عبدالرحمن بامەرنی
ئەگەر ئەم درێكەفتی بین، كو مافێن ژنان ژ گەلەك روویانڤە دھێنە خوران، ژبەركو بتنێ ژنە! ئەرێ نڤیسینێ چ گرێدان بڤێ چەندێ ڤەھەیە ،چ ژن بنڤیسیت یان زەلام بنڤیسیت؟ ژبەركو نڤیسین زێدەتر پەیوەندییەكا روحییە دناڤبەرا خودیێ مرۆڤی و ئەو تشتێ دكەڤیتە بەرچاڤێن مرۆڤی و چ جارەكێ وێنەیێ نڤیسەری نەبوویە ھاندەر، كو نڤیسینێ ژ نڤیسینێ جوداھییا خوە ھەبیت؟ ئەز نموونا ئێك ژ نڤیسەرێن دھوكێ بەحس بكەم، كو ھەم د رۆژنامێدا كاركرییە و دیسان ئێك ژ نڤیسەرێن بەرنیاسێن دھوكێ یە و چەندین پەرتووكێن خوە یێن چاپكری یێن ھەین، بێی ناڤئینانا وی. ھوسا گوتە من، ئەرێ شێخ ئەز پرسیارەكێ ژتە بكەم، ئەڤ ژنێن بۆ تە دنڤیسن، تو بۆ وان دنڤیسی یان راست مە نڤیسەرێن ژن ھەنە؟ من گوتێ، ئەز بەرسڤێ ب ئەرێ یان نەخێر نادەمە تە، لێ ئەز دێ فەیسبووكا چەند نڤیسەرێن ژن بۆ تە فرێكەم و تو بخوە دگەل باخڤە، ژبەركو ژی تو نڤیسەرەكێ بەرنیاسی، دێ بەرسڤا پەیوەندیێ و پرسیارێن تەدەن و دێ ھینگێ زانی كانێ مە نڤیسەرا ژن ھەیە یان نە و جارەكێ ژی ئێك ژ نڤیسەرێن ژن بابەتەك بۆ من نڤیسا بوو و ئەو بابەت من د مالپەرێ خوەدا بلاڤكر، كو من ئەو مالپەر برێڤەدبر و یێ تایبەت بوو بنڤیسینا گوتارێ، نامەكا تایبەت بۆ من فرێكر و گوت: ئەز دێ شێم داخوازەكێ ژتەكەم؟ من گوتێ بەلێ تو دشێی و ب خوشحالیڤە، گوت ئەڤە من گوتار لدەف تە بلاڤكری و ژبەركو تە ئاماژە ب ناڤێ من ژی دایە، نامێن تایبەت بۆ من دھێن و ب بەھانا بابەتی، دڤێن دانوستاندنەكا بێ رامان ژمن بكەن. گوت ئەز دێ شێم گوتاركا دی نڤیسم و بۆ من بلاڤكەی، كو ھەر كەسێ تێبینیەك ل سەر گوتارا من یا بلاڤبووی ھەبیت، دشێت كومێنت بكەت و چ نامێن تایبەت بۆ من نەھێن؟ مە ئەو گوتار بۆ بلاڤكر و د نموونەكا دیدا، كچەكێ ڤییا گوتارەكێ بلاڤ بكەت و بۆ من فرێكر دا دیتنا خوە ل سەر بێژم، من ژی ھەر تێبینیا ھەی بۆ گوت و راستی ژی بیت، شیانێن وێ یێن نڤیسینێ، شیانێن وێ یێن گەھاندنا بابەتی، شیانێن بەرز بوون و ئەڤا ئەز دببێژم د چەندین روونشتنێن مندا دانوستاندنێن مە د بەردەوام بوون و گوت ئەز دێ شێم راستییەكێ بێژم؟ من گوتێ بەلێ تو دشێی. گوت ئەڤە ئێكەم كەسە ئەز چەند جاران دگەل دئاخڤم و بتنێ دبیاڤێ نڤیسینێدا دانوستاندنێ دكەت و چ بابەتێن دەرەكی و یێن تایبەت نا ئازرینیت و چ پرسیاران ژمن ناكەت. من گوتێ: ئەڤە سوشیال میدیایە و بۆ من گرنگ نینە ژیێ تە چەند سال بیت یان تە چ خاند بیت یان كچا كێ بی یان ل كیش دەڤەرێ بی، یا بۆ من گرنگ، ئەڤ دانوستاندنا دناڤبەرا من و تەدایە كا ئەز چ دنڤیسم و شیانێن تە یێن بەرسڤدانێ چەندن و بەروڤاژی، دڤێت ئەم ڤێ پەیرەو بكەین، ھەر تشتەكی سنوورەك ھەبیت، سنوورێ من و ھەڤنیاسینا من بۆ تە، ئەڤ دانوستاندنەیە و رەنگە من لدوورێن پێنج ھزار ھەڤالان یێن ھەین، د سوشیالێدا وێنە و جوانتر و كرێتی من نەڤێت، بەلكو ئەم ل سەر بابەتەكی د ھەڤرا بین و ژخوە دا ژ بابەتێ خوە دویر نەكەڤم، مە چاوان دەرچوویێن كور یێن زانكویێ ھەنە، مە بەرامبەر وان دەرچوویێن كچ یێن زانكویێ ژی یێن ھەین و چاوان كور دشێت بنڤیسیت، كچ ژی دشێت بنڤیسیت و گەلەك جوان ژی دشێت ڤێ چەندێ بكەت و رەنگ جوداھییا وان، كور دشێت پرسیار بكەت و بابەتێ خوە بلاڤ بكەت، لێ كچ دێ چەندین سانسوران بۆ خوە پەیدا كەت و وێرەكیێ نادەتە خوە و ئەڤە ژی رەنگەكێ توندوتیژیێ یە و مخابن دڤێت زێدەتر دھاریكار بین دگەل وان و رێخوشكەر بین، ژبەركو ژن دبوارێ نڤیسینێ دا دشێت رۆلەكێ گەلەكێ باش بگێریت.
ــــــــــــــــــــــــــــــــــــــ
رۆژناما ئەڤرۆ 3645- 2024/ 02/12
ليست هناك تعليقات:
إرسال تعليق