عبدالرحمن بامەرنی
راستی ژی بیت، كی مێژوویا مە بنڤیسیت؟ ئەڤە ئەو بابەتە گەلەك جاران من دڤێت ب ئازرینم. ئایا وەسانە وەك دبێژن مێژوویا مە ب سترانا گەھشتییە مە؟! دەما بابەت دچیتە سەر دەنگبێژیێ و سترانێن شەران، گەلەك دھێنە پێش و دبێژن مێژوویا مە یا نزیك ل سەر ئەزمانێ سترانبێژان گەھشتییە مە و ھندەكێن دی بۆ پەسەندا گوتنێن ان دبێژن دڤێت ئەم ل سترانێن خوە یێن دەنگبێژیێ ڤەگەرین، ژبەركو ئەم دشێین گەلەكێ ژ مێژوویا خوە یا بەرزە یان یا نەھاتییە نڤیسین، ئەم بنڤیسین. ئەو ژی راست دبێژن، گەلەك ژ روودان و سەرھاتیێن مە یێن بووینە ستران و بدەنگێ دەنگبێژان یێن ھاتینە ڤەگێران و ئەگەر ئەم حەز بكەن، ئەم دشێین ل سەر كار بكەین و چەندەكێ ژ مێژوویا خوە بینینە زمان، ھەر چنەبیت باش یان خراب، ئەم تشتەكی بەلگەبكەین. لێ لێرە ژی پرسبارەك خوە دوبارە دكەت، ئایا ئەو سترانێن گەھشتینە مە، ئەو روودان و شەر و ناكۆكی و مێژوویا دناڤ سترانێدا دھێتە باسكرنێ، ئایا ئەو روودان وەك خوە ھاتینە ڤەگوھاستن یان ل سەر داخوازا ھندەك بووینە ستران و ژ كەسەكی بۆ كەسەكێ دی دھێنە ڤەگوھاستن؟ ئەز باوەرم ئەوا دھێتە ڤەگێران و ھێشتا ل سەر زمانێ سترانبێژان چ ھاتبنە توماركرن یان نڤیسین، رەنگە ئەو نیڤا راستیێ بیت و ھەكە كێمتر ژی نەبیت، ژبەركو تاگیری یان ئەو روودان ل سەر داخوازا ھندەكێن دی ھاتینە گوتن و لادان كەفتییە روودانێن وێ و رەنگە ل گەلەك جھان قارەمانەك ترسینۆك بیت یان نەپاكەك بیت، لێ كریارا وی بۆ ب قارەمانی ھاتییە ھژمارتنێ و لڤێرە چ ل سەر مە پێدڤییە ئەم بكەین، ئایا ئەوا ل سەر كاسێتان ھاتییە توماركرن ڤەوژێرین و بتنێ ژ مرنێ رزگار بكەین یان ژی دیڤچوونێ بۆ بكەین و یا راست وەرگێرینە سەر كاغازێ و یا نە راست لجھـ بھێلین؟ باوەردكەم پێنگاڤەكا ژڤی رەنگی ژی مێژوویا مە بدروستی نانڤیسیت و د ئەنجامدا ئەم نەشییاین چبكەین. بھزرا من، ئێكەم جار ئەم خوە ل بەلگەكرنێ بكەینە خودان، نە بتنێ توماركرنا سترانێ یان روودانێ ژ كەسەكی وەربگرین، بەلكو ل سەر جھێن پەیوەندیدار و سازیەكا تایبەت بڤێ چەندێ بھێتە پێكئینان، ھەر سازییەكا چەندا بچیك ژی بیت و ب سەر چ رێڤەبەری ژی ڤە بیت كێشە نینە، لێ فەرە چەند كەسێن دەستێ نڤیسینێ ھەی و توماركرنێ و ئەرشیفكرنێ دا د شارەزا بن، بھێنە راسپاردن بۆ دیڤچوونێ لڤان سترانان، بھێنە كومڤەكرن، بھێنە نڤیسین، بھێنە ئەرشیفكرن و دێ گەلەكا باشتر بیت، ئەگەر ھەمان روودان و سەرھاتی و چیرۆكا سترانێ ل چەند ژێدەران ژی بدەست بكەڤیت، یێن ھەر ئێكی وەك خوە بھێنە كومڤەكرن و دائەڤ كارە ھێتا باشتر بیت، ئەگەر ل پێنگاڤا دوویێ، زانكویێ مە خوێندكارێن خوە راسپاردبان بۆ ڤەكولینێن خوە یێن دەرچوونێ، كار ل سەر ڤان چیرۆكە سترانان كربا، ئەرێ ھین بێژن د چەند سالاندا ئەم دا چەندێ ژ مێژوویا خوە یا نزیك توماركەین.
ـــــــــــــــــــــ
رۆژناما ئەڤرو ژمارە (3642) یا رۆژا 27/11/2024
ليست هناك تعليقات:
إرسال تعليق