ئیبراهیم سەبتی
وەرگێران: عبدالرحمن بامەرنی
نوژداری بریاردا پیێ راستێ یێ نەساخی ببریت، ژبەركو پنیێن شین ژ سەرێ پێ وی هەتا بنێ پییا ڤەگرتبوون و وەكی پرسكان لێهاتبوون و هوشداریا مەترسیێ ددان.. دەنگێ ترترا مشاری ژ بررینا پێ درێژكری ل نیڤا ژوورێ دەردكەت، ب دوو چاڤێن نە ئارام ل نوژداری دنێری، ئەڤێ بریار ب هەردوو هاریكارێن خوەدای، كو پیێ وی د نیڤەكێرا ببرن.. چەند چركەكان، نوژدار و هاریكارێن خوە ل سەر مێزەكا گروڤر د روونشتی بوون و ب هەلكەفتا سەركەفتنا خوە، چا ڤەدخوار.. بەلێ برینپێچا نزیك قەراویلێ نەساخی، ب حێبەتیڤە گازیكر:
ـ پنیێن شین.. ل پێ چەپێ.. نوژدار!
نوژدار ب غار بەرەڤ "پیێ" وەك دارەكێ هشك درێژكری چوو، ئاماژەدا هاریكارێن خوە كو بلەز مشار ئینای، ترترا وی جارەكا دی دەستپێكرەڤە و هێرشكرە سەر ژوورا خەندقی ژ بێهنێن پاقژكەران.. مێزە وەك خوە لێهاتەڤە و توز پاقژكرن و دەست بگوتنێن قارەمانیێن خوە د بررینا پرتاندا كرن.. برینپێچا برەخ قەراولیڤە روونشتی، بترسڤە گازیكر:
ئای خودێ! بلندبوو دەستێ راستێ ژی!!
هاریكارێن وی خوە هاڤێتن و ل پنییان نێرین، ئەڤێت تژی ملێ زەلامێ هایش خوە نەمای بووین.. مشاری بلەزەكا سەرسورهێنەر كارێ خوە كر.. نوژداری و هاریكارێن وی كرنە كەنی و دان و ستاندن ل سەر هەژارێ هێشتا ژ نەهشییا خوە هشیار نەبووی.. نوژداری ب لێبورین و هەلچوونڤە گوت: نەفرەت ل پنیێن شین بن! ئەگەر مە ژێڤەنەكربان، دا هەر زوو وی ژناڤ بەن! ئەو ب مەترسینە، بەلكو د كوژەكن.. ئەم دێ وی رزگار كەین، ئەگەر خو شەڤێ هەمیێ ژی پێڤە بمینن! هەژاری.. برینپێچێ ل زەلامێ درێژكری یێ ژ هەمی لەشێ خوە كێم نێری، بدەنگەكێ نزم، وەك مرۆڤێن هایش خوەنە، گوت:
ـ وای! دەستێ چەپێ!
نوژداری ئاخینك راهێلا:
بێ ئێخبالیا زەلامی.. ئەم دێ وی ژ مرنێ رزگار كەین، هەكە مە شەڤ هەمی پێڤە بوراندییە!
مشار ژ دەركەفتنا ئاخفتنێن وان یێن دوبارەكری بلەز تر بوو.. نوژداری كەنیەكا خاپینوك بەردا و د دەمەكیدا هاریكارێن وی دگەلدا بدەڤ كەنیبوون.
نەخوش د بێهوشیا خوە دایە و هەمی لەپێن وی د ژێڤەكرینە. برینپێچا كارێ وێ چاڤدێری، گازیەكا وەك بریسیێ ل سەر سەرێ وان بەرددا:
ـ ل سەر ئەنیا وی! ل سەر دفنا وی.. ل سەر ستوویێ وی!
نوژداری بێ گوهدان گوت:
ـ مشاری.. مشاری
دەنگێ مشاری بلند بوو و یێ ب ستوویێ نەساخیدا دچیتە خار و پشتی چەند چركان وەكی كیسێ بتاتان لێهات.. نوژداری "سەر" دانا عەردی، نزیك پرتێن دی یێن رێزكری ل سەر عەردی.. د دەمەكیدا هاریكاران پرتێن دییێن لەشی د پەنجەرا ژوورێدا هاڤێتن! سەر نزیكی لەپا كرن، نوژداری هزر د پنیێن بلاڤكری ل سەر دكر و گوت:
ئەگەر من شەڤ هەمی بوراندییە! دڤێت بەرزە ببن.. دڤێت نەشتەرگەری یا سەركەتی بیت!
د رۆژناما صباح كوردستان ژمارە 31 دا بلاڤ بوویە.
ليست هناك تعليقات:
إرسال تعليق