ژن...! (كورتەچیرۆك)

عبدالرحمن بامەرنی

دێمێ خوە كێشا بەر خۆدیكێ و ھەر ژ برییا بگرە، برۆیێن خوە وەكی كەرێ ھەیڤێ یێن تاتۆ كرین. پشتی دفنا خوە یا ئێخستییە ناڤ دەستێن نوژدارا و نەشتەرگەریێن ئێك ل دویڤ ئێكێن جوانكاریێ، دفنا خوە وەك قەسپێ یا لێكری. لامێن خوە، وەك سێڤێ یێن تژی بۆتوكس كرین. لێڤێن خوە وەكی كەرێ سێڤێ، یێن تژی فیلەر كرین. بێھنا وێ ب بەرێخودانا دێمێ وێ بتنێ نەھات و ھندی جلكەكێ دبەردا مێیاتیا وێ نخافتین، كت كتە ژبەر خودا ئینان. خوە رویت و رویس دیت. ھندەك دبێژنە رووساتیێ تازی، ئەم ژی دێ د چیرۆكا خوەدا بێژین، خوە ل بەر خودیكێ تازی كر و چاڤێن وێ چوونە سەر فنجانێن مەمكێن وێ و ژووردا بۆ ناڤتەنگا وێ یا زراڤ، ئەڤا ب ھەیڤا بەرنامە بۆ خوارنا خوە دانایی و ئێدی چاڤێن وێ ھەمی رووساتیا وێ دكرە شەریتەكا سینەمایی، وەك ئەڤێن ل فلمێن پورنوو چاڤان بۆ خوە رادكێشیت و بیرا خوە ل وان ھەمی گەنجان و پرەمێران ئینا، دەما قەستا بازاری یان جھەكێ گشتی دكر و چاڤێن وان دڤییا وەك نوكە كت كتە جلكێن وێ، ژبەردا بینن. بیرا خوە ل قوتابخانێ ئینا، ئەو ماموستایا بیركاریێ بوو و قوتابیێن وێ ھەمی سنێلەبوون، دەما تەنوورێ خوە یێ سورێ نەدشییا رووساتیا پێن وێ ھەمیێ ڤەشێریت ل بەر خوە دكر و قوتابی ھەمی بێدەنگ دكرن. دەما ماموستایەكی ل ژوورا ماموستایان دگوت، نەخوشترین كار مرۆڤ ماموستا بیت و ماموستایێ قوتابیێن سنێلە بیت، تە دڤێت سەرێ مرۆڤی چاوا ھێر نەبیت و كەنیا وێ دھات، كو ل وانا وێ، قوتابی د بێدەنگن و بتنێ چاڤێن وان، پییێن وێ یێن تازی قەترە دكەن و بیرا خوە ل رەشۆیێ دكاندار دئینا، كولانێ ھەمیێ ناڤێ وی كربوو گێژوو، ژبەركو ھزرەكا وی ل دكانێ بوو و خودێ دزانیت ھزرا وی یا دی ل كیڤە بوو و بتنێ بۆ وێ نەبیت. ھەر گاڤا چووبایە دكانا وی، ھزرێن وی ھەمی ل وێ كومڤەدبوون و ھەر باش بوو دكانا وی یا بەرچاڤ، ئەگەر كی دا وێ ژ دەستێن وی دەرئێخیت و ژ خوە شوفێرێ رەفێ، چەند جارەكێ ئەو ل رەفا وی یا 14 نەفەری سیاربایە، ل ھەر كورسیكا ئەو لێبایە، دا ستێركا خودیكا جامی ب لایێ وێدا زڤرینیت و چاڤێن خوە ئێك بۆ بەرامبەری خوە ددا كاری دا چ روودانان نەكەت و ستێركا چاڤێ وی یێ دی ل دێمێ وێ بوو، ھێشتا كراندنا سمبێلێن وی ل بەر چاڤێن وێنە، چەند جارەكێ ستێركا چاڤێن وی كەتبانە چاڤێن وێ، ئەو سمبێل دكێشانە بەر ددانێن خوە و كرێن ژێ دئینا و چەند كرێنەك ژ میەكێ سمبێلێن وی دھات، ئھا نوكە ھند كرێن یێ ژ دلێ من دھێن.

ئەڤە 42 سالن، ئەڤە ب ھژمار 42 سال ب سەر ژیێ مندا دەرباز بوون، ئەز خەونا ل بەر تەنشتا زەلامەكی دبینم و ئەز دبینم ئەزا بوویمە دەیك و ئەڤە من ھەست ب گوھورینێن لەشێ خوەكرین و من چپكێن سور ب رانێن خوەڤە دیتین، خەونێن من، ئێك من بكێشیتە بەر ھەمبێزا خوە و ھەر كی بیت، ھەر چ ناڤ بیت، ھەر چ عەشیر بیت و ھەر چ حزب بیت و ھەر چ ئاین بیت و ھەر چ ژییەك بیت، سنێلە بیت، گەنج بیت، مێر بیت، ھەما مێر بیت ھەما نێر بیت و ئێدی چ بیت، خوە بلا جیرانێ مە یێ سمبێل بوق بیت یان رەوشەنبیرێ كولانێ، ئەڤێ ھەمی گاڤا رۆژنامەك ددەستیدا. ئەرێ ئەڤێ خواندەڤا، ئەڤێ سەرێ وی حوچ، ئەڤێ خوە بۆ دەرمانی ژی مییەك ب سەرێ ویڤەنە. ئەرێ ھەما خوە ئەو ژی بیت. پانێ دبێژن ئەو رەوشەنبیرین، ئەو پرسیارا یەكسانیێ و پرسیارا مافێ تەخا فەرامووشكری دكەن و ئاخ بۆ 42 سالێن ژیانا فەرامووشكری. ئاخ بۆ ڤی لەشێ تازی. بۆ ڤێ جوانیێ و كەس ب دەردێ دلێ من نەزانیت و ئاخ بۆ منەكا ژار. بۆ منەكا ھەر قەرەبالغیەكا ل جھەكی با من خوە تێدقووتا و من خوە دكێشا بەرسینگا زەلاما و دەھان جاران ژ قەستی ئەز یا چوویمە دكانا گێژووی و خوە جارەكێ ژی وێرەكی نەدایە خوە دەستێ من بگریت و ژخوە شوفێرێ رەفێ چنە، چەند جاران من خوە ڤەدھێلا، من رێكا خوە درێژ دكر و ئەز ل دووماھی وێستگەھـ ژ رەفا وی دھاتمە خارێ، من خوە دخەیشاند و جارەكێ نەگوتە من د رەفێدا بمینە، دێ دەركەڤین و پانێ ھەر رۆژناما تو ڤەكەی، ھەر كەنالێ تەماشەكەی، بەحسا دەستدرێژیێ دكەن و دڤان ھەمی قەرەبالغیاندا من قورنجیكەك ژی ژ دەستێ نێرەكی نەدیت. دەھان جاران بتنێ ئەز یا ل تەكسیا سیاربوویم، پانێ بەحسا پشتا سكرێ دھوكێ دكەن، بەحسا بن كاژێن زاویتە دكەن و دەما شوفێرێ تەكسیێ ژمن دپرسی تە بگەھینمە كیرێ؟ دا بێژمێ ھەر جھێ بیت، بتنێ ئەز ئارام بم و شوفێر دا بێژیت سەرچاڤان خیشكێ و كا ناڤونیشانەكێ بدە من تە بگەھینمێ. شوفێر دبێژیت خیشكێ و نوژدار دبێژیت خیشكێ و خوە بەردەستكێ قوتابخانا ئەز لێ ژی، جارەكێ ماموستا ژ دەڤێ وی یێ ھندی شەكالەكێ دەرنەكەفتییە، بتنێ دبێژیت خیشكێ و ل دووماھیێ ئەز كەفتمە بەر تەنشتا ڤی پیرەمێرێ ترچوویێ فس مایی و ھەر شەڤ حالێ من و وی ئەڤەیە، مێیاتیا من دناڤ خرخرا وی دا بەرزە دبیت و خەونێن من كو ببمە دەیك، دناڤ ترسا كو بتنێ زەلامەك ھەبیت من ستارە بكەت، بوونە ھەلاشە و نە زەلامی ئەز ستارەكرم و نە ئەڤ خودیكا بڤی دیواری ڤە ژ بەرێخوەدانا رووساتییا من تێر دبیت.

ــــــــــــــــــــــــــــــــــ

ـ دگوڤارا پەیڤ ژمارە (98)دا بلاڤبوویە.