عبدالرحمن بامەرنی
ھینگێ ھەمی تشت دجوان و سادە بوون، مە ھزردكر ھەمییان باشییا ھەمییا دڤێت و ھەر كەسێ سویند بخووت، ئێدی ئەو راستییێ دبێژیت و گەلەك جاران دا سویند خووین و دا بێژین دڤێت ھەتا ژمارە سەد ھەناسا خوە بگرین؟! چاڤێن مە دسەرێ مە را سوور دبوون و مە ھەناسا خوە بەرنەددا، ژبەركو مە سویندا بڤێ چەندێ خاری. مە دگوت دلێن ھەمیان دنەرمن و چ كەرب و كین ھەتا ھەتایێ نینن و سلبوونا ژ ھەمییان درێژتر، یا حەجویێ فەلەكێ و ئەحمویێ بنێ گیزێ بوو و ئەم ھینگێ راوەستییاین، ھەتا مە پێكئیناین و ژخوە دزی ھەر شەرم بوو، دەما ئازویێ سەعدێ لوقمەك ژ دكانا ئەحمەدێ لەیلایێ دزی،
ھەتا ئەم مەزن بووین ژی مە بیرا وی لوێ دزیێ دئینا و ھینگێ خوشترین رۆژێن مە دەما ئەم زارۆك لێك خرڤەدبووین، مە (شەندێ و مەندێ) دكر و مە دەست ب یاریكێن خوە دكرن، كێ ژمە ژكێ بر باییە، مە نەدكرە دلێ خوە و لدووماھییا یاریێ مە ئێك و دوو حیل دكر و ئەو رۆژ چوون و ئەم مەزنبووین، دگەلدا خەونێن مە ژی مەزن بوون و لێ بیرھاتنێن مە وەك خوە مان، ئێدی سویندخارن وەك نەما، ھینگێ دگوتن ھەر كەسێ ژ درەو سویند بخووت دێ ب (دارا مەلە عەمەری)ڤە رەق بیت، نۆكە سویند خارن ھندا مشە بووی، وەكی توفكێن گولبەرۆژا یا لێھاتی و دەما مە دەستێن خوە د سەر ملێن ئێك را دبرن و مە دگوت: (ھەڤال ھەڤالۆشكێ، نانێ قەلقەلۆشكێ) و ئەو ھەڤالینی ژی نەما، تاكە تشتێ دبیرا مندا و وەك خوە مایی، دەما مە دگوت: (ھەر كەسێ نانێ قەلقەلۆشكێ و یێ سووتی بخووت، دێ بۆ خوە پارا بینیت) و ئەوێن دھی ب نانێ قەلقەلۆشكێ دھاتنە سەر سفرێ و چوار مێركییا خوە ڤەددان، ئەو بێ (شەندێ و مەندێ) یێ یاریێ دكەن و نە كەس وان حیل دكەت و نە ئەو فێر بووینە (تبلا قلیچێ) بكەنە دناڤ تبلا كەسەكێ دیدا و بێژنێ" (حیل حیل نە لمن و نە لتە....).
ــــــــــــــــــــــــــ
رۆژناما ئه‌ڤرۆ 3653- 2024/ 12/12
ليست هناك تعليقات:
إرسال تعليق