عبدالرحمن بامەرنی
ئەم هەمی دنڤیسین و ئەو كەسێن دنڤیسن ژی گەلەكن و ئەم دشێین ژ ڤێرە بابەتێ خوە دەست پێبكەین، ئەو چ تشتن مە مژوولی نڤیسینێ دكەن؟ رەنگە نڤیسین بخو تشتەكێ ب ساناهی بیت، لێ ئەو تشتێن مە پالڤەددەن بو نڤیسینێ هەر ئەو تشتن یێن سەنگی ددەنە نڤیسینا هەر ئێك ژ مە. نڤیسین بخو تێكەلەكە ژ ناخێ نڤیسەری و ژ هزرو بیركرنەڤەیا نڤیسەری و لڤێرە ژی تا ئەڤ كارلێكە دناڤبەرا هەردوویان دا روینەدەت، نڤیسین نەشێت قالبێ خوە یێ دروست بگریت. ئەگەر ئەڤە بو نڤیسینێ ب رەنگەكێ گشتی بیت و خاندەڤا خوە دناڤرا ب بینیت، دگەل شعرێ گەلەك جوداتر و زیق تر ئەڤ چەندا هەنێ رەنگ ددەتە ڤە و ئەڤ ئێكگرتنا هەنێ، گەلەك ب هێزتر دیار دكەت.
پەیڤێن داخدای، ناڤێ شعرەكا هوزانڤان (مەسعود خەلەف)ە دكوڤارا نوبون دا بلاڤ بویە، دێ هەولدەین ڤێ كارلێكێ دناڤبەرا نڤیسینا وی و وی بخوە دا ئاشكەرا بكەین و ئایا ئەو ئێكگرتنا هەنێ، دناڤبەرا هەردوویان دا، چەند یا خورتە؟
د ڤێ كێلیێ دە من كەس نە دیت ژ بلی تە،
و من خوە دەخیلی روونشتنێن بەر ئێڤارێن تە دكر
هوزانڤان ب راشكاوانە و ژ ناخێ خوە یێ دگەل تشتەكی د ئاخڤیت، پێش وەخت ژی دزانیت دڤێ ساتێ دا ئەو دگەل خوە یە و بو كەسێ نانڤیسیت، چنكو ئەو تشتێ دگەل د ئاخڤیت، كەسەكێ دویرەدەستە و نە دەنگێ وی دگەهتێ و نە هەناسەیێن ئێك گوهـ لێدبن. هوزانڤان یێ دیار دكەت، كو ئەو جهێ پێڤە گرێدای، چ ئەو جهـ بیت یێ لێ ژ دایك بوی یان یاریكێن زاروكینێ لێكرین یان ژی ئەڤیندارا خوە لێ هێلای یان ژی حەزكرنا وی بو وێ ئاخێ بیت، ئەو جهە یێ دناخێ وی دا و چ تشتەك جهێ وی ناگرن و نەشێن حەزێن وی تێر بكەن.
هەموو خاچەرێك، د بەر پێلێن شەڤستانێن ئەرزان رە دبوورن،
و نێزیكی سەد سالەكی ئەم دهزرین،
دا كۆ دەستێن دیرۆكێ یێن شكەستی،
د بێهنڤەدانێن مشەختیا ڤێ هەلبەستێ دە ببینن.
دڤی پارچێ دا، هوزانڤان مە رادكێشیتە وان هەمی تشتێن وی مژوول دكەن، وان ئەگەرێن بوینە سەدەما دووركەتنا وی ژ جهێ ژ دایكبونا وی. هوزانڤان یێ دوزا پارچەبونا وەلاتێ خوە بەر چاڤ دكەت، هوزانڤان یێ خاندەڤایێ خوە برێكا هەستێن خوە و خەریبیا خوە مە دكێشتە بابەتەكی كو د روژانەكێ دا و د سال وەختەكی دا، دیروكێ غەدرەكا ل وی و وەلاتێ وی كری. ئەڤرو دووركەتنا وی و خەریبیا وی ژ كێلەكا ئەو لێ ژ دایكبوی و ژ كێلەكا یاریێن وی یێن زاروكینیێ لێ ماین، یێ خەموكی و نە ئارام كری! ئەو خەریبیا هەنێ نە بتنێ كارتێكرن ل تەندروستیا وی كریە و ئازارێن جەستەیی گەهاندینێ، بەلكو دەرونێ وی هەمی نە ئارام كریە و چەند خوە بتنێ دبینیت، ئێكسەر خوە دگەل دا ژبیر دكەت. هوزانڤان برییا ڤی وێنەی كودێ ڤێ خەریبیێ و بەرزەبونێ بو مە یێن خاندەڤا ئاشكەرا دكەت، ئەو ژی دەما دبێژیت (نێزیكی سەد سالەكی ئەم دهزرین)، ئەگەر ل مێژویێ ژی بزڤرین هەر ل نێزیكی ڤی دەمی یە كو وەلاتێ وی تێدا هاتیە پارچەكرنێ. لێ شاعر لڤێرە بتنێ ناراوەستیت و تەئكیدێ دكەت، كو ئەو پارچەبونا هەنێ، د دەمەكی دا بریار ل سەر هاتیە دان، كو بهزرا وی گەلەك یێ بێ بها و ئەرزان بویە، دەما دبێژیت (هەموو خاچەرێك، د بەر پێلێن شەڤستانێن ئەرزان رە دبوورن)، یان كو نە بتنێ دیروكێ مافێن وی و ئاخا وی و سەروەریا وی بن پێكرینە، بەلكو ژ ئەگەرێ تشتەكێ بێ بها ئەڤ چەندا هەنێ رویدایە و ژ بەر هندێ ژی دبێژیت (دەستێن دیرۆكێ یێن شكەستی)، كو بهزرا وی دیروك گەلەك تشتان دناڤ پێلێن خوە را بەرزە دكەت و راستیان ڤەدشێریت و بێ دادیێ دكەت.
ئەگەر لڤێ گرێدانا دناڤبەرا شعرێ و هوزانڤانی دا ڤەگەرین و بزانین كا ئەڤ كارلێكە چەند یا بهێزە و تا چ رادە راستگوویی تێدا دیارە، دەما دبێژیت (د هشێ هەلبەستێ دە پیرەمێرەك ژ دایك بوو)، یانكو ئەگەر ئەو وەك هوزانڤان خوە ب گەنج ژی بزانیت، لێ ڤێ خەریبیێ ئەو ب هەمی هەستێن وی ڤە بەرەڤ پیراتیێ ڤە بریە.
%20copy.jpg)
ليست هناك تعليقات:
إرسال تعليق