د نڤێسم، دفنا خوە بلند دكەت: "نەوال ئەڤە گوتنێن هیچ و پوچن، ئابور داینەمویێ مێژویێ یە"، دا بێژمە وێ: ژن نیڤا وەلاتی یە، وەلات و ئابور بێی ژن ئازاد نابن، د مێژویێدا سیستەمێ تەبەقی دگەل یێ باب سالاری جودا نابیت، ئابور گرێدایە ب سكسی، سیاسەتێ، رەوشەنبیریەتێ، زانینێ، جڤاكی و رەوشتی و ئاینی و .. و.. و.
ماموستایا دكتورە گوهێ خوە نە ددا من، ل حەفتیان، هەڤژینێ وێ بۆ ماموستایێ شەریعەتی و بۆ ئێك ژ ستێرێن زانینێ و ئیمانێ، شەریعەت و ئابور پێكڤە گرێددان، بەنكا باوەریبوونێ و بەرەكەتا روو ڤەبینێ، (تیربوون) دكرە سەرێ خوە، ئەوا ژ حیجابێ پێشكەفتیتر و مكیاج و سوراڤا توخا ل سەر لێڤێن خوە ژی دهێلا. پشتی سالێن هەشتییان ژی چاڤێن وێ یێن كلدای دكونا پێچەیێ را دەردكەتن، سەروچاڤێن وێ و لەشێ وێ دبن پەروكەكێ رەشێ ستوور را، هاتنە ڤەشارتن و نە دەنگ و نە پێژن، بتنێ زمانێ وێ بەردای ما. ل دەرگەهانددا، د هاڤێژیتە هەر كەسێ ل سەر ئازادییا ژنان باخڤیت یان گوهورینا یاسایا هاوسەرگیریێ و ژ ئێك جودابوونێ و دوو جاركی ل بەرامبەری د راوەستا. هەمی ماف بۆ زەلامی دهێلان و ئەو ژ هەر بەرپرساتیەكا رەوشتی بەرامبەری هەڤژینا وی و زارۆكێن وی بێگونەهـ دكر، زەلام ژی وەك هەسپان ب رهـ و سمبێل و بێی هیچ رێكخستنەكا یاسایی دەركەتن، كچا بچووك بتنێ بەرپرساتیا رەوشتی بەرامبەری زەلامێن شەمبوز دهەلگرت، ئەم قوربانیێن لاواز سزا د دەین و ئەڤێن بهێز، بناڤێ شەریعەتی ئازاد دكەین.
پشتی دەركەفتنا نڤێسینێ د مێژویێدا، هەم گرێبەست هاتنە نڤیساندن و ژ دەستپێكێ ژی گرێبەستێن دناڤبەرا تەرش و كەوالی و عەقاراتێن خانیدا و تا هاوسەرگیریێ و بەردانێ، یاسایا نڤیسیكی بۆ تشتەكێ باوەرپێكری و دناڤ هەمی مامەلێن مرۆڤاندا و ل هەمی وەلاتان پرێڤەچوو و ژوان تونس، مەغرب، ئەندەنووسیا، مالیزیا، دارستانێن ئوسترالیا و ئاسیا و ئەفریقیا و بتنێ ل وەلاتێ مە نەبیت، زەلامێ مصری و تا نوكە دشێت سینگێ خوە تژی هەوا بكەت و بێژیت "تو یا بەردای"، هەڤژینا وی و زارۆكێن وی و بێی هیچ گرێبەستەكا نڤیسكی، دێ خوە ل جاددێ بینن. مصر، بۆ دوماهیا وەلاتان ئەڤێن تایبەت ب گەندەلیێڤە و بلندترین رێژا بەردانێ لێ پەیدا ببیت، تا سەروكێ وەلاتی لدوماهیێ داخازكری كو جودابوون ژی ل دەف نڤیسینگەها ماموستایێ ئاینی بهێنە بەلگە كرن، بەلێ ماموستایا ئابوری ب تورەیڤە دەنگێ خوە بلند كر: ئابور بخوە ئاریشەیە، نوكە داخوازكرنا بەلگەناما جودابوونا سەردەڤكی ژبلی بگرە و بكێشی و تێكدانێ چ دی نائینیت، بەردانا سەردەڤكی د دەقێ شەرعیدا یا هاتی و مە بەسە ب یاسایا سوزان موبارەك، كو هەڤژین نەچاركرینە هەڤژینا خوە یا ئێكێ ئاگەهدار بكەت بەری هاوسەرگیریێ دگەل یا دوێ دا بكەت، ئەڤە ژی پێچەوانەی شەریعەتی یە و زەلامی هەمی ئازادییا هەی یا بەردانێ و فرەژنیێ. ل سەر ژنا موسلمان ژی پێدڤی یە بتنێ یا رازەمەندی ئەمر و نەهیێن خودێ بیت، یاسایا سوزانێ بویە ئەگەرێ بلاڤبوونا بەدرەوشتیێ، زەلام بەرەڤ ژن ئینانا دەڤكی (زواج عرفی) برینە، دا كچان دووری چاڤێن حكومەتێ مەهر بكەن، خودێ و پێغەمبەری رێگە پێداینە. نابیت ئەم وان تشتان قەدەغە بكەین، ئەڤێن خودێ و پێغەمبەرێ وی بۆ مە حەلال كرین، بەردان و ژێك جودابووون یێن مشە بوین ژبەر زێدەبوونا هەژاریێ، دگەل گرانبوونێ و تێكچوونا ئابوری و چاوان بەرەللایا رەوشتی پشتی شورەشا یەنایرێ پەیدا بوی و دیوارێ ترسێ هاتیە شكاندن، كچێن سەربەردای بێی شەرم ئازادیا خوە دبەنە سەر، هزرێن جودا و هەڤدژ دگەل بەهایێن مە یێن رۆژهەلاتی و شەریعەتێ مە، بلاڤە دكەن.
ئەڤە هندەك ژ لێدوانێن دكتورا ئابوری بوون ئەڤا گەلەك ژ ژن و زەلامان تورە كرین، ئەڤێن نەڤیاین زاردەڤكی هەڤژینێن خوە بەردەن یان پروسا فرەژنیێ بەردەوامی هەبیت، پێچەییا ماموستا ئابوری بۆ (تیربوون)ێ هاتبوو كورتكرن، پشتی شورەشا 30ی یونیویێ و كەفتنا ئیخوانان. برێكا تەلەفونێ دەنگێ هندەك ئەندامێن رێكخراوێن ژنان هاتە من و ئێكێ ژوان ب تورەیڤە گازیدكر: ئاخفتنا وێ یا ڤالایە، نەوال ل سەر تە پێدڤی یە تو بەرسڤا دكتورا ئابوری بدەی، من ب مەندەهوشی ڤە گوتێ، پا كا بزاڤێن ژنان؟ وە ب سەدان و هزاران رێكخراو و كومەلێن ژنان یێن حكومی و نە حكومی هەنە، بوچی دەنگێ وە پێكڤە بلند نابیت؟ بتنێ بۆ بەلگە كرنا جودابوونێ لدەف ماموستایێ ئاینی یان دادوەری، بەلكو بۆ دەركرنا یاسایەكا نوی بۆ خێزانا مصری، كو دگەل دەستوری بگونجیت، یاسایەكا سڤیل یا ئێكگرتی دادیێ و یەكسانیێ، بۆ هەمی تاكێن گەلێ مصری ب دەستڤە بینیت، دوور ژ بەرێخوەدانا رەگەزی یان ئاینی یان مەزهەبی یان تەبەقێ یان تائیفێ یان تشتێن دی، ب ملیونان ژن ل جیهانێ دژی دونالد ترامب سەروكێ ئەمریكا خوەپیشاندانێن مەزن كرن، ژبەر سیاسەتا وی یا رەگەز پەرستی و تەبەقی و باب سالاری و دژی ژنان و هەژاران و مروڤێن رەش و كوچبەران، هێزا ژنان یا رێكخستی دشێت عەرشێن جیهانێ بلڤینیت، یاسا و رێكخستنان بگوهوریت، ئەگەر ئێكگرتن دگەل هەژار و زەلام و گەنج و زارۆكان هاتە كرنێ؟ گوت: بەلێ.
پاشی رۆژا پاشتر دەنگێ وێ هاتە من و یا دبێژیت: نەوال تو هزر بكە، دهی هەڤژینێ ماموستایا ئابوری یا گوتیێ "دكتورە تو یا بەردایی" و ئەو ئەڤرو یا سەرگەرمە بۆ رێكخستنا خوەپیشاندانەكێ، دژی بەردانا زاردەڤكی.
• درۆژناما صباح كوردستان ژمارە 34 دا هاتیە بلاڤكرن.
ليست هناك تعليقات:
إرسال تعليق