نڤیسین: عبدالرحمن بامەرنی
ل گوندەكێ دكەڤیتە نێزیك چیایەكێ بلندێ پر داروبار، كتكەكا گەلەك جوان لێ دژیا، رەنگێ وێ سپی و پنیێن گەور و یا تژی پیرت، چاڤێن وێ دكەسك بون و ژ دویرڤە زیق دكرن. ڤێ كتكێ نەدڤیا وەك هەمی پشیكێن دی ژیانا خوە ببەتە سەر و چ جار بەرمایكێ خارنا خەلكی نەدخار، زاروكان ژی حەژێ نەدكر، ژبەركو گەلەك حەز ژ مەزناتیێ دكر و دڤیا گوندیا ژی قەدرێ وێ گەلەك گرتبا، هەر تشتێ خوش بو ئینابا و كەسێ ژی ژمالێن خوە نەكربا دەر!.
زاروكێن گوندی ب كریارێن ڤێ كتكێ و مەزناتیا وێ كەیف نەدهات.
ژ بەركو كتكەك بو حەژ هەڤالینیا زاروكان نەدكر هەر دەم نەونەوا وێ بوو.
داچیتە سەرێ دیوانێ و لسەر دوشەكا دروینشت و حەژ خارنا بەرماكێ مروڤان نەدكر و هەر دەم دڤیا خارنا وێ گوشت و پاریكێن خوش بانە و نڤستنا وێ دناڤ لحێفێن هریێ دابایە و دچوو دەرپوشكا قازانا لسەر دهاڤێت و خارن بدلێ خوە دخار و هی ببو مەنجەلوكێن ماستی و بتنێ سەرتیك ژێ دخار و ل چ مالا نیشتە جێ نەدبو و هەمی مال ب یێن خوە دزانین و بێی شەرم و بێی دەرقوتان دا قەست كەتێ.
ژبەركو كەلەخەكێ بچویك هەبو دشیا د دەرگەه و پەنجەران را بچیتە دژورڤە و دشیا زوی خوە ب ڤەشێریت و زوی خوە ژ مروڤان قورتال دكر و گەلەكا زیرەك و زفت بو و ژ كەسێ نە دترسا.
ژبەر ڤان رەفتاران زاروكان حەژێ ژی نەدكر و گەلەك جاران تورە دبو و زاروك ب پەنجێن (نینوكێن) خوە د ئێشاندن.
هەر دەم یا تەپە سەر بۆ و هەمیا ژ مالێن خوە دكرە دەر و گەلەك برسی دبو و بڤی سەروبەری گەلەك بێزار و بێچارە ببو.
روژەكێ كتكێ بریار دا ژ گوندی زیز ببیت و دویر بكەڤیت و ئێدی چ جار تێكەلیا مروڤان نەكەت و بەرەڤ چیایی و دارستانێ ڤە بچیت.
دەما گەهشتیە چیایی، ژ نشكەكێ ڤە ریڤیەك هاتە بەراهیێ.
كتك گەلەك ژ ریڤی ترسا ژبەركو كەلەخێ وی گەلەكێ مەزن بو و ددانێن وی د تیژ بون.
ژبەركو كتكێ دژیارا خوە یا دگەل مروڤان دا گەلەك چیروكێن ریڤیێن فێلباز ژ زاردەڤێ مروڤان گوه لێببون و بخو كربونە سەربور.
كتكێ بریار دا یا خودان جەرگ بیت و بخو ئەڤ چەندە ب دەلیڤە زانی و ددلێ خوە دا گوت:
گەر ئەز یا ژیر و ئاقلمەند نەبم، دێ بمە خارنا ریڤی و دێ پەشیمانی ژیارا دگەل زاروكێن گوندی بم و بەرماكێ خارنا وان.
ریڤی گوتێ:
كتكا گۆری، ئەڤە تو ژ كیڤە دهێی و دێ كیڤە چی.
ئەڤە سێ روژە ئەزێ برسی و بخو ل خارنا گیانەوەرەكێ وەكی تە دگەرم تو ژمن قورتال نابی و ئەڤرو تو بو خارنا شیڤا منی!.
كتكەكا زانا و پەروەردا مروڤا و تژی ئاقل. گوتێ:
ریڤیێ هەلە رویت. ئەز نە كتكم ئەز كتك بەگم..
قاسدێ پاشایێ شێرم .
ئەزێ ل ریڤیەكێ وەكی تە دگەرم. لسەر پشتێ ب خرینم و بو پاشایێ شێر ببەم.
خوینا لەشێ تە بو نەخوشیا وی بكەمە شیفا و دەرمان.
بڤان گوتنان ریڤی گەلەك ترسا و گوتێ:
كتكێ كتك بەگێ.
ئەز بەختێ تە و تو بەختێ خودێ تو خوینا من بو پاشایێ شێر نەكە شیفا و دەرمان.
ئەز دێ بمە خزمەتكارێ تە و هەرو بو خارنا تە یا شیڤێ دیكلەكی نێچیر ئینم.
كتكێ گوتێ بلا...
ل روژەكا دی كتك بتنێ ل دارستانێ دگەریا و پیاسە دكرن و دیت گورگەك هاتە بەراهیێ.
گورگی گوتێ:
كتكا گوری ئەڤە تو ژ كیڤە دهێی و دێ كیڤە چی.
ئەڤە سێ روژە ئەزێ برسی و و بخو ل خارنا گیانەوەرەكێ وەكی تە دگەرم تو ژمن قورتال نابی و تو ئەڤرو بو خارنا شیڤا منی!.
سەربورێن كتكێ و ژیری و ئاقلمەندیا وێ و بتایبەت دەمێ شیایی ریڤی دسەردا ببەت دلێ وێ قایم كر لجێه خوە راوەستا و پەنجێن خوە تیژكرن و خو بەرهەڤكر دا خوە ب هاڤێژیتە گورگی و دا گورگ نەبێژیت ئەڤ كتكا لاوازە و ڤەقەتیایە.
كتكەكا زانا و پەروەردا مروڤا و تژی ئاقل. گوتێ:
گورگێ فێلباز ئەز نە كتكم، ئەز كتك بەگم.
قاسدێ پاشایێ شێرم .
ئەزێ ل گورگەكێ وەكی تە دگەرم.
لسەر پشتێ ب خرینم و بو پاشایێ شێر ببەم و خوینا لەشێ تە بو نەخوشیا وی بكەمە شیفا و دەرمان.
بڤان گوتنان گورگ گەلەك ترسا و گوتێ:
كتكێ. كتك بەگێ.
ئەز بەختێ تە و تو بەختێ خودێ تو خوینا من بو پاشایێ شێر نەكە شیفا و دەرمان.
ئەز دێ بمە خزمەتكارێ تە و هەرو بو خارنا تە یا فراڤینێ بەرانەكی نێچیر ئینم.
كتكێ گوتێ بلا...
وەكی هەرجار كتك بتنێ ل دارستانێ دگەریا و پیاسە دكرن و دیت هرچەك هاتە بەراهیێ .
هرچێ گوتێ:
كتكا گوری ، ئەڤە تو ژ كیڤە د هێی و دێ كیڤە چی.
ئەڤە سێ روژە ئەزێ برسی و بخو ل خارنا گیانەوەرەكێ وەكی تە دگەرم، تو ژ لەپێن من قورتال نابی و تو بو خارنا شیڤا منی!.
كتكەكا زانا و پەروەردا مروڤا و تژی ئاقل گوتێ:
هرچا گال گالی.
ئەز نە كتكم ئەز كتك بەگم.
قاسدێ پاشایێ شێرم.
ئەزێ ل هرچەكا وەكی تە دگەرم لسەر پشتێ ب خرینم و بو پاشایێ شێر ببەم.
خوینا لەشێ تە بو نەخوشیا وی بكەمە شیفا و دەرمان.
بڤان گوتنان هرچ گەلەك ترسا و گوتێ:
كتكێ. كتك بەگێ.
ئەز بەختێ تە و تو بەختێ خودێ تو خوینا من بو پاشایێ شێر نەكە شیفا و دەرمان.
ئەز دێ بمە خزمەتكارێ تە و هەرو بو خارنا تە یا تێشتێ سەلكەكا هژیرا و هنگڤینێ مێشا ئینم.
كتكێ گوتێ بلا...
كتكێ بڤێ ژیارێ گەلەك خوش بو و رەنگێ خوە داو گەلەك قەلە و بو هەر تشتێ داخاز كربا. ئێك ژ هەرسێ خزمەتكارێن وی دا بو ئینیت.
كتكێ ژیارەكا خوش بڤی رەنگی برە سەر و هندی گوشت دخار گەلەك قەلەو بۆ بتنێ یاری و پیاسەدكرن.
هەرسێ خزمەتكارێن كتكێ ( ریڤی و گورگ و هرچ) ب خزمەتا كتكێ ڤە گەلەك وەستیان.
هەرو شولێ ریڤی دیكلەك یان مریشكەك بو شیڤا كتكێ نێچیر دكر.
گورگی بەرانەك یان نێریەك بو فراڤینا كتكێ نێچیر دكر.
هرچێ سەلكەكا هژیرا و هنگڤینێ مێشا بو سەرتێشتا كتكێ بەرهەڤ دكر.
روژەكێ (هرچ و گورگ و ریڤی) ڤێكەتن و گوتنە ئێك و دوو ئەم باوەر ناكەین كتك خزمەتكارێ پاشایێ شێر بیت و ئەم دێ رابین ڤێ كتكێ تاقی كەین.
هەرسێ چونە درێكا كتكێ دا خو ڤەشارتن.
دا بزانن كا كتك بروژێ چدكەت.
هەر سێكان ئەڤ ڤەشارتنە بو خوە ب دەلیڤە زانین كو كتكێ بگرن و بكوژن و خو ژێ قورتال بكەن.
ریڤی چوو دبن كومەكا بەلگان ڤە و خو بێدەنگ كر.
هرچ چوو سەر دارەكا تژی بەلگ و خو دناڤ بەلگ و چەقێن وێ را متكر.
گورگ چوو دناڤ دەحلەدریەكا ئاسێ را و خو ڤەشارت.
كتك بژیارا دارستانێ گەلەك شاد ببو و ژ دەستێن زارویێن گوندی قورتال ببو تێر خاری و ڤەخاری گەلەك قەلە و ببو بتنێ روژێن خوە ب یاریا و پیاسان ڤە دبوراندن.
دەما كتك نێزیكی وی جهی بوی یێ ریڤی و هرچێ و گورگی خوە لێ ڤەشارتین.
دیت كو بەلگەك ژوانێن ریڤی خوە دبن را ڤەشارتی یێ كەتیە سەر دفنا ریڤی و دەما ریڤی بێهنا خوە دهەلكێشیت ئەو بەلگ دلڤلڤیت.
كتكێ هزركر ئەڤە مشكەكە دبن وان بەلگان ڤە. هەر زوی پەنجێن خوە تیژ كرن و خو تێوەركر و ئەو پەنج ددفنا ریڤی داچون.
ژ ریڤی ڤە كتك ب پلانا وان حەسیا و ددلێ خودا گوت ئەڤرو مرنا من ب دەستێن كتكێ یە و خوینا لەشێ من بو نەخوشیا شێری چوو.
دەما ریڤی كتك بڤی رەنگی دیتی و هێرش كریە سەر و ئێشاندی.
بو ئیز ئیزا ریڤی و كرە هەوار و خو قورتالكر.
دەما كتكێ دیتی ئەو دەهبە ژبن وان بەلگا دەركەت و نەزانی چ تشت بو، كتك ژ ترسا رەڤی سەر دارێ.
هرچێ بەرێ خوە دایێ پشتی كتكێ هێرش كریە ریڤی و پاشی قەستا سەر دارێ كری.
وێ هزركر ئەڤە هات هێرشێ بكەتە وێژی ئینا خوە د دارێ دا هاڤێت.
بو گال گالا وێ و تەقیا و چوو.
ژبەركو كتك ژ ترسا دەهبەیێ ناڤ بەلگا رەڤی بو سەر دارێ و دیت دەهبەكێ مەزتر یێ لسەر دارێ.
چاڤ لێ تاری بون و رێكێن رەڤێ لبەر چاڤا بەرزە بون و ژ ترسا خوە ژدارێ بەردا و رەڤی قەستا دەحلێ بكەت و خوە تێدا ئاسێ بكەت.
یا ژ گورگی ڤە ئەڤە دورا وێ هات و پشتی كتكێ هێرش كریە ریڤی و پاشی هێرش كریە هرچێ لسەر دارێ ئەڤە بو نك وێ هات و گەلەك ترسا.
ئینا دنیا لبەر چاڤێن گورگی تاری بو و خو ژ دەحلێ هاڤێت و رەڤی و چوو.
كتكێ ژی هندی چاڤ قەترە بكەن بو لایێ دی رەڤی.
(ریڤی و گورگ و هرچ) گەهشتنە ئێك دبێهن هلمای و وەستیایی.
ریڤی گوت:
هەوە دیت چاوان كتكێ هێرش كرە سەر من و جێه پەنجێت وێ ل دفنا خوە نیشا وان دان و گوت:
هەما باش بوی ئەز شیایم خوە ژ دەستێن وێ قورتال بكەم.
هرچێ گوت:
پا هەوە نەدیت چاوان هلباسكی دارێ د بو و هەرگاڤا دەستێن وێ بمن را گەهشتبان دا من كوژیت و ژ ترسا من خوە لبنێ دارێ دایە و دووسێ پراسیێن من یێن ژكەستین.
گورگی گوت:
هەما خوە بێدەنگ بكەن. ئەوێ چ جەرگێ شێری یێ هەی. چاوان هێرش كرە سەر هەوە و هوین ژبەر رەڤین.
ژ نشكەكێ ڤە. وی هێرشەك كرە سەر وێ دەحلا ئەز دناڤرا و وی قیچ كرە من ئەز ژبەر رەڤیم و چەند ستریەكێن دەحلێ هەمیێ دلەشێ من را چوینە و لەشێ من هەمیێ خوینەلو كری.
هەر سێكا( ریڤی و گورگی و هرچێ ) بریاردان چ جارێن دی ڤێ تاقیكرنێ دگەل كتكێ ب كار نەئینن و هەتا دمرن د خزمەتا وێ دابن .
ریڤی بو پەیداكرنا خارنا شیڤێ و گورگ بو پەیداكرنا خارنا فراڤینێ و هرچ بو پەیداكرنا خارنا سەرتێشتان.
%20copy.jpg)
ليست هناك تعليقات:
إرسال تعليق