ببورە کو ئەز نەشیایم رێ ل ھاتنە خوارا روندکێن تە بگرم...
ژیان کچەکا خاپینوکە و یارییان ل سەر مێزەییا مە دکەت...
دەما بێھنا رەشە ریحانێن سینگێ تە نقومی پێکێ خوە دکەم و دادعویرم! ھەست ب شێتبونەکێ دکەم، ھیچ شەرابەک نە شێت من ژڤێ بێدەنگیێ دەربینیت...
خو ئەگەر عشق پەنجەرەیەکا شوشەی ژی با، ب تکێنا بەرەکی دەرز نە دکەڤتنێ و... ھتد
دگەل تێلێن گیتارەکا ل بەر تیروژکا حەتاڤێ پێتیبوی
تو چ ئاواز ژ من دخوازی؟
تو یا فێری ستران گوتنێ و ریتمێن خەمگین بوی
ھەر چ نوتەیەک من ھەی
من یا بەلاڤەی گونەھێن خوە یێن بێ دوماھی کری و....
برین سەمایێ دلەشێ من دا دکەن
ژمارا وان
ژ ھژمارا پەنجەرەیێن باژێری زێدەترن
ل سەر ھەستیێن من بیابانەک برێڤە یە
ئەڤە تو دبەرپەرێن من دا نەمای
ئەز دتاریێ دا شاپەرێن روناھیێ ڤێکددەم
ئەز وەستیام
ھەبونەک بوم و روژ من ئاڤا دبەت
چەند تو یا دخەیالا من دا و
چەند دناخێ خوە دا لتە دگەریێم
نەشێم زێدەتر بشکورینان داھێنم
کەنی دفەرھەنگا من دا نەما یە
چەند ئەم ل قەدەرێ دگەرین
ھەر (قەدەر)ە مە دنڤیسیت
ھەکو خەونان ژێ دبینم
تو ھشیار دبی و
ھەکو تو خەونان دبینی، ئەز ھشیار دبم!
ھەمی تشتەک برێڤەیە
تو دمن دا ژ دایک دبوی و
تو یا ژ ھزرێن من تافیل دبی
ھەمی شعرێن من ژی
ژ تەنە یان ل سەر تەنە..
ھەر وەکو لبیرا منە
ئەو تشتێن من حەژێدکرن
دناڤ باخچەکێ
گەلەک مەزن دا بون
ھەمی گول تێدا درویس بون
مە شەڤ ل ئێک و دوو خوش دکرن
بتنێ ئەز نوبەردارێ وی باخچەی بوم
باش لبیرا منە
من بو تە بویکێن پاتەیی چێدکرن
دشەڤێن درێژ دا
مە ستێر ب بەندکان ڤەدکرن
دەما ئەز ژ خەو رادبوم
ئەم پێکڤە رادبوین
ئەز بخوە دچووم، تو بخو دچووی
ئەز لتە دگەریام و تو ھەبوی
من لخوە دگەریا
ئەز نەبوم!
ئەز رویس دکەتم سەر کەلەخێ خوە
نیڤەک عەرد و نیڤەک عەسمان...
ئەڤە نە شەڤا وی یا داویێ بو، بەلکو دوماھی پێک بو شعر تێدا نڤیسی.. من دگەل وی شەڤێن ژڤێ بێدەنگتر برینە سەر، بتنێ جوداھیا ڤێ، تابلویێ مێزەییا دان و ستاندنێ بو و ئەو زەنگا پەردا بێدەنگیێ ددراند، (ڤایە ئەزێ ھەرم تە بھێلم ل ڤر، جارەکا دن ئەز و تە ھەڤد و نابینن)، کو د ٤ خولەک و ٤٨ چرکەییان دا ب داوی دھات! نزانم بو جارا چەندێ بو ئەڤ زەنگە دگوھێ وی دا دەنگ ڤە ددا و دھاتە دوبارە کرن، تابلویەک بو، ئەو پەیڤێن بو بێدەنگیا تە ھاتینە نڤیسین، سەرێن ھەمیان ھاتبونە برین..
بەسە ئەی شەڤ
بەس تارییا خوە بگڤێشە ناڤ پێکێ من
ئەز و سەودایێ سەرخوشیێ و نڤیسینا شعران بوینە دوو بەرەیێن جودا
گەر تە بڤێت بشکورینەکێ دناخێ من دا بکەیە تابلو و
ژیانا من تێدا بھلاویستی ببینی!
تەماشەی نھومێن ئاڤاھیێ وەستیانا من بکە
پێکێ من پرە ژ تەنھاتیێ
تو مێھڤانا سەدان خەیالێن من بوی و
دھەمیان ژی دا
من داوی ب نڤیسنا شعرێ ئینا و
نە شێم چ دی، تە بکەمە پەناگەھـ بو نڤیسینا شعرێن خوە
ھەرە بێ خاتر خواستن من بھێلە و بێ ڤەگەرییان....
تێبینی:
ئەڤ شعرە دکوڤارا (پەیڤ)یا ئێکەتیا نڤیسەرێن کورد ـ دھوک، ژمارە ٥٧ دا بلاڤ بویە.
%20copy.jpg)
ليست هناك تعليقات:
إرسال تعليق