عبدالرحمن بامەرنی
نڤیسەرێن فلمان حەزدكەن بەری زانستی راكەن، ھەر چ مەبەست پێ ھەیبت، چ بۆ خوشییا فلمی و نوییاتییا فلمی بیت، چ پێشبینی بن بۆ ئەڤا زانست ھێشتا نەگەھشتیێ و چ ژی ھشیاركرنەك بیت برێكەكا نویی و دڤی فلمێ بناڤێ (ددەمێ گونجاییدا)، ھەر سێ تشت دكەڤنە بەرچاڤێن بینەری و دا ژ چیرۆكا فلمی دەستپێبكەین. چیرۆكەكا سەیر و رەنگە ھەڤشێوەیێن وێ نەبن و چ جارەكێ ژی زانست نەگەھیتێ، لێ پەیامەكا ڤەشارتی و بترس دگەلدا ھەیە، ئەگەر جارەكێ بۆ راستی و دگەل زانستی و تەكنەلوجیایێ ھەمی تشت چێدبن. ھەر ژ دەستپێكا فلمی ل سەر دەستێ ھەمی كەسێن د فلمیدا بەشدار، ژیێ وی ب چركە و خولەك و دەمژمێر و سال ل سەر دەستێ وییێ چەپێ دیاردكەن و تشتێ سەیر، خەلك مامەلێن كرین و فرۆشتنێ ب ژیێ خوەدكەن، دشێن یان ژیێ خوە درێژ بكەن یان كورت بكەن و بۆ نموونە، ئەگەر كەسەك پێدڤی خارنەكێ بوو یان كرینا تشتەكی دێ بھایێ وێ دەت، رەنگە 30 خولەكێن ژیانا وی بن و زەنگینی و ھەژاری لدەف ڤی خەلكی ل سەر وێ ژمارێ دیار دبیت كا چەند ژ ژیێ وی مایە و ھوسان فلمی چەندین روودان و دزی و تاوان و كوشتن تێدا ھەنە، ھەمی ژی بۆ بدەستڤەئینانا ژیەكێ درێژتر.
دا كورتبكەم، ل ئێك ژ دیمەنان، قارەمانێ فلمی ل ئێك ژ ویستگەھێن پاسێ لھیڤییا دەیكا خوەیە دا ژ دەستێ خوە چەند دەمژمێر و رۆژێن ژیێ خوە بدەتێ و دەیكا وی بتنێ ئێك دەمژمێر و نیڤ یێن ماین، ئەگەر ژیێ وێ نەھێتە درێژكرن دێ مریت و دەما ل پاسێ سیار دبیت، شوفێرێ پاسێ دبێژیتێ كرییا رێكێ و دڤێت دوو دەمژمێران ژ ژیێ خوە بدەت و وێ ئەڤ ژییە نەمایە و ئەگەر ژیێ خوە ھەمیێ بدەت ژی ھێشتا نیڤ دەمژمێر دمینیت، ھندی دبێژیتە ئەڤێن د پاسێدا چەند خولەكەكێن ژیێ خوە بدەنە من، لێ كەس یێ بەرھەڤ نینە ڤێ چەندێ بكەت و بریارێ ددەت بكەتە غار و ھەر چ زوویە بشێت د ژیانێ دا بمینیت. ژ پاسێ دھێتەخار و دكەتە غار، دگەھیتە كورێ خوە و خوە دئێك وەردكەن و لێ پاترییا ل سەر دەستێ وێ رۆناھی تێدا نامینیت و ئەو دووماھی چركەیا ژیێ وێ بوو و دناڤ دەستێن ویدا دمریت.
تشتێ وەك پەیام ئەز ژ فلمی تێگەھشتیم، ژیێ مرۆڤی یێ دەرباز دبیت، راستە چ دەمژمێر ل سەر دەستێ مرۆڤی نینن كو ژیانا مرۆڤی یا مایی بینە بیرا مرۆڤی، لێ فلم بھایێ ھەر خولەكەكێ نیشا مرۆڤی ددەت، رەنگە ئەگەر وێ دایكێ ئێك خولەكا دی ھەبایە نەدمر و رەنگە دەھان خولەك و دەمژمێر و رۆژێن خوە بھەروە یێن دەرباز كرین و كرینا تشتێن بێ بھاڤە.
ـــــــــــــــــــــــــــــــــــــــ
رۆژناما ئه‌ڤرۆ 3648- 2024/ 05/12
ليست هناك تعليقات:
إرسال تعليق