عبدالرحمن بامەرنی
كێشا كارەبێ نەیا نۆكەیە و ھاولاتی بەردەوام ڤێ گازندێ دكەن، كارەبا گشتی نینە و ل شوینا وێ كارەبا موەلیدێ جھێ وێ دگریت و ئەڤە ژی دبیتە بارگرانی بۆ خودان داھاتێن كێم، ژبەركو چەند دەمژمێرێن كارەبا گشتی كێم بن، د بەرامبەردا دەمژمێرێن كارەبا موەلیدێ زێدە دبن و ھینگێ بھایێ ئەمپێرێ ژی دگەلدا زێدە دبیت و ئەڤە ژی گازندەیێن ھاولاتییان ددویف خوە را دئینیت، ھاولاتی گازندەییان ژ خودانێن موەلیدان دكەن، كو بھایێ ئەمپێری یێ گرانە و خودانێن موەلیدان نەبوونا كارەبا گشتی دكەنە بەھانە، كو ئەو نەچارن وێ ڤالاھیێ تژی بكەن و ھەمی سەرێن ھەیڤان، ترسا ھاولاتییێ داھاتێ وی كێم، ئایا دێ بھایێ ئەمپێری چەند بیت؟ تایبەتی ژی وەرزێن ھاڤینێ و گەرمێ و دیسان وەرزێ زڤستانێ و سەرمایێ ئەڤ كێشە سەرھلددەن. لڤێرە ئەم دشێین دوو مفایان ل بەر دەست دانین، ئەگەر كارەبا موەلیدێ ژ دەمژمێر (2ی شەڤ تا 7ی سپێدێ)نەمینیت، كو دێ دوو جاران مفای ژێ وەرگرین.
مفایێ ئێكێ:
بھایێ كارەبێ بخوە دێ ئەرزان بیت، ژبەركو دوی دەمێ پێشنیاركری دا كو دبنە پێننج سەعەت، خودانێن موەلیدان نەشێن بێژن مە دڤی دەمی دا كارەب یا دایە ھاولاتییان و بخوە ژی ھاولاتییان دڤی دەمی دا چ پێدڤی ب كارەبێ نینە ئەگەر ھەبیت یان نەبیت، ژبەركو دەمێ خەوێ یە و نابیت پرانییا خەلكی بھایێ شەڤبێریێن تەخەكا كێم بدەن، ئەڤێن دڤێن ژبەر ھەر ئەگەرەكی بمینە ھشیار.
مفایێ دوویێ:
ئەگەر ئەم بەرێخوە بدەینە بازاری، تا نزیكی نیڤرو ژی بازارەكێ ڤالایە و نە بتنێ بازار، مە كێشەكا دی ل باژێری ھەمیێ ھەیە و یا بوویە نیڤ كەلتوور، ژبلی ئەڤێن دەوامەكا فەرمی ھەی، پرانییا یێن دی تا نزیكی نیڤرو دخەودا دمینن و تایبەتی ژی گەنج. باشە ئەگەر ڤێ پرسیارێ ژخوە بكەین، ئەو كەسێن تا نزیكی نیڤرو دخەودا دمینن و وەك مە گوتی تایبەتی ژی گەنج، ئایا مە پرسیاركریە زیانێن ڤێ چەندێ چنە؟ ژ لایێ ساخلەمیێ ڤە، پشتی ڤەكولینان نوژدار دبێژن باشترین خەو و ھشیار بوون، مرۆڤ زوی بنڤیت و زوی رابیت و ئاین ژی وەدبێژیت و ژخوە باشترین كار ژی ئەون یێن مرۆڤ سپێدەھییان دكەت و مرۆڤ چالاكترە و ئەگەر گەنج وەك نموونە زوی ژ خەو رابوو، ئەو دێ بۆ خوە ل كارەكێ ژی گەریت و پەیدا كەت و نموونا بازاری من ئینایی، كو فرۆشیار گازندێ دكەن بازارەكێ مرییە و كار نین، ئەگەر لڤین و ھاتنوچوون كەفتە ناڤ بازاری، بخوە دێ بازار ھەبیت و دێ كارێن نوی ھەبن و رێژا بێكاریێ بخوە دێ كێم بیت.
لڤێرە كو من مەبەست ب نڤیسینا ڤێ گوتارێ ھەبوو، ئەم چاوان گەنجەكێ ئەكتیف بەرھەم بینین و پشت بەستنێ ل سەر خوە و شیانێن خوە بكەت و رەنگە پێشنیارا من بۆ كێمكرنا دەمێن كاری یێن موەلیدێ، ئەگەر پێشنیار ھزرەكا بچویك ژی بیت، لێ بدیتنا من دێ كاریگەرییا خوە ھەبیت و مفایێن وێ ژ گەلەك روویانڤە دێ ھەبن.
ـــــــــــــــــــــــــــــ
رۆژناما ئه‌ڤرۆ 3665- 2025/ 08/01
ليست هناك تعليقات:
إرسال تعليق