عبدالرحمن بامەرنی
ھەر چەندە ئەڤێن دەستێ نڤیسینێ ھەین و پێشتر گوتارێن وان د رۆژنامە و گوڤاراندا جھێ خوەكری، ئەو ھزردكەن ئەون چالاكڤانێن سوشیال میدیایێ نە، مەبەستا من (تورا فەیسبۆكێ، ژبەركو گوتار ل ڤێ تورێ زێدەتر دھێنە خواندن) و نە بتنێ چالاكڤان، بەلكو ھزردكەن تورەكا وەكی فەیسبۆكێ پێدڤی نڤیسینێن وانە! لێ راستی بیت، نڤیسین بۆ رۆژنامێ و بۆ گوڤارێ و بۆ سوشیالێ دوو تشتێن ژ ئێك جودانە، خوە ئەگەر كەرێن ئێك سێڤ ژی بن. ئەم دشێین ھۆسا ژی بێژین، سوشیالێ جورەكێ دییێ نڤیسەری دروست كر، نڤیسەرەكێ ب ئاگەھتر، نڤیسەرەكێ راستە راست و نڤیسەرەك بشێت وێرەكییێ بدەتە خوە و ل بەرامبەری خواندەڤایی راوەستیت و ئەڤا ئەز دبێژم، ھەمی نڤیسەران ئەو شیانە نینن و ژێ درەڤن، ژبەركو نڤیسین بۆ رۆژنامێ و گوڤارێ، جوداترە ژ ئەوا ل سوشیالێ دھێتە بلاڤكرنێ،
ئەز بەحسا كورتییێ و لەزاتییا گەھاندنێ بتنێ ناكەم، بەلكو خواندەڤایێ سوشیالێ یە ڤی حوكمی ل سەر جورێ نڤیسەری ددەت و ئێدی ئەو ژ ھەمی كەسان قەبویل ناكەت ھەر تشتێ بھێتە نڤیسین ئەو بخوینیت و لدویڤ پیڤەرێن وی، نڤیسەر دھێتە پولینكرن و ئەڤ كەسێن نەشێن خوە دگەل سوشیالێ بگونجینن، ئەو درێدا دمینن و رەنگە باشترین نڤیسەرێ بۆ سوشیالێ بنڤیسیت ژی ھندەك سالوخەت لدەف ھەبن. دا بابەتێ من ژی باشتر بگەھیت، ئەز دێ ل سەر ھندەك ژ وان سالوخەتان راوەستم، ئەو ژی، نڤیسەر دڤێت راستە راست بابەتێ وی بڤێت بگەھینت، بێ چەپ و چیر و كورت و بێ شرۆڤەكرن، زمانەكێ سادە و ھەمی كەس تێبگەھن و وێرەكی و دیتنا نڤیسەری دگەل بیت، چارەسەری دگەلدا ھەبیت، ئەگەر بابەت رەخنەیی بیت و دیسان بشێت پرسیارێ ژی لدەف خواندەڤایی دروست بكەت، تا كو ئەو نڤیسینا ھەنێ بشێت كونتاكێ دگەل خواندەڤای دروست بكەت.
بوچی من گوت ھەمی نڤیسەر نەشێن خوە دگەل سوشیالێ یان خواندەڤایێ نوی بگونجینن؟ ئەڤا ئەز دێ نڤیسم ژی ژ سەربورێن من یێن نڤیسینێ نە چ وەك رۆژنامە و گوڤار یان ژی سوشیال میدیا و ل رۆژنامێ و گوڤارێ، نڤیسەر خوە پاراستی تر دبینیت و ناكەڤیتە بەر گەنگەشا ھەر كەسێ ھەی، د رۆژنامە و گوڤارێدا ئەگەر خواندەڤایەكی دیتنەكا جوداتر ژی ھەبیت، دێ دیتنا وی بۆ وی بتنێ بیت، لێ د سوشیالێ دا ھەمی تشت جودایە، خواندەڤا و كەیفا خوە، ئەو چاوان تێدگەھیت و ئەو چاوان رەخنێ دگریت و گەلەك ژ نڤیسەران وێرەكییێ نادەنە خوە، ژبەركو وان بۆ خوە جیھانەكا داخستی دروستكرینە و ب بەھانەیێن جودا، ئەو دبێژن ئەڤە نڤیسینێن مە و بلا خواندەڤا لدویڤ نڤیسینێن مە بگەریت، رەنگە بارەكا مافی دگەل واندا ھەبیت، لێ دھەمان دەمدا ئەو رەڤینە ژ راستییێ، مەبەستا من رەڤینە ژ خواندەڤایی، رەڤینە ژ ڤێ جیھانا نوی و ڤێ تەكنەلوجیا جیھان سەرسام كری، ژبەركو ئێدی دخازیت نڤیسەر بۆ خواندەڤایی بنڤیسیت و بزانیت خواندەڤای چ ژوی دڤێت و ئەز باوەردكەم دێ گەلەك گوھورینان ب سەر ئەوا ئەو دنڤیسیت دا ئینیت، ئەز بەحسا گەھاندنێ دكەم و دڤێت نڤیسەر وێ وێرەكییێ ژی بدەتە خوە، ئەو بكەڤیتە بەرامبەری خواندەڤایی و بزانیت ئاستێ تێگەھشتنا وی چەندە، ئاستێ تێگەھشتنا وی بۆ نڤیسینا وی مەبەستا من، دەربرین و دارشتنا وی بۆ بابەتێ وی، خوە ئەگەر چەند یێ كورت ژی بیت و بوچی من دمانشێتێ ڤێ گوتارێ دا نڤیسی چالاكڤان و نە نڤیسەر؟ ئەڤە ژی ئێك ژ جوداھیانە، بۆ سوشیال میدیایێ دڤێت نڤیسین یا راستە راست بیت، ھەر وەكو نڤیسەر دگەل خواندەڤایی یان وەرگری د ئاخڤیت و دڤێت رێكێن چارەسەریێ ژی دگەلدا ھەبن و دگەل چالاكڤانی ئەڤ تشتێ ھەنێ زێدەتر دروست دبیت، ژبەركو چالاكڤان یێ فێرە دگەل وەرگری دكەڤیتە دانوستاندنێ و دیتن و بوچوونێن وی وەردگریت، لێ نڤیسەر فێری ڤێ چەندێ نەبوویە، وی ھەر یا دیتی بابەتێ خوە نڤیسی و یێ ھاتیە بلاڤكرنێ و كێم جاران دیتن و رەخنە ل سەر ئەوا وی نڤیسی یا ھاتیە گرتنێ و چ جارەكێ نەكەفتیە بەرامبەری خواندەڤایێ خوە و بزانیت وی چ ژ وی دڤێت ئەو بنڤیسیت و چ جارەكێ ژی فێر نەبوویە خواندەڤایێ وی ل بەرامبەری ئەوا وی نڤیسی راوەستیت و رەخنێ لێبكەت، نە بتنێ كەسەك بەلكو دەھان كەس كومێنتێن خوە یێن رەخنەیی ئاراستەیی وی بكەن و ئەگەر مەبڤێت نڤیسەرێ مە ژی قەرقودێ وی بۆ خوە دروستكری دەركەڤیت و ل بەرامبەری خواندەڤایێ خوە راوەستیت، كو ھەر دەم ئەو گازندا دكەت خواندەڤا نینە، دڤێت بزانیت خواندەڤایێ وی چ ژ وی دڤێت؟
ــــــــــــــــــــــــــــ
رۆژناما ئەڤرۆ 3683- 2025/ 03/02
ليست هناك تعليقات:
إرسال تعليق