2011/10/07

ھەڤکێشا من و تە..!




تو پێدڤی کەسەکی د تە بگەھیت، گوھێ خو بدەتە لێدانێن دلێ تە و بزانیت چ دناخێ تە دا ھەیە و ئەو چ تشتە مێشکێ تە ئالوز دکەت! ئەو کەس ژی بتنێ یێ دھزرا تە دا و بەردەوام تو یێ لێدگەری، سپێدێ تو ژبەر وی ژ مال دەردکەڤی، لێدگەری و خوە بو ماندی دکەی. دکاری دا تو یێ ل ھیڤییا وی و ئەزمانێ خوە بو خەلکی خوش دکەی دا ل تە بستە ب بیت، خوە بو رێڤەبەر و بەرپرسێ خوە شیرین دکەی دا ئەو کەس دلوڤانیێ بتە ببەت، دچیە بازاری سەحدکەیە سەر رەفاتکێن دکانان تو نابینی،
ل چایخانەکێ بروینی دێ لھیڤیێ مینی کو بھێت چایەکێ دگەل تە ڤەخوت، تەماشای فلمەکی دکەی، بەلکی دکوژیەکی و د(لەقتە)کێ را دەرکەڤیت، تو دلوڤانیێ دگەل مروڤێن ھەژار دبەی بەلکو تو ھزر دکەی وی کەیف بڤێ چەندێ دھێت، تو حەژێکرنێ دکەی، ژ تە ڤە ئەڤە ئەو کەسە یێ حەزێن تە تێر دکەت! تو گەلەک خەمان ژبەر دخوی، ئازاران دکێشی، ماندی دبی، ھەست ب دوو دلیێ دکەی، نە ئارامیێ، کەربێن تە ڤە دبن، تە دڤێت ژخو برەڤی، تە نەڤێت کەسێ ب بینی، تە باوەری بھەبونێ نامینیت و تو ژ ژیانێ ھەمیێ بێ ئومێد دبی، تە دڤێت ل ل جھەک دی بگەری و تە کەر خانیکەک لێھەبیت، بلا کارەب نەبیت، ئاڤ دبورییان را نەھێت و ڤەخارنا تە ژ کانیا بیت، سیاربونا تە ژ جھەکی بو جھەکی ترومبێل نەبن ھەر دەوار ژی بن باشە، گرنگ نینە ئەو جھـ ل کیڤە بیت، یا گرنگ تە دڤێت گوھورینەک ھەبیت، تە ژیانەکا دی دڤێت، نە پێدڤی یە تە ل وێرێ ترومبێلێن ئاخر مودێل ھەبن یان ھەمی ھەیڤان دەستکەکێ موبایلێ بگوھری یان ژی سیرامیکێ خانیێ تە ئێکانە بیت و کەسێ ژ وی نەبیت. تە دڤی تەمەنێ ژیانا خوە دا گەلەک پێکولێن کرین، تو گەلەک سەرەدانان دکەی گەلەک کەسان ل خوە خرڤە دکەی، نە تو دزانی ئەو چ دبێژن، نە ژی ئەو دزمانێ تە دگەھن، تو پێدڤی جیھانەکا دی ژ بیاڤێ ھزرێن تە مەزنتر و دویر تربیت، کەسەک بیت ژ تە مەزنتر ژ تاخێ تو لێ مەزنتر، ژ باژێرێ تو لێ بەرفرەھتر، مێشکێ وی ل گەلەک جھان کار بکەت، دنیا دیتی و چاڤ ڤەکری بیت، بزانیت ژیان ژ کیڤە دھێت و د سەر چ را دچیت، ھێش تو یێ لێ دگەری! بەلێ پشت راست دبێژمە تە، تو نابینی، ژبەرکو ئەو کەسێ ھە د کومەلگەھێ تە دا نینە، کومەلگەھێ تە ئێکانە یە، جلکێن وان ئێکن، ناڤێن وان وەکی ئێکن، وەک تە سێ دانا دخون و وەک تە حەژێکرنێ دکەن، ھەمی وەک تە دخون، تو ژ وانی و ئەو ژ تە نە، تو وان تشتان دبینی یێن ئەو دبینن، تە باوەری ب وان تشتان ھەیە یێن وان باوەری پێ ھەی، ھین ھەردوو سەرا تشتێن بچویک و بەرنەکەفتی خەموکی دبن و نە ئارام دبن، سەرا بچویک ترین تشت کەربێن وە دگەھنە گوبیتکا سەرێ وە، یا ژ ھەمیێ ژی نێزکیتر ھین جێمکەکن ھین رەش و سپیا وەک ئێک دبینن، گروپێ خوینا وە ئێکە، ھین ھەردو یێن ئێک زکن ئێک مالبچیکن، بتنێ ناڤێن وە جودانە، ھەڤکێشە ھوسان دەست پێدکەت، ئالیەک ئەزم ئالیەک تو، ئەڤە یە جوداھیا دناڤبەرا مە ھەردوان دا، ئەز دنڤیسم و تو ناخوینی، ئەز دبێژم و تو گوھـ نادەیێ، ئەز یێ لپێش چاڤێن تە و تو من نابینی.

ليست هناك تعليقات: